పెళ్లి.. మనిషి జీవితంలో అత్యంత ముఖ్యమైన ఘట్టం. సంతోషం, సరదాలతో పాటు బరువూబాధ్యతలను కూడా వెంట తెస్తుందీ బంధం. ఇలాంటి జీవితాన్ని పూర్తిగా ఆనందించాలంటే.. ఆర్థికంగా బలంగా ఉండడం ఎంతో అవసరం. ఈ క్రమంలో పెళ్లికి ముందే కొన్ని ప్రణాళికలను సిద్ధం చేసుకుంటే ఆ తర్వాత ఆర్థిక ఇబ్బందులు ఎదురు కాకుండా జాగ్రత్త పడచ్చు. ఎందుకంటే ఇది మీ ఒక్కరికే సంబంధించిన విషయం కాదు.. ఇద్దరు వ్యక్తులు పరస్పర అవగాహనతో జీవితంలో ముందడుగేసే అంశం. ఈక్రమంలో ఆర్థిక అంశాలకు సంబంధించి పెళ్లికి ముందునుంచే తీసుకోవాల్సిన కొన్ని జాగ్రత్తల గురించి తెలుసుకుందాం..
మాట్లాడుకోవాలి..
ప్రస్తుత కాలంలో భార్యాభర్తలిద్దరూ ఉద్యోగాలు చేస్తేగానీ ఎలాంటి ఆర్థిక ఇబ్బందులు తలెత్తకుండా నెగ్గుకు రాలేకపోతున్నారు. కానీ కొందరి ఆలోచనలు వేరుగా ఉండచ్చు. కుటుంబ వ్యవహారాలు చూసుకుంటూ ఇంట్లోనే ఉండాలని కోరుకునే వారూ ఉంటారు. అందుకే కాబోయే మీ జీవిత భాగస్వామితో పెళ్లి తర్వాత ఖర్చుల గురించి మాట్లాడి ఒక అవగాహనకు రావాలి. వివాహం తర్వాత ఇద్దరూ ఉద్యోగాలు చేస్తారా? లేదా మీరు ఇంట్లోనే ఉండి కుటుంబ బాధ్యత, పిల్లల సంరక్షణ వంటి విషయాలపై శ్రద్ధ తీసుకుంటారా? వంటి విషయాల గురించి ముందుగానే మాట్లాడుకొని ఓ అవగాహనకు రావడం అవసరం. ఫలితంగా, కుటుంబం మొత్తానికి నెలసరి బడ్జెట్ ఎంతవుతుంది? దానికోసం అదనంగా మీ ఇద్దరూ కలిసి చేయాల్సిన కృషి ఏంటి? అనేదానిపై స్పష్టత వచ్చే అవకాశముంది.
హనీమూన్ ఆచితూచి
పెళ్లి తర్వాత హనీమూన్‌కు వెళ్లాలనే కోరిక ప్రతి కొత్తజంటకు ఉంటుంది. అందులో తప్పు లేదు. హనీమూన్‌లో ఎంత ఖర్చయినా సరే, తట్టుకునే శక్తి మాకుంది అనుకునే వారు ఫర్వాలేదు. కానీ దానివల్ల తాహతుకు మించి ఖర్చు చేయాల్సి వస్తుందేమో అని ఏమాత్రం అనిపించినా ఆ ఆలోచనను వెంటనే పక్కన పెట్టేయడం ఉత్తమం. హనీమూన్ ముగించుకొని వచ్చాక, ఆర్థిక ఇబ్బందులతో జీవించడం కంటే దాన్ని వాయిదా వేసుకోవడం ఉత్తమం. హనీమూన్ కోసం కేటాయించిన డబ్బును దాచుకుంటే అది అత్యవసర పరిస్థితుల్లో మీకు ఆపద్బంధువులా ఉపయోగపడుతుంది. లేదు.. జీవితంలో తొలి యాత్రానుభవం ఎప్పటికీ గుర్తుండిపోతుంది కదా తప్పకుండా వెళ్లి తీరాలి అనుకుంటే, మీకు అందుబాటులో ఉండి, తక్కువ బడ్జెట్‌లో అయిపోయే ప్రాంతాలను ఎంపిక చేసుకోవడం మేలు. ఈ విషయంలో ఇద్దరి అభిప్రాయాలు ఒకటై, బడ్జెట్‌ను మిగుల్చుకొని, ప్రణాళిక ప్రకారం జీవితాన్ని కొనసాగిస్తే.. భవిష్యత్తులో ఇలాంటి యాత్రలు ఎన్నో చేయచ్చు.
అప్పుల తిప్పలు..
కొన్ని విషయాల్లో మొహమాటం లేకుండా ఉండడమే శ్రేయస్కరం. కాబోయే భార్యాభర్తల విషయంలోనూ ఇది మినహాయింపు కాదు. ముఖ్యంగా ఆర్థికపరమైన విషయాల్లో. ప్రస్తుతం దాదాపు అందరి దగ్గర క్రెడిట్ కార్డ్ ఉంటోంది. అది ఉందనే ధైర్యంతో పాటు నెలసరి వాయిదాల్లో కట్టుకోవచ్చన్న భావనలో చాలామంది ఎక్కువగా ఖర్చు చేసేస్తున్నారు. మీ జీవిత భాగస్వామి ఆస్తులు, అప్పుల వివరాలు కనుక్కోండి. ఇందులో తప్పులేదు. ఎందుకంటే.. పెళ్లి తర్వాత వ్యక్తిగత, కుటుంబ బాధ్యతలు ఇద్దరూ సమానంగా నెరవేర్చాల్సి వచ్చినప్పుడు మీకు కాబోయే భర్త చేసిన అప్పులు సమస్యగా మారకుండా ఉండాలి కదా? అదే విధంగా లోన్‌లు ఏమైనా తీసుకున్నారేమో కనుక్కోండి. వివాహం తర్వాత రుణాల వాయిదాలు కట్టగలం అన్న నమ్మకం ఇద్దరిలో ఏర్పడడం ముఖ్యమని గుర్తుంచుకోండి. అలాగే మీకు సంబంధించిన అప్పులు, ఇతర లోన్ల సంగతి కూడా నిజాయతీగా మీ భాగస్వామితో పంచుకోండి.
ఆది నుంచే పొదుపు మంత్రం వివాహ ఘడియలు దగ్గర పడుతున్నాయి అనుకున్నప్పుడు కాకుండా కాస్త ముందు నుంచే పొదుపు పాటిస్తే ఏ విషయంలోనూ ఇబ్బంది పడకుండా ఉంటారు. మీరు మంచి ఉద్యోగంలో స్థిరపడినట్త్లెతే, మొదటి నెల జీతంలో నుంచే పొదుపు చేసుకోవాలి. మ్యూచువల్ ఫండ్స్, ఫిక్స్‌డ్ డిపాజిట్లు, ఆర్‌డీ.. తదితర విధానాల్లో పొదుపు-మదుపు చేయడం వల్ల మీకు భవిష్యత్తులో అత్యవసర సమయాల్లో ఆర్థికంగా ఇబ్బంది ఎదురవ్వదు. ఒకవేళ ఇల్లు, వాహన రుణం తీసుకుంటే, ఆ అప్పు వివాహ సమయానికి వీలైనంత వరకు తగ్గించుకునే ప్రయత్నం చేస్తే మేలు. దీనివల్ల పెళ్లి తర్వాత పెరిగిపోయే బడ్జెట్‌ను కాస్త సమన్వయపర్చుకునే వీలు కలుగుతుంది.
|