సంధ్య: 'హాయ్ వింధ్యా.. ఎలా ఉన్నావ్?'
వింధ్య: 'నేను కోరుకున్నట్లుగానే పాప పుట్టిందిగా.. చాలా హ్యాపీగా ఉన్నాను.. కానీ డెలివరీ అయి నాలుగు నెలలు కావస్తున్నా.. ఈ పొట్ట తగ్గట్లేదు.. ఏం చేయాలో అర్థం కావట్లేదు.'
సంధ్య: 'ఏం చేయాలేంటి.. నువ్వు అంతకుముందు వ్యాయామం చేసేదానివి కదా.. అప్పుడు ఎంత ఫిట్‌గా ఉండే దానివి. ఇప్పుడు కూడా ఓ సారి డాక్టర్‌ను సంప్రదించి ఎక్సర్‌సైజ్ చేయడం ప్రారంభించు..' క్రమం తప్పకుండా వ్యాయామం చేయడం వల్ల అటు శారీరకంగా.. ఇటు మానసికంగా.. ఫిట్‌గా తయారుకావచ్చన్న సంగతి తెలిసిందే. అయితే.. ప్రసవానంతరం కూడా సరైన ఎక్సర్‌సైజ్ ప్రారంభిస్తే మళ్లీ ఫిట్‌గా తయారయ్యే అవకాశం ఉంది. ఈ క్రమంలో బిడ్డ పుట్టిన తర్వాత వ్యాయామాలు చేయడం వల్ల కలిగే ప్రయోజనాలేంటో తెలుసుకుందాం..
వైద్య సలహా తప్పనిసరి!
బిడ్డకు జన్మనిచ్చిన తర్వాత కొందరు మహిళలు అవగాహనా లోపంతో వాళ్లిష్ట ప్రకారం, వాళ్లకు ఇష్టమొచ్చిన వ్యాయామాలు చేస్తుంటారు. ఇది వికటించిన వారికి విపరీతమైన బ్లీడింగ్, తలనొప్పి.. వంటి రకరకాల ఆరోగ్య సమస్యలు తలెత్తుతాయి. అందుకే ప్రసవానంతరం వ్యాయామం మొదలు పెట్టాలనుకుంటే మాత్రం.. ఎప్పుడు మొదలుపెట్టాలి? ఏయే వ్యాయామాలు చేయాలి? ఎంతసేపు చేయాలి? తదితర విషయాల్లో డాక్టర్ సలహా తీసుకోవడం తప్పనిసరి.
ప్రయోజనాలు..
* చాలామంది మహిళలకు ప్రసవం తర్వాత పొట్ట భాగంలో చర్మం వదులుగా తయారవుతుంది. ఇలాంటి వారు పొట్ట సంకోచించేలా గట్టిగా శ్వాస తీసుకోవడం, వదలడం లాంటి సులభమైన వ్యాయామం చేయాలి. ఇది సుమారు గంటసేపు చేయడం మంచిది. దీనివల్ల కండరాలు రిలాక్స్ అయి, పొట్ట భాగంలోని చర్మం బిగుతుగా తయారవుతుంది.
* ప్రెగ్నెన్సీ సమయంలో చాలామంది మహిళలు బరువు పెరగడం సర్వసాధారణం. కాబట్టి వ్యాయామం వల్ల శరీరంలోని క్యాలరీలు తగ్గి తద్వారా బరువు తగ్గే అవకాశం ఉంది.
* ప్రసవానంతరం శరీరంలోని అవయవాలు కాస్త బలహీనంగా, సెన్సిటివ్‌గా తయారవుతాయి. కాబట్టి బరువులెత్తడం, వేగంగా చేసే పనులు.. మొదలైనవి చేయకపోవడం మంచిది. అలాగే బిడ్డ పుట్టిన తర్వాత ఫిట్‌గా తయారవడానికి వాకింగ్ చేయడం మాత్రం మరచిపోవద్దు. ముందు నుంచి వెనక్కు, వెనక నుంచి ముందుకు, జిగ్‌జాగ్‌గా.. ఇలా అన్ని రకాలుగా నడిస్తే మరింత ప్రయోజనం చేకూరుతుంది. వాకింగ్ చేసేటప్పుడు కాస్త వంగినట్లుగా కాకుండా నిటారుగా నడవాలి. మీ బేబీని ముందు కట్టుకుని ఈ వ్యాయామం చేస్తే మరింత మంచి ఫలితం ఉంటుంది.
* ప్రసవానంతరం చాలామంది మహిళల్లో శక్తిస్థాయులు తగ్గిపోతాయి. ఫలితంగా నీరసపడిపోతారు. మళ్లీ వారి శరీరానికి శక్తి అందాలంటే వ్యాయామం చేయడం తప్పనిసరి.
* తల్లయిన తర్వాత కొందరు మహిళలు పలు రకాల కారణాల వల్ల ఒత్తిడికి గురవుతుంటారు. ఏదో తెలియని భయంతో ఉంటారు. వ్యాయామం చేయడం వల్ల శారీరకంగా, మానసికంగా దృఢవంతులై ఆయా సమస్యల నుంచి ఉపశమనం లభిస్తుంది. అలాగే అటు శారీరకంగానూ.. ఇటు మానసికంగానూ ప్రశాంతత చేకూరుతుంది.
* పాపాయికి తల్లిపాలే శ్రేష్టం కాబట్టి బాలింతల్లో పాల ఉత్పత్తిని పెంచడానికి వ్యాయామం ఉపయోగపడుతుంది.
* వ్యాయామం వల్ల రాత్రుళ్లు నిద్ర బాగా పట్టే అవకాశమూ ఉంది.
* ప్రసవానంతరం కొంతమంది మహిళల్లో నడుంనొప్పి, కాళ్లనొప్పులు.. వంటివి వస్తాయి. అలాంటప్పుడు వ్యాయామమే ఈ సమస్యలకు తగిన పరిష్కారం చూపుతుంది.
అయితే ముందు చెప్పుకున్నట్లుగా.. ప్రసవానంతరం వ్యాయామాలు ఎప్పుడు ప్రారంభించాలి; ఎలాంటి వ్యాయామం ఎంతసేపు చేయాలన్న విషయంలో మాత్రం వైద్యుని సంప్రదించిన తర్వాత మాత్రమే నిర్ణయం తీసుకోవాలి.