''ఈ పని నీకు చేతకాదులే..'', ''ఆడపిల్లవి నీకెందుకు.. మేమున్నాం కదా'' ఇలాంటి మాటలు చాలామంది మహిళలు ఏదో ఒక సందర్భంలో వింటూనే ఉంటారు. కొన్ని సందర్భాల్లో అయితే పురుషులకన్నా సమర్థంగా పని చేయగలిగే సత్తా ఉన్నా వివిధ కారణాల వల్ల మహిళల ప్రతిభ మరుగున పడిపోతోంది. అయినా సరే చదువుతో సంబంధం లేకుండా ప్రతి మహిళా కొన్ని పనులను పురుషుల కంటే నేర్పుగా చేయగలదు. అవేంటో తెలుసుకోవాలనిపిస్తోందా?? అయితే ఇది చదివేయండి మరి..
ఒత్తిడిని అదుపు చేసుకోగలరు..
ఏదైనా బాధ కలిగించే సంఘటన జరిగినప్పుడు మహిళలు వెంటనే కన్నీళ్లు పెట్టుకుంటారు. అంత మాత్రాన మహిళలు బలహీన మనస్కులని ముద్ర వేసేయడం సరికాదు. క్లిష్ట సమయాల్లో పురుషుల కన్నా మహిళలే సమర్థంగా ఆలోచించగలరు. దీని వెనక ఒక శాస్త్రీయ కారణం కూడా ఉంది. మనం ఎప్పుడైనా ఒత్తిడికి గురైనప్పుడు మన శరీరంలో ఆక్సిటోసిన్ అనే హార్మోన్ విడుదలై దానిని నియంత్రిస్తుంది. ఇది పురుషుల శరీరంలో కన్నా మహిళల శరీరంలో అధికంగా ఉత్పత్తి అవుతుంది. అందుకే మగవారితో పోలిస్తే వారు తక్కువ సమయంలో ఒత్తిడిని అదుపు చేసుకోగలరు. అంతేకాకుండా సమాన స్థాయిలో ఒత్తిడికి గురైన స్త్రీపురుషులిద్దరికీ ఒకే రకమైన ప్రశ్నలు సంధిస్తే.. మహిళలే సరైన సమాధానాలు చెప్పగలరని ఒక పరిశోధనలో కూడా తేలింది.
భావవ్యక్తీకరణ..
'నలుగురు ఆడవాళ్లు ఒక చోట చేరితే ఎక్కడ లేని కబుర్లు చెప్పుకుంటారు..' అని చాలామంది అంటూ ఉంటారు. నిజమే.. ఇది వారి భావవ్యక్తీకరణకు ఒక నిదర్శనం. పురుషులతో పోలిస్తే మహిళలు తమ అభిప్రాయాలను బాగా వెలిబుచ్చగలరు. అంతేకాకుండా స్త్రీలు ఎదుటివారు తమతో ఎలా మాట్లాడుతున్నారనే దాని గురించి క్షణాల్లో అర్థం చేసుకొని స్పందించగలరు. అలాగే మగవారి కంటే ఆడవారిలో మెదడు ఏ మాట మాట్లాడాలి? ఏది మాట్లాడకూడదు? అనే విషయం గురించి ఎక్కువగా ఆలోచిస్తుందట. అందుకే మహిళలు మాట్లాడే మాటల్లో వివాదాస్పదమైన అంశాలు చాలా తక్కువగా ఉంటాయంటున్నారు నిపుణులు.
ఆర్థిక వ్యవహారాలు..
ఏ సమయంలో ఎలా, ఎంత ఖర్చు పెట్టాలి అనే అంశంపై పురుషుల కన్నా మహిళలకే అవగాహన ఎక్కువగా ఉంటుందట. అంతేకాదు తాము ఖర్చు పెడుతున్న ప్రతి పైసా సద్వినియోగం అవుతుందో లేదో కూడా ఒకటికి రెండుసార్లు చెక్ చేసుకుంటారట. అందుకే మన దేశంలో చాలా కుటుంబాల్లో ఆర్థిక నిర్వహణ బాధ్యతను మహిళలే చూసుకుంటారు.
మల్టీటాస్కింగ్‌లో సిద్ధహస్తులు..
మహిళలు ఒకేసారి భిన్నమైన పనులను సమర్థంగా చేయగలరు. ఉదాహరణకు గృహిణి విషయంలోనే చూస్తే.. ఒక పక్క వంట చేస్తూనే పిల్లలను స్కూలుకి వెళ్లడానికి తయారు చేస్తుంది. టీవీ చూస్తూనే చీరకు అందమైన ఎంబ్రాయిడరీ కుట్టుకుంటుంది. సాయంత్రం సమయంలో వంట చేస్తూనే పిల్లల చేత హోంవర్కు చేయిస్తూ ఉంటుంది. అదే పురుషుల విషయానికి వస్తే మల్టీటాస్కింగ్‌లో కాస్త వెనకబడ్డారనే చెప్పాలి. ఎందుకంటే మహిళలు చేసినంత సమర్థంగా వాళ్లు ఎక్కువ పనులు ఒకేసారి పూర్తి చేయలేరు.
అద్భుతమైన జ్ఞాపకశక్తి వీరి సొంతం..
ఇంట్లో ఏ వస్తువు ఎక్కడ ఉందో మహిళ ఠక్కున చెప్పగలదు. అంతేకాదు.. ఆఫీసులో ఫలానా ఫైలు కావాలి అని పై అధికారి అడిగితే వెంటనే తెచ్చివ్వగల జ్ఞాపకశక్తి కూడా మహిళలకే ఎక్కువ. ఈ విషయంలో కూడా పురుషులు రెండడుగులు వెనకే ఉన్నారు. సాధారణంగా వయసు పెరిగే కొద్దీ జ్ఞాపకశక్తి తగ్గుతుందని పెద్దలు చెబుతూ ఉంటారు. కానీ మహిళల్లో అలా జరగదట. అంతేకాకుండా ఎంత బాధలో ఉన్నప్పటికీ స్త్రీలు ఇంట్లోకి కావాల్సిన వస్తువులన్నీ గుర్తుపెట్టుకొని మరీ తీసుకురాగలరట!!
ఇవే కాదు.. ఆలోచనాధోరణి, ప్రవర్తన, బాధ్యతాయుతంగా మెలగడం.. మొదలైన చాలా విషయాల్లో మహిళలు సమర్థులే. కావాలంటే ఒక్కసారి మిమ్మల్ని మీరు పరిశీలించుకోండి..! మీకే అర్థమవుతుంది.