కరోనా కారణంగా జీవిత ఉద్యోగం పోయింది. ప్రస్తుతం ఇంట్లోనే ఉంటోన్న ఆమె కొత్త ఏడాది మంచి జాబ్ కొట్టాలని లక్ష్యంగా పెట్టుకుంది. ఈ క్రమంలోనే పలు కోర్సులు ఆన్‌లైన్‌లోనే నేర్చుకుంటోందామె.
గీతికకు ప్రస్తుతం చేస్తోన్న ఉద్యోగంలో అస్సలు సంతృప్తి లేదు. అందుకే ఓవైపు కరోనా సంక్షోభం కొనసాగుతోన్నా.. మరోవైపు తన చదువుకు, అనుభవానికి తగ్గ ఉద్యోగం కోసం అన్వేషిస్తోంది. అందుకు కావాల్సిన నైపుణ్యాలు కూడా సంపాదించుకుందామె.
మాయదారి కరోనా మహమ్మారి గతేడాది ఉద్యోగుల జీవితాల్లో ఎంతలా చిచ్చు పెట్టిందో మనం కళ్లారా చూశాం. ఈ క్రమంలో చాలా కంపెనీలు నష్టాల్లోకి కూరుకుపోవడం, దీంతో ఎంతోమంది ఉద్యోగాలు కోల్పోయి రోడ్డున పడడం.. ఇలాంటి ప్రతికూల పరిస్థితుల నుంచి ఇప్పుడిప్పుడే నెమ్మదిగా బయటపడుతున్నాం. ఈ క్రమంలోనే చాలామంది నిరుద్యోగులు తిరిగి తమ ఉద్యోగాన్వేషణను ప్రారంభించే ప్రయత్నాల్లో ఉన్నారు. ఇక ఈ సమయంలో ఈ ఏడాది ప్రారంభం నుంచే సుమారు 50 శాతం కంపెనీలు చురుగ్గా నియామక ప్రక్రియ చేపట్టే అవకాశం ఉందని పలు అధ్యయనాలు కూడా చెబుతుండడం నిరుద్యోగులకు శుభ పరిణామమే! అయితే ఇలాంటి సువర్ణావకాశాన్ని అందిపుచ్చుకోవాలంటే మాత్రం నిరుద్యోగులు తమ నైపుణ్యాలను మెరుగుపరచుకుంటూనే, కొన్ని అంశాల్ని సైతం దృష్టిలో పెట్టుకోవాలంటున్నారు నిపుణులు.
చిరుద్యోగుల దగ్గర్నుంచి పెద్ద పెద్ద వ్యాపారస్తుల దాకా, రోజువారీ కూలీల దగ్గర్నుంచి స్వయం ఉపాధి పొందుతోన్న వాళ్ల దాకా.. గతేడాది ఉద్యోగ రంగంలో కరోనా సృష్టించిన సంక్షోభం పూడ్చలేనిదనే చెప్పాలి. అయితే ఇప్పుడిప్పుడే పరిస్థితులు కాస్త చక్కబడుతున్నాయి. మొన్నటిదాకా నష్టాల్లోకి కూరుకుపోయిన కంపెనీలు కూడా నెమ్మదిగా పుంజుకుంటూ ఈ కొత్త ఏడాది ప్రారంభం నుంచే నియామక ప్రక్రియను మొదలుపెట్టాయి. అయితే నిరుద్యోగులు పెరిగిపోవడం, ఏ రంగంలో చూసినా విపరీతమైన పోటీ ఉన్న ప్రస్తుత పరిస్థితుల్లో ఉద్యోగం సంపాదించడమంటే మాటలు కాదు. అందుకు తగిన నైపుణ్యాలను మెరుగుపరచుకుంటూ, ఎప్పటికప్పుడు అప్‌డేట్‌ అయితే తప్ప ప్రతికూలతల్ని వెనక్కి నెట్టి ఉద్యోగం సొంతం చేసుకోలేరని నిపుణులు సూచిస్తున్నారు.
ఆ ‘ట్రెండ్స్‌’ ఫాలో అవ్వాల్సిందే!
చాలావరకు కంపెనీలు ఇప్పుడిప్పుడే నియామక ప్రక్రియ చేపడుతోన్న ప్రస్తుత తరుణంలో ఉద్యోగ నియామకాలకు సంబంధించిన ట్రెండ్స్‌ని తప్పనిసరిగా ఫాలో అవ్వాలంటున్నారు నిపుణులు. ఈ క్రమంలో ఎక్కువగా నియామకాలు చేపడుతోన్న కంపెనీలేంటో ముందుగా తెలుసుకోవాలి. ఆపై ఆయా సంస్థలకు సంబంధించిన వెబ్‌సైట్స్‌ని ఫాలో అవ్వడం, వాటి కార్యకలాపాలకు సంబంధించిన విషయాలు తెలుసుకోవడానికి ఆ సైట్‌లోకి లాగిన్‌ అవడం, వారు పోస్ట్‌ చేసే జాబ్ నోటిఫికేషన్స్‌ని పరిశీలించడం.. దానికి మీరు అర్హులైతే దరఖాస్తు చేసుకోవడం.. వంటివి చేయాలి. ఒకవేళ ఈ క్రమంలో ఏదైనా సందేహాలు తలెత్తినా, వీటి గురించి మీకు అంతగా అవగాహన లేకపోయినా మీకు తెలిసిన ఇతర ఉద్యోగుల సలహాలు తీసుకోవచ్చు.. లేదంటే సంబంధిత నిపుణుల్ని సంప్రదించినా ఉద్యోగాన్వేషణ గురించి మీకొక ఐడియా వస్తుంది.
పెరిగేవే కానీ.. తరగవు!
కరోనా మహమ్మారి కారణంగా చాలా రంగాలు నష్టాన్నే చవిచూసినా.. కొన్ని మాత్రం లాభాలను ఆర్జించాయని చెప్పుకోవచ్చు. ఉదాహరణకు.. ఆరోగ్య రంగం, ఈ-కామర్స్‌, ఫార్మసీ.. వంటి రంగాలతో పాటు ఐటీ రంగానికి సంబంధించిన కొన్ని కంపెనీలు కూడా ముందంజలోనే ఉన్నాయని చెబుతున్నారు నిపుణులు. అయితే నష్టం చవిచూడని ఇలాంటి రంగాల్లో ఉద్యోగావకాశాలపై దాదాపుగా కోత పడలేదని చెప్పచ్చు. ఇక ఈ ఆర్థిక సంక్షోభంలోనూ వీటిలోని కొన్ని రంగాల్లో ఉద్యోగుల్ని నియమించుకున్న దాఖలాలు కూడా ఉన్నాయి. అందుకే ప్రస్తుతం ఉద్యోగాన్వేషణలో ఉన్న వారు ఇలాంటి ఎవర్‌గ్రీన్‌ రంగాలపై దృష్టి పెట్టమంటున్నారు నిపుణులు. అయితే ‘అది మా ఫీల్డ్‌ కాదు కదా.. అందులో మాకేం అవకాశాలుంటాయని’ అనుకునేవారూ లేకపోలేదు. నిజానికి ఏ రంగమైనా అందులో మనం చదువుకున్న చదువుకు తగ్గ ఉద్యోగం కాకపోయినా చిన్నదో, పెద్దదో.. ఇలా ఏదో ఒక అవకాశం ఉండకపోదు. కాబట్టి ప్రస్తుత ప్రతికూల పరిస్థితుల్లో ‘నా చదువుకు తగ్గ ఉద్యోగమే రావాల’ని గిరిగీసుకొని కూర్చోకుండా ఏ ఉద్యోగమైనా కళ్లకు అద్దుకొని మరీ స్వీకరించడం ఉత్తమం. కావాలంటే పరిస్థితులు కాస్త కుదురుకున్నాక మరో ఉద్యోగంలోకి మారచ్చు. అప్పటిదాకా ఖాళీగా ఉండకుండా కాస్త అనుభవాన్నైనా ఆర్జించచ్చు.
‘తాత్కాలికమే కదా’ అనుకోవద్దు!
ప్రస్తుత అనిశ్చిత ఆర్థిక పరిస్థితుల్లో చాలావరకు కంపెనీలు ఉద్యోగుల్ని నియమించుకున్నా అది తాత్కాలికంగానో, కాంట్రాక్ట్‌ పద్ధతిలోనో, ఫ్రీలాన్సింగ్ వర్కర్స్‌గానో మాత్రమే రిక్రూట్‌ చేసుకుంటున్నాయి. దీంతో ‘మళ్లీ వాళ్లు కూడా ఉద్యోగంలో నుంచి తొలగిస్తే మా పరిస్థితేంటి?’ అంటూ తమకు వచ్చిన అవకాశాలను సైతం దూరం చేసుకుంటున్నారు కొంతమంది. కానీ ఇప్పుడు తాత్కాలికంగా ఉన్న ఉద్యోగంలో చక్కటి ప్రతిభ కనబరిస్తే భవిష్యత్తులో అదే ఉద్యోగం శాశ్వతం కావచ్చేమో! అందుకే అనవసరమైన సాకులతో అవకాశాల్ని దూరం చేసుకోకుండా సానుకూల దృక్పథంతో ముందుకు సాగమంటున్నారు నిపుణులు. తద్వారా సమయం వృథా కాకుండా ఉంటుంది.. ఉద్యోగానుభవం కూడా సొంతం చేసుకోవచ్చు. వృత్తిలో మనం ఆర్జించిన ఈ అనుభవం ఎప్పటికీ వృథా కాదు.
ఆ నైపుణ్యాలు పెంచుకోవాల్సిందే!
ప్రస్తుతం కొన్ని చోట్ల మనుషులు చేసే కొన్ని పనుల్ని కూడా యంత్రాలు చేసేస్తున్నాయి. అది కూడా మనిషి కంటే వేగంగా! దాంతో ఆయా కంపెనీల యజమానులు ఉద్యోగుల కోసం అన్వేషించడం, ప్రత్యేకంగా వారికి జీతం చెల్లించాల్సిన అవసరం లేకుండా పోతోంది. ఇది రాబోయే రోజుల్లో మరింతగా పెరిగే అవకాశం ఉందంటున్నారు నిపుణులు. నిజంగా ప్రతి కంపెనీలో ఇలాంటి ఆటోమేషన్‌ పద్ధతి గనుక అందుబాటులోకి వస్తే నిరుద్యోగం పెరిగిపోయి ఇంతకంటే దారుణ పరిస్థితులు ఎదుర్కోవాల్సి వస్తుంది. అలాగని భయపడిపోకుండా అందుకోసం ఇప్పట్నుంచే సిద్ధం కమ్మంటున్నారు నిపుణులు. ఇలా మన భవిష్యత్తులో జరగబోయే మార్పుల గురించి అవగాహన తెచ్చుకొని ఆయా విషయాల్లో పరిజ్ఞానం పెంచుకోమని సలహా ఇస్తున్నారు.
ఇలా మీరు సంపాదించిన నైపుణ్యాలను ఉద్యోగాన్వేషణలో కీలక పాత్ర పోషించే రెజ్యుమేలో పొందుపరచడం వల్ల ఉద్యోగావకాశాలు మిమ్మల్ని వెతుక్కుంటూ వస్తాయి. ఒకవేళ ఆటోమేషన్‌ వల్ల మీ ఉద్యోగం పోయినా ఎలాగూ దాని గురించిన అవగాహన, అనుభవం మీకు ఉంటుంది కాబట్టి మీకు మీరే ఇతర ఉపాధి మార్గాల్ని అన్వేషించుకోగలుగుతారు. తద్వారా సంక్షోభంలోకి కూరుకుపోకుండా మిమ్మల్ని మీరు రక్షించుకోగలుగుతారు.
‘ఆన్లైన్’కు సిద్ధపడండి!
కరోనా వచ్చిన దగ్గర్నుంచి ఉద్యోగమైనా, ఉద్యోగ నియామకమైనా అంతా ఆన్‌లైన్‌లోనే జరుగుతోంది. అయితే ఇప్పటికే వర్క్ ఫ్రమ్ హోమ్, ఆన్లైన్ ముఖాముఖికి అలవాటు పడిన వారికి ఇది అంత కొత్తగా ఏమీ అనిపించకపోవచ్చు. కానీ మొదటిసారి ఆన్లైన్ ఇంటర్వ్యూకి హాజరుకావాలంటే ఏదో తెలియని బెరుకు, భయం ఉండడం కామనే! అలాగని ఇంటర్వ్యూకి అదే భయంతో హాజరైతే అందులో సక్సెస్‌ సాధించలేరంటున్నారు నిపుణులు. అందుకే ఆన్లైన్ ఇంటర్వ్యూలో సక్సెస్‌ కావాలంటే ఈ క్రమంలో గుర్తుంచుకోవాల్సిన అంశాలపై అవగాహన ఉండాలి.
ముందుగా ఇంటర్వ్యూకి పూర్తి స్థాయిలో సన్నద్ధమవడం, చక్కగా డ్రస్‌ చేసుకోవడం, ఎలాంటి అంతరాయం లేని చోట కూర్చోవడం, ఇంటర్వ్యూ చేసే వాళ్ల కళ్లలోకి సూటిగా చూస్తూ ఆత్మవిశ్వాసంతో సమాధానాలు చెప్పడం.. వంటివి అందులో ముఖ్యమైనవి. ఇక ప్రస్తుత పరిస్థితుల్లో ఉద్యోగం సంపాదించిన తర్వాత కూడా చాలా వరకు కంపెనీలు వర్క్ ఫ్రమ్ హోమ్ ఆప్షన్‌ ఇచ్చే అవకాశాలే ఎక్కువ! కాబట్టి ‘ఆన్‌లైన్‌లోనే కదా.. మమ్మల్ని ఎవరూ అడిగేవారు లేరు..’ అంటూ సమయం వృథా చేయడం కాకుండా.. చక్కటి పనితీరు కనబరిస్తే ఉద్యోగంలో రాణించవచ్చు. తద్వారా కరోనా వంటి సంక్షోభాలెన్నొచ్చినా మీ ఉద్యోగం పోతుందన్న భయం ఉండదు.
కరోనా ప్రతికూల పరిస్థితుల్ని ఎదుర్కొంటూ, కంపెనీల ఉద్యోగ నియామకాల తీరుతెన్నులను బట్టి మనమూ మారుతూ ఈ ఉద్యోగ సంక్షోభం నుంచి ఎలా గట్టెక్కాలో తెలుసుకున్నారు కదా! కాబట్టి వీటిని గుర్తుపెట్టుకొని ఫాలో అయితే ఎంతటి ప్రతికూలతల్నైనా సానుకూలంగా ఎదుర్కొనే ఓర్పు-నేర్పు మన సొంతమవుతుంది.. కాదంటారా?!