జీవితమంటేనే సుఖ దుఃఖాల సమ్మేళనం. అన్ని వేళలా మనం ఆశించినట్లు జరగదు. అందుకు తగ్గట్లే అప్పుడప్పుడు కొన్ని ఆటుపోట్లు మన ఓర్పుకు, సహనానికి పరీక్ష పెడుతుంటాయి. అయితే ఎలాంటి అడ్డంకులు వచ్చినా ధైర్యంగా ఎదురొడ్డి పోరాడడమే జీవితం. అదేవిధంగా సంకల్పబలంతో ప్రయత్నిస్తే ఏదైనా సాధించవచ్చని ఇప్పటికే చాలామంది చాలా సందర్భాల్లో నిరూపించారు. ఈ కోవకే చెందుతుంది జపాన్‌కు చెందిన మనామీ ఇటో. ఓ యాక్సిడెంట్‌లో కుడిచేతిని కోల్పోయిన ఆ అమ్మాయి తన వయొలిన్‌ స్కిల్స్‌తో అందరినీ అబ్బురపరుస్తోంది. సింగిల్‌ హ్యాండ్‌తో సంగీతాభిమానులను అలరిస్తున్న ఆ యువతి పారాలింపియన్‌ స్విమ్మర్‌గానూ సత్తా చాటింది. అంతేకాదు ఓ నర్సుగా రోగులకు సేవ కూడా చేస్తోంది. ఈక్రమంలో అంగవైకల్యం అనేది శరీరానికేనని, మనసుకు కాదని నిరూపిస్తున్న ఆ జపనీస్‌ యువతికి సంబంధించిన ఓ వీడియోను ఐఏఎస్‌ ఆఫీసర్‌ సుప్రియా సాహు తన ట్విట్టర్‌లో షేర్ చేసింది.

వేల దరఖాస్తులు.. రకరకాల వడపోతలు... నాలుగేళ్ల కఠోర శిక్షణ... ఇవి పూర్తి చేస్తేనే పైలట్‌గా ఎంపిక... అన్ని దశలనూ అవలీలగా దాటుకొని ప్రతిష్ఠాత్మక అమెరికా నావికాదళానికి ఎంపికైంది తెలుగు తేజం దొంతినేని దేవిశ్రీ... ఈ స్థాయి అందుకున్న తొలి భారత సంతతి అమ్మాయిగా ఘనత సాధించింది... ఆ స్ఫూర్తి కెరటాన్ని వసుంధర పలకరించింది.

కరోనాతో ప్రపంచ దేశాలన్నీ వణికిపోతున్నాయి. చిన్నా, పెద్దా, ధనిక, పేద అన్న తేడాల్లేకుండా అందరినీ కబళిస్తోన్న ఈ వైరస్‌తో కోట్లాదిమంది ప్రజలు ఇంటికే పరిమితమయ్యారు. లాక్‌డౌన్‌లో భాగంగా సామాజిక దూరం పాటిస్తూ కనీసం ఒకరినొకరు కూడా పలకరించుకోలేని పరిస్థితి. ఇప్పటికే లక్షలాదిమందిని బలి తీసుకున్న కరోనా గురించి ఆలోచిస్తూ చాలామంది ఆందోళనకు గురవుతున్నారు. ఇంట్లో ఉన్నప్పటికీ నిరాశా నిస్పృహలతో మానసిక అనారోగ్య సమస్యల బారిన పడుతున్నారు. ఇలా లాక్‌డౌన్‌లో ఆందోళన చెందుతున్న వారందరిలో తన పాటలతో జోష్‌ తీసుకొచ్చింది ఫాల్గుణి పాథక్‌. రెండు దశాబ్దాలుగా తన హుషారైన పాటలతో ఉర్రూతలూగిస్తున్న ఈ స్టార్‌ సింగర్‌ మరోసారి తన గొంతు సవరించుకుంది. సామాజిక దూరం పాటిస్తూ తన ఇంటి బాల్కనీలోనే పాటలు పాడుతూ చుట్టుపక్కలున్న వారందరిలో కరోనా భయాన్ని పోగొట్టేందుకు ప్రయత్నించింది.

కరోనా ధాటికి ప్రపంచమంతా వణికిపోతోంది. ఈ పరిస్థితుల్లో వైరస్‌ నుంచి మనల్ని మనం కాపాడుకోవాలంటే వ్యక్తిగత పరిశుభ్రత పాటించడం, మాస్కులు ధరించడం ఎంత ముఖ్యమో ప్రత్యేకించి చెప్పాల్సిన అవసరం లేదు. ముఖ్యంగా చేతుల్ని తరచూ శుభ్రం చేసుకోవాలని ప్రపంచ ఆరోగ్య సంస్థతో పాటు పలువురు వైద్య నిపుణులు కూడా సూచిస్తున్నారు. ఇండియాలో కూడా వైరస్‌ వేగంగా వ్యాప్తి చెందుతోన్న నేపథ్యంలో హ్యాండ్‌ శానిటైజర్లకు బాగా డిమాండ్‌ ఏర్పడింది. ఈ క్రమంలోనే వీటి అమ్మకం చాలామందికి వ్యాపార సూత్రంగా మారిపోయింది. దీంతో మార్కెట్లలో వీటి ధరలు ఆకాశాన్నంటుతున్నాయి. ఈ క్రమంలో కోల్‌కతాకు చెందిన బయోటెక్నాలజీ ఇంజినీరింగ్‌ విద్యార్థిని సిమర్‌ శర్మ సొంతంగా హ్యాండ్‌ శానిటైజర్లను తయారుచేస్తోంది. అనంతరం స్థానిక పోలీసుల సహాయంతో వాటిని అవసరమైన వారందరికీ ఉచితంగా సరఫరా చేస్తూ అందరి మన్ననలు అందుకుంటోంది.

కేంద్రం లాక్‌డౌన్‌ ప్రకటించడంతో విద్యాసంస్థలు, వ్యాపార పరిశ్రమలతో పాటు వినోద రంగం కూడా తాత్కాలికంగా తమ కార్యకలాపాలను నిలిపివేసిన సంగతి విదితమే. దీంతో సినిమాలు, సీరియళ్లు, రియాల్టీ షోలు.. తదితర కార్యక్రమాలకు సంబంధించిన చిత్రీకరణ పనులు కూడా ఆగిపోయాయి. ఈ క్రమంలో నిత్యం షూటింగ్స్‌తో బిజీగా ఉండే మన బుల్లితెర తారలకు కాస్త విరామం దొరికినట్లయ్యింది. దీంతో వీళ్లు ఇంటి పట్టునే ఉంటూ ఈ క్వారంటైన్‌ సమయాన్ని కుటుంబ సభ్యులతో ఎంజాయ్‌ చేస్తున్నారు. ఇందులో భాగంగా కొంతమంది బుల్లితెర నటీమణులు టిక్‌టాక్‌ వేదిక ద్వారా ప్రేక్షకులను అలరిస్తుండడం విశేషం. ఈ క్రమంలో డ్యాన్స్‌, కామెడీ, సినిమా డైలాగుల అనుకరణతో పాటు.. సోషల్‌ మీడియా ఛాలెంజ్‌లలో పాల్గొనడం, తాము రూపొందించిన వంటలను పరిచయం చేయడం.. తదితర వీడియోలను కూడా టిక్‌టాక్‌లో పోస్ట్‌ చేస్తు్న్నారు. అలాంటి కొన్ని వీడియోలపై ఓ లుక్కేద్దాం రండి..

కరోనా ప్రభావంతో క్రీడా టోర్నీలన్నీ రద్దయ్యాయి. లాక్‌డౌన్‌ కారణంగా క్రీడాకారులందరూ ఇంటికే పరిమితమయ్యారు. ఈ నేపథ్యంలో కొందరు తమ కుటుంబ సభ్యులతో కలిసి కాలక్షేపం చేస్తుండగా, మరికొందరు ఫిట్‌నెస్‌, హెల్త్‌కు సంబంధించిన వివిధ రకాల ఛాలెంజ్‌లు విసురుతూ అభిమానులతో టచ్‌లో ఉంటున్నారు. ఇందులో భాగంగా తాజాగా భారత జట్టు స్టార్‌ క్రికెటర్లు స్మృతీ మంధాన, జెమీమా రోడ్రిగ్స్‌ సంయుక్తంగా ‘డబుల్‌ ట్రబుల్‌’ పేరుతో ఓ సరికొత్త వెబ్‌ షో ప్రారంభించారు. ఈ కార్యక్రమం మొదటి ఎపిసోడ్‌కు ప్రముఖ బ్యాడ్మింటన్ ప్లేయర్‌ పీవీ సింధు హాజరైంది.

‘ఏ ఆటలోనైనా గెలుపోటములు సహజం. అందరిలాగే గెలుపనేది నాకు కూడా ఎంతో సంతోషాన్నిస్తుంది . కానీ ఆటలో నిజాయతీ అనేది నాకు ఇంకా ఆనందాన్నిస్తుంది. అదే నాకు ముఖ్యం’ అని చెబుతోంది బ్యా్డ్మింటన్‌ స్టార్‌ పీవీ సింధు. వరల్డ్‌ ఛాంపియన్‌షిప్‌ టైటిల్‌, ఒలింపిక్‌ మెడల్‌ లాంటి ఎన్నో ప్రతిష్ఠాత్మక టైటిల్స్‌, పతకాలు సాధించిన ఈ హైదరాబాదీ ప్లేయర్‌ తాజాగా మరో అరుదైన ఘనతను సొంతం చేసుకుంది. ప్రపంచ బ్యాడ్మింటన్ సమాఖ్య (బీడబ్ల్యూఎఫ్‌) నిర్వహిస్తోన్న ‘ఐయాయ్‌ బ్యాడ్మింటన్‌’ అనే ప్రచార కార్యక్రమానికి బ్రాండ్‌ అంబాసిడర్‌గా ఎంపికైందీ యంగ్‌ సెన్సేషన్‌. ఆమెతో పాటు మరో ఏడుగురు అంతర్జాతీయ బ్యాడ్మింటన్‌ క్రీడాకారులు ఈ క్యాంపెయిన్‌లో పాల్గొననున్నారు.

లాక్‌డౌన్‌ కారణంగా నిరుపేదలు, రోజువారీ కూలీలు, వలస కార్మికులు ఎన్నో ఇబ్బందులు పడుతున్నారు. పనుల్లేక రోడ్లపైనే పస్తులుంటూ కడుపు మాడ్చుకుంటున్నారు. ఎవరైనా దాతలు వచ్చి అన్న పానీయాలు అందిస్తే తప్ప వారి ఆకలి తీరడం లేదు. ఇలా ఆపత్కాలంలో అవస్థలు పడుతోన్న పేద కార్మికులు, వలస కార్మికులకు ఆపన్న హస్తం అందించేందుకు భారత మహిళల హాకీ జట్టు వినూత్న ఆలోచనతో ముందుకొచ్చింది. ఇందులో భాగంగా ‘ఫన్‌ ఫిట్‌నెస్‌ ఛాలెంజ్‌’ పేరుతో విరివిగా విరాళాలు సేకరించి వలస కార్మికుల కడుపు నింపాలని నిర్ణయించుకుంది. ఓవైపు తమ ఫిట్‌నెస్‌ను మెరుగుపరుచుకుంటూనే.. మరోవైపు పేద కార్మికుల కళ్లల్లో సంతోషం నింపే ఈ సరికొత్త ఛాలెంజ్‌ గురించి మనమూ తెలుసుకుందాం రండి.

కరోనా మహమ్మారిపై ప్రపంచ దేశాలు విస్తృతంగా పోరాటం చేస్తున్నాయి. రోజురోజుకూ పెరుగుతోన్న ఈ వైరస్ వ్యాప్తిని అదుపు చేసేందుకు వివిధ దేశాల ప్రభుత్వాలు తమ శక్తికి మించి కృషి చేస్తున్నాయి. ఈ క్రమంలో కరోనాపై ప్రజల్లో అవగాహన కల్పించేందుకు ప్రభుత్వాలతో పాటు పలు ఆరోగ్య సంస్థలు, స్వచ్ఛంద సంస్థలు సైతం ముందుకొస్తుండడం విశేషం. ఈ నేపథ్యంలో ప్రముఖ స్వచ్ఛంద సంస్థ యునిసెఫ్ (UNICEF) కూడా వివిధ వేదికల ద్వారా అవగాహన కార్యక్రమాలను చేపడుతోంది. అంతేకాదు, వివిధ రంగాలకు చెందిన ప్రముఖులను సైతం వీటిలో భాగం చేస్తోంది. ఈ క్రమంలో మాజీ ప్రపంచ సుందరి మానుషీ చిల్లర్‌ కూడా ఇటీవల యునిసెఫ్‌ ద్వారా ప్రజలకు తన సందేశాన్ని తెలియజేయడం విశేషం.

కరోనా కారణంగా ప్రపంచ వ్యాప్తంగా ప్రజలు స్వీయ నిర్బంధం పాటిస్తున్నారు. దీంతో ఇంట్లో కాలక్షేపం కోసం రకరకాల మార్గాలను వెతుక్కొంటున్నారు. ఈ క్రమంలో ఎక్కువశాతం మంది ఆధారపడుతోన్న వేదిక సోషల్ మీడియా. యూట్యూబ్, ఫేస్బుక్, ఇన్స్టా, ట్విట్టర్, టిక్టాక్, వాట్సాప్.. ఇలా ఉదయం నిద్ర లేచిన దగ్గర నుంచి రాత్రి పడుకునే వరకు వీటిని చూస్తూ కాలక్షేపం చేసే వాళ్లు చాలామందే ఉన్నారు. అయితే లాక్డౌన్ ప్రారంభమైన తర్వాత ఈ వేదికలకు ఆదరణ పెరిగిందని.. జనాలు ఇదివరకు కంటే ఎక్కువ సమయాన్ని వీటి కోసం కేటాయిస్తున్నారని ఆయా వేదికల గణాంకాలు చెబుతున్నాయి. ఈ క్రమంలో తమ వినియోగదారులను ఆకట్టుకునేందుకు కొత్త కొత్త అప్డేట్లతో ఈ సంస్థలు ముందుకొస్తున్నాయి. ఈ నేపథ్యంలో వాట్సాప్ అందిస్తోన్న కొత్త అప్డేట్ గురించి తెలుసుకుందాం రండి.

కరోనా కారణంగా ప్రపంచమంతా చిగురుటాకులా వణికిపోతోంది. అగ్రదేశాల ఆర్థిక వ్యవస్థలు సైతం కుప్పకూలే పరిస్థితులు దాపురించాయి. ఇక ఇండియాలోనూ ఈ మహమ్మారి జూలు విదుల్చుతోంది. ఇప్పటికే సుమారు 4 వేలమందికి పైగా ఈ వైరస్‌ బారిన పడ్డారు. ఈ నేపథ్యంలో కరోనాను నియంత్రించేందుకు కేంద్ర ప్రభుత్వం లాక్‌డౌన్‌ కూడా విధించిన సంగతి తెలిసిందే. ఈ మహమ్మారిని మరింత సమర్థంగా ఎదుర్కోవడానికి ప్రధాన మంత్రి నరేంద్రమోదీ ‘పీఎం-కేర్స్‌’ పేరుతో ఓ ప్రత్యేక సహాయ నిధిని కూడా ఏర్పాటుచేశారు. ఇందుకోసం సెలబ్రిటీలు, సామాన్యులు, చిన్నా, పెద్దా అనే తేడాల్లేకుండా ప్రతి ఒక్కరూ తమ వంతు విరాళాలు అందజేస్తున్నారు. ఈ క్రమంలో యూపీకి చెందిన ఇద్దరు చిన్నారులు తమ కిడ్డీ బ్యాంకులో పొదుపు చేసుకున్న నగదును విరాళంగా అందజేసేందుకు ముందుకొచ్చారు.

నాలుగు రోజుల్లో నిఖా.. మెహెందీతో మెరవాల్సిన చేతుల్లో స్టెతస్కోప్‌ ఉంది.. బారాత్‌లో తేలాల్సిన పెళ్లికూతురు.. ఆదరాబాదరాగా ఆసుపత్రిలో తిరుగుతోంది.. సంగీత్‌లో పాటలు వినాల్సిన ఆ చెవులకు.. రోదనలు వినిపించాయ్‌.. పెళ్లి కన్నా.. తన వృత్తి ధర్మమే మిన్న అనుకుంది. కరోనా కట్టడి కోసం కల్యాణాన్ని వాయిదా వేసుకున్న వైద్యురాలు కథ చదివేయండి..

సాయం చేయాలన్న మంచి మనసుండాలి కానీ... మన స్థాయి చిన్నదా, పెద్దదా అన్న ఆలోచన అస్సలు రాదు. హైదరాబాద్‌కు చెందిన టీనేజ్‌ షూటర్‌ ఇషా సింగ్‌ను చూస్తే ఈ మాటలు నిజమనిపిస్తాయి. వయసులో చిన్నమ్మాయే అయినా.. కరోనాపై పోరుకు రూ.30 వేల విరాళం అందజేసి తన పెద్ద మనసును చాటుకుందీ తెలుగమ్మాయి. ఈ క్రమంలో స్లార్‌ ప్లేయర్లకు ధీటుగా మానవతా దృక్పథంతో సాయం చేసిన ఇషా సింగ్‌పై కేంద్ర క్రీడా శాఖ మంత్రి కిరణ్‌ రిజిజుతో పాటు పలువురు ప్రముఖులు ప్రశంసలు కురిపిస్తున్నారు.

ప్రస్తుతం ప్రపంచానికి కంటి మీద కునుకు లేకుండా చేస్తోంది ‘కరోనా’ మహమ్మారి. ఇది ఎప్పుడైతే ఈ భూమిపై అడుగుపెట్టిందో అప్పట్నుంచే మన జీవనవిధానం పూర్తిగా మారిపోయింది. గడప దాటడం బంద్‌. అత్యవసర పరిస్థితుల్లో బయటికి వెళ్లాల్సి వస్తే సామాజిక దూరం పాటించాలి.. మాస్క్‌ ధరించాలి.. ఇంట్లో ఉన్నా హ్యాండ్‌వాష్‌/శానిటైజర్‌తో చేతులు శుభ్రం చేసుకోవాల్సిందే!

ప్రస్తుత సమాజంలో మనం ఎదుర్కొంటోన్న సమస్యల్లో ‘మహిళలకు సరైన భద్రత లేకపోవడం’ కూడా ఒకటి. స్కూళ్లు, కాలేజీలు, బస్‌స్టాప్‌లు, హాస్టళ్లు, పని ప్రదేశాలు.. ఇలా ఎక్కడ పడితే అక్కడ ఆడవాళ్లపై అఘాయిత్యాలు జరుగుతున్నాయి. జన సమూహాలు ఉండే ప్రదేశాల్లోనే ఇలాంటివి జరుగుతున్నాయంటే.. ఇక నిర్మానుష్య ప్రదేశాల గురించి ప్రత్యేకించి చెప్పనవసరం లేదు. ఇందులో భాగంగా క్యాబ్‌లలో ఒంటరిగా ప్రయాణించే మహిళలపై జరిగే అఘాయిత్యాల గురించి తరచూ మనం వార్తల్లో చూస్తూనే ఉన్నాం. ఈ విషయంలో మహిళలకు భద్రత కల్పించేందుకు ప్రభుత్వం, క్యాబ్‌ సంస్థలు రకరకాల ప్రయత్నాలు చేస్తున్నప్పటికీ అడపాదడపా ఇలాంటి సంఘటనలు చోటు చేసుకుంటూనే ఉండడం గమనార్హం. ఈ క్రమంలో ఈ సమస్యకు ఓ సులభమైన పరిష్కారాన్ని సూచిస్తున్నారు టిక్‌టాకర్లు. అదేంటో మీరే చూడండి.

ప్రస్తుత పరిస్థితుల్లో ఎలాంటి సమాచారం కావాలన్నా మనకు ముందుగా గుర్తొచ్చేది ‘గూగుల్‌’. మీ మనసులో ఉన్న ప్రశ్నను మీకు నచ్చిన భాషలో గూగుల్‌కి విన్నవిస్తే చాలు.. దానికి సంబంధించి ఇంటర్నెట్‌లో ఉన్న సమాచారాన్ని క్షణాల్లో మీ ముందుంచుతుంది. అంతేనా.. మన ఫొటోలు-వీడియోలను భద్రపరచడం, మనకు తెలియని ప్రదేశాలకు మ్యాప్స్‌ ద్వారా మార్గాలను సూచించడం, ఒక సమాచారాన్ని మనకు నచ్చిన భాషలోకి తర్జుమా చేయడం.. మొదలైన సేవలెన్నో అందిస్తోంది గూగుల్‌. అందుకే ఈతరం వాళ్లు ‘గూగుల్‌’ను తమ బెస్ట్‌ ఫ్రెండ్‌గా భావిస్తున్నారు. ఈ సంస్థ కూడా ఎప్పటికప్పుడు తమ వినియోగదారులను ఆకట్టుకునేలా కొత్తగా ప్రయత్నాలు చేస్తూనే ఉంది. ఇందులో భాగంగా పండగలు, ముఖ్యమైన రోజులు, ప్రముఖుల పుట్టినరోజులు.. తదితర ప్రత్యేక సందర్భాల్లో ఆ సందర్భానికి తగినట్లుగా తమ హోమ్‌ పేజీని క్రియేటివ్‌గా డిజైన్‌ చేయడం (డూడుల్‌ని రూపొందించడం) గూగుల్‌ ఆనవాయితీ. ఈ క్రమంలో ఈ ఏడాది హోలీ పండగను పురస్కరించుకొని గూగుల్‌ ఓ కొత్త ట్రిక్‌ను నెటిజన్లకు పరిచయం చేసింది. అదేంటో మీరే చూడండి.

ఈ అవార్డు అందుకున్నందుకు గర్వపడుతున్నా. నేను కొరియోగ్రఫీని కెరీర్‌గా ఎంచుకున్నప్పుడు నా చుట్టూ మగవాళ్లే ఉండేవారు. మహిళలు ఈ రంగంలోకి ఎప్పుడు వస్తారో అని ఎదురు చూసేదాన్ని. అటువంటిది ప్రస్తుతం అన్ని రంగాల్లో మనం ఉండే స్థాయికి ఎదిగాం. ప్రముఖ మహిళలెందరో ఈ అవార్డు అందుకుంటుంటే, అంతటి ఉన్నత వ్యక్తుల మధ్య నాకూ స్థానం దక్కడం చాలా సంతోషంగా ఉంది. నేనీ స్థాయికి చేరుకోవడానికి నాకు ప్రోత్సాహాన్ని అందించిన అమ్మ, నా కుటుంబ సభ్యులతోపాటు పలువురు సినీప్రముఖులకు ఈ సందర్భంగా కృతజ్ఞతలు చెబుతున్నా. - అనీ

భారత మహిళల క్రికెట్‌ అనగానే ఠక్కున గుర్తుకొచ్చే పేరు మిథాలీరాజ్‌. దేశంలో అమ్మాయిల క్రికెట్‌ ఉందని కూడా చాలా మందికి తెలియని సమయంలో మిథాలీ ఆటలో అడుగుపెట్టింది. అక్కడి నుంచి భారత మహిళా క్రికెట్‌ ప్రతి మలుపులోనూ తనదైన ముద్ర వేశారు. ప్రస్తుతం ప్రపంచ క్రికెట్లో భారత జట్టు గొప్ప స్థాయిలో ఉందంటే.. అందుకు ప్రధాన కారణం.. మిథాలీయే. 16 ఏళ్ల వయసులో వన్డే అరంగేట్రం చేసిన ఈ హైదరాబాదీ తొలి మ్యాచ్‌లోనే అజేయ శతకం చేసింది. 19 ఏళ్ల వయసులో తన మూడో టెస్టులోనే ఇంగ్లాండ్‌పై 214 పరుగులు చేశారు. 2005, 2017 ప్రపంచకప్‌ల్లో కెప్టెన్‌గా జట్టును ఫైనల్‌కు చేర్చారు. గతేడాది టీ20ల నుంచి రిటైరయ్యారు. గతంలో మిథాలీ బ్యాటర్‌గా కొనసాగుతూనే జట్టుకు కోచ్‌గా కూడా పనిచేశారు. రెండు దశాబ్దాల పాటు అన్నీ తానై జట్టును నడిపించిన ఈ ప్రస్తుత వన్డే కెప్టెన్‌.. 2021 ప్రపంచకప్‌ తర్వాత వీడ్కోలు పలికే అవకాశముంది.

ప్రపంచ వ్యాప్తంగా మహిళలంతా ఎంతో సంతోషంగా, గర్వపడుతూ, పండగలా జరుపుకునే ‘అంతర్జాతీయ మహిళా దినోత్సవం’ రానే వచ్చింది. ఈ ప్రత్యేకమైన రోజున మహిళలకు సంబంధించిన వివిధ కార్యక్రమాలు దేశమంతటా నిర్వహిస్తూ మహిళా శక్తిని ప్రపంచానికి చాటడం మనకు తెలిసిందే. ఈ క్రమంలోనే కొందరు గాయనీగాయకులు ప్రత్యేకమైన గీతాలతో మహిళల ఉనికిని దశదిశలా విస్తరింపజేస్తారు. ప్రముఖ గాయని, నటి మంగ్లీ కూడా ఈ ‘ఉమెన్స్‌ డే’ని పురస్కరించుకొని ఈటీవీతో కలిసి ఓ గీతాన్ని ఆలపించింది. స్త్రీ శక్తిని గురించి ఎంతో గొప్పగా అక్షీకరించిన ఈ పాటను మంగ్లీ ఎంతో అద్భుతంగా పాడింది. ‘అమ్మగా.. అమ్మాయిగా.. చెలియగా.. చెల్లాయిగా.. ఇంటిని నడిపే ఇంతులందరికీ ఇదే మా వందనం..’ అంటూ సాగే ఈ పాట స్త్రీలు తమ నిజ జీవితంలో పోషించే వివిధ పాత్రల గురించి కళ్లకు కడుతుంది. ఈ పాటలో మంగ్లీతో పాటు కరుణ, లహరి, పలువురు బుల్లితెర తారలు కూడా సందడి చేశారు. ఈ పాటను ప్రతి ఒక్క మహిళకు అంకితం చేస్తున్నట్లు ఈటీవీ ప్లస్‌ తెలిపింది. మరి, వినసొంపుగా, స్త్రీ శక్తిని చాటేలా ఉన్న ఆ అద్భుతమైన గీతాన్ని మీరూ విని తరించండి!

భారతీయ సంప్రదాయానికి నిలువెత్తు నిదర్శనం చీర. అయితే చీరకట్టులో సౌకర్యంగా ఉండలేమని చెబుతూ చాలామంది అమ్మాయిలు శారీలను కేవలం పండగలు, ప్రత్యేక రోజులకే పరిమితం చేశారు. ఇలా చీర కట్టుకోవడానికే ఇబ్బంది పడిపోయే నేటి రోజుల్లో కొందరు మహిళలు ఈ వస్ర్తధారణతోనే వ్యాయామాలు చేయడం, మారథాన్‌లలో పాల్గొనడం వంటివి చేస్తున్నారు. తాజాగా భారత మహిళల క్రికెట్‌కు మూల స్తంభంలా నిలిచిన మిథాలీ రాజ్‌ కూడా చీర కట్టుతోనే క్రికెట్‌ ఆడి అందరినీ ఆశ్చర్యపరిచింది. సాధారణంగా జెర్సీ, ప్యాంటు ధరించి క్రికెట్‌ ఆడే ఆమె ఎందుకు చీరకట్టి బ్యాట్‌ పట్టిందో తెలుసుకుందాం రండి.