నువ్వు నాకు నచ్చావ్‌ సినిమాలో హీరో వెంకటేష్‌ భోజనానికి ముందు చేసిన ప్రార్థన సన్నివేశాన్ని తెలుగు ప్రేక్షకులెప్పటికీ మర్చిపోరు. ‘దేవుడా.. ఓ మంచి దేవుడా !’ అంటూ మొదలుపెట్టి ప్రపంచంలోని అందరికీ బ్రెడ్డు, బటరు, జామ్‌.. ఇలా ఏదుంటే అదివ్వమని ఆయన పండించిన హాస్యం అందరికీ ఆల్‌టైం ఫేవరెట్‌ సన్నివేశమనే చెప్పాలి. అయితే ఇంత అమాయకంగా నిజజీవితంలో ఎవరైనా ప్రార్థన చేస్తారా ? అంటే... పెద్దవాళ్లెవరూ అలా చేయకపోవచ్చు.. కానీ ముద్దులొలికే పిల్లలు మటుకు తప్పకుండా అలానే ప్రార్థిస్తారని చెప్పాలి. అందుకు ఉదాహరణే ఇప్పుడు మీరు తెలుసుకోబోయే బుడతలు. ఒకరేమో ‘దేవుడా మాకంత శక్తినివ్వు..’ అంటూ స్కూల్‌లో ఓ వైపు ప్రార్థన చదువుతూ.. మరోవైపు ఎంచక్కా చేతిలో ఉన్న లాలీపాప్‌ను లాగించేస్తుంటే... మరొకరు భోజనానికి ముందు అచ్చం వెంకీని గుర్తుకు తెస్తూ ముద్దుముద్దుగా పలికారు. ప్రస్తుతం సామాజిక మాధ్యమాల్లో ఈ చిన్నారుల చిలిపి ప్రార్థనలు వైరల్‌ అవుతుండగా.. వీటిని చూసిన ప్రతి ఒక్కరూ తమ బాల్యాన్ని గుర్తు తెచ్చుకుంటున్నారు. మరి వీరి ప్రార్థనలను మీరూ ఓసారి ఆలకించండి !

ఎంబీఏ ద్వారా ఉద్యోగం సంపాదించాలనుకునే విద్యార్థులకు ఓ గుడ్‌ న్యూస్‌ ! ప్రస్తుతం ఉద్యోగావకాశాలు ఎక్కువగా కలిగిన విద్య ఎంబీఏనే అని తేలింది. అయితే తమ పిల్లల భవితవ్యాన్ని ఇంజినీరింగ్‌, ఐటీ రంగాల్లో కాంక్షించే తల్లిదండ్రులకు మటుకు ఓ షాకింగ్‌ న్యూస్‌ ! రాను రాను ఈ రంగాల్లో ఉద్యోగావకాశాలు తగ్గిపోతున్నాయట. ఇలా అంటోంది ఎవరో కాదు. ఇండియా స్కిల్స్‌ రిపోర్ట్‌ 2020 ! యువతలో సగం కన్నా తక్కువ మందిలో ఉద్యోగానికి కావాల్సిన నైపుణ్యం ఉంటే, వారిలో అధిక భాగం ఎంబీఏ చదివిన వారికే ఎక్కువ ఉద్యోగాలు లభిస్తున్నాయట. అంతేనా.. రానున్న కాలంలో మహిళా ఉద్యోగుల శాతం పెరుగుతుంటే.. పురుషుల శాతం తగ్గుతోందట ! మరి ఈ సర్వే ఇంకా ఎలాంటి ఆశ్చర్యకర విషయాలు చెప్పిందో ఓసారి చూద్దాం రండి !

పిల్లల్ని పెంచడం అంటే మనం పడ్డ కష్టాన్ని వారికి తెలియకుండా పెంచడం కాదు... మనం పడ్డ కష్టం విలువ తెలిసేలా వారిని పెంచడం అంటారు మానసిక నిపుణులు. ఇలా బాల్యం నుంచే వారికి ఏది అవసరమో ఏది అనవసరమో చెప్పగలిగితే పెద్దైన తర్వాత అటు పేరంట్స్‌లోనూ, ఇటు పిల్లల్లోనూ... ఇద్దరిలోనూ కన్‌ఫ్యూజన్‌ ఉండదంటున్నారు. అయితే అలా చెప్పగలగడం చాలా కష్టమైన పని. కొన్నిసార్లు పిల్లలకు అర్థమయ్యేలా చెప్పాలంటే తల్లిదండ్రులే పిల్లల్లా మారాల్సి ఉంటుంది. మరికొన్నిసార్లు సున్నితంగా ఉంటూనే కఠినంగా వ్యవహరించాల్సి ఉంటుంది. ఈ విషయాన్ని బాగా అర్థం చేసుకున్నారు కాబట్టే ఇప్పుడు మీరు తెలుసుకోబోయే తల్లిదండ్రులు అందరికీ ఆదర్శంగా నిలుస్తున్నారు. ఒక చోట తన కూతురు రోలర్‌ కోస్టర్‌ (గాల్లో పేర్చిన ఇనుప కడ్డీలపై వేగంగా వెళ్లే ట్రెయిన్‌)ఎక్కించమని మారాం చేస్తే దాన్నే ఇంట్లో టీవీ పెట్టి చూపించాడు ఓ తండ్రి ! మరో చోట తమ పిల్లలు విహార యాత్రకు రానన్నారని ఇంట్లోని మోడెమ్‌ (ఇంటర్నెట్‌ పరికరం)ను తమ వెంట తీసుకెళ్లారు ఓ తల్లిదండ్రులు. వినడానికే వింతగా ఉన్నాయి కదూ ! కానీ వారలా చేయడం వెనుక అర్థం లేకపోలేదు. అదేంటో చూద్దాం రండి !

నిత్యం బిజీగా ఉండే సినీతారలు కూడా కాస్త ఖాళీ దొరికితే చాలు.. డిజిటల్‌ మీడియా ద్వారా తమ ఫ్యాన్స్‌కు కొత్త కొత్త విషయాలు నేర్పడానికి ఆసక్తి చూపిస్తుంటారు. ఈ క్రమంలోనే యూట్యూబ్‌ ఛానల్స్‌ ప్రారంభించి.. వీడియోల రూపంలో ఎన్నో విషయాలు తెలియజేస్తుంటారు. అయితే తాజాగా ఈ జాబితాలో చేరిపోయింది నటి మంచు లక్ష్మి. ‘చిట్టి చిలకమ్మ’ పేరుతో తాను ప్రారంభించిన యూట్యూబ్‌ ఛానల్‌లో తన కూతురు విద్యా నిర్వాణను కూడా భాగం చేస్తుందీ అందాల అమ్మ. తన ఛానల్‌లో భాగంగా పిల్లల పెంపకంలో ఎలాంటి సమస్యలు ఎదురవుతాయి, వాటిని ఎలా అధిగమించాలి.. వంటి పేరెంటింగ్‌ పాఠాలపై వీడియోలను రూపొందించబోతున్నట్లు, ఈ క్రమంలో వారానికి ఒక్కో అంశం చొప్పున ఒక్కో వీడియోను విడుదల చేయనున్నట్లు సోషల్‌ మీడియా ద్వారా చెప్పుకొచ్చిందీ బ్యూటిఫుల్‌ మామ్‌.

అప్పుడప్పుడే మాటలు నేర్చుకొంటున్న చిన్నారులు పాఠశాలకు వెళ్లేంతవరకు కుటుంబ సభ్యుల మధ్యే ఉంటారు. దీంతో తల్లిదండ్రులు, ఇంట్లో వాళ్లు ఏ భాష మాట్లాడితే దాన్నే అనుసరిస్తుంటారు. పాఠశాలకు వెళ్లడం మొదలుపెట్టిన తర్వాత ఆంగ్లం, హిందీ వంటి భాషలను సైతం తమ సిలబస్‌లో భాగంగా నేర్చుకొంటారు. ఈ క్రమంలో కొందరు తాము నేర్చుకొన్న భాషల్లో రాయడం, చదవడం వరకు మాత్రమే పరిమితమైతే.. మరికొందరు వాటిలో అనర్గళంగా మాట్లాడే నైపుణ్యాన్ని సంపాదించగలుగుతారు. ఇలా ఒకటి కంటే ఎక్కువ భాషలు మాట్లాడగలిగే చిన్నారుల్లో.. మెదడు చాలా చురుగ్గా పనిచేయడంతో పాటు.. ఎక్కువ విషయాలు గుర్తుపెట్టుకొనే సామర్థ్యం పెరుగుతుందని చెబుతున్నారు నిపుణులు.

కాల గమనంలో మరో ఏడాది గతించిపోయింది. ఎన్నో కొత్త ఆశలతో కొత్త దశాబ్దాన్ని మొదలుపెట్టాం. మరి గత సంవత్సరం చేసిన తప్పులను వదిలేస్తూ... ఈ ఏడాది తీసుకోబోయే నిర్ణయాలపట్ల ప్రతి ఒక్కరూ ఎంతో కొంత స్పష్టతతో ఉండే ఉంటారు. దీని కోసం నూతన సంవత్సరం ఏం చేయాలనే ఓ జాబితాను కూడా తయారు చేసుకుంటారు. దీన్నే మనం ‘కొత్తేడాది తీర్మానాలు’ (న్యూ ఇయర్‌ రిజల్యూషన్స్‌)గా పిలుచుకుంటుంటాం. అయితే పెద్దలకు తీర్మానాలు తీసుకునే విచక్షణ ఉంటుంది కాబట్టి ఎలాంటి సమస్య ఉండదు. మరి చిన్నారుల పరిస్థితి ఏమిటి?వారిని పెంచే పెద్దలదే ఆ బాధ్యత అని చెప్పడంలో ఎలాంటి సందేహం లేదు. ఈ క్రమంలో తమ కోసం తీర్మానాలు తీసుకునే పెద్దలు... పిల్లల కోసం కూడా కొన్ని కొత్త నిర్ణయాలు తీసుకోవాల్సిన సమయం ఇది. మరి ఆ నిర్ణయాలు ఏంటో తెలుసుకుందామా..?

మనిషి తన సౌకర్యవంతమైన, విలాసవంతమైన జీవనం కోసం ప్రకృతిని నాశనం చేస్తున్నాడు. భూమిపై బతికే మిగతా జీవుల్లాగా తానూ ఓ జీవిననే విషయం మర్చిపోయి ఆధునికత పేరుతో పర్యావరణానికి హాని చేస్తున్నాడు. స్వచ్ఛమైన గాలి, నీరు, నేల.. లాంటివి లేకుండా భవిష్యత్‌ తరాలు ఎలా బతుకుతాయనే కనీస ఆలోచన కూడా లేకుండా ప్రకృతి వనరులను నాశనం చేస్తున్నాడు. వీటి వల్ల జరిగే నష్టాలపై ప్రజల్లో అవగాహన పెంచి పర్యావరణాన్ని రక్షించుకునేందుకు ఎంతోమంది నాయకులు, స్వచ్ఛంద సంస్థలు.. కొన్ని సంవత్సరాలుగా ప్రయత్నిస్తున్నాయి. ఈ క్రమంలో పర్యావరణ పరిరక్షణ కోసం తన చదువును కూడా త్యాగం చేసి ఉద్యమ బాట పట్టింది స్వీడెన్‌కు చెందిన 16 ఏళ్ల గ్రెటా థున్‌బర్గ్‌. అంతేకాదు, ‘స్కూల్‌ స్ట్రైక్‌ ఫర్‌ ది క్లైమేట్‌’ పేరుతో ఓ ఉద్యమాన్ని మొదలుపెట్టి మేధావులు సైతం హర్షించే విధంగా దానికి సారథ్యం వహిస్తోంది. ఈ గమనంలో తను ఎన్నో రకాల సవాళ్లను ఎదుర్కొంటోంది. అయినా వాటిని లెక్క చేయకుండా సమస్యపై నిజాయతీగా పోరాడుతోంది. ఈ నేపథ్యంలో పర్యావరణహితం కోరి తను చేస్తోన్న కృషికి గాను 2019 నోబెల్‌ శాంతి పురస్కారానికి గ్రెటాను నామినేట్‌ చేసిన సంగతి విదితమే. ఈ క్రమంలో గ్రెటా గురించి తన తండ్రి ఇటీవలే ఓ ఆంగ్ల టీవీ ఛానల్‌తో సంభాషించారు. ఈ ఇంటర్వ్యూలో భాగంగా ఆయన తన కూతురి భవిష్యత్తు గురించి ఆందోళన వ్యక్తం చేయడం గమనార్హం.

ఇంట్లో పనిమనిషికి బదులు ఓ రోబో ఉంటే ఎలా ఉంటుంది? ఇల్లు ఊడవడం దగ్గర నుంచి ఆహారం అందివ్వడం వరకు అన్నీ అదే చూసుకుంటుంది. అయితే మన ఆజ్ఞను శిరసావహించే ఆ మరమనుషులు మనల్నే ఆజ్ఞాపిస్తే... ఇది తినకూడదు, అటు వెళ్లకూడదు అని మన జీవితాలను నియంత్రిస్తే... మనం సృష్టించిన యంత్రాల కింద మనమే బానిసలుగా బతకాల్సిన పరిస్థితి వస్తుంది. ఇది హాలీవుడ్‌ చిత్రం ‘ఐ రోబో’ సారాంశం. శంకర్‌ సృష్టించిన ‘రోబో’ కూడా ఇదే చెబుతోంది. ఆర్టిఫిషియల్‌ ఇంటెలిజెన్స్‌ వల్ల కలిగే నష్టాలను ముందే ఊహించిన సదరు దర్శకులు ఆ చిత్రాలను రూపొందించి విజయం సాధించారు. అయితే ఇలా నిజ జీవితంలో సాధ్యమా? అంటే.. జరగొచ్చు అని నిరూపిస్తోంది ఓ సంఘటన. గుండెకు సంబంధించిన విషయం గురించి పరిశోధించే ఓ మహిళ ‘అలెక్సా’ (పోర్టబుల్‌ స్మార్ట్‌ స్పీకర్‌)ను ఓ ప్రశ్న అడగ్గా.. భూమికి భారం తగ్గాలంటే ఆమెను చచ్చిపోమని చెప్పిందట. అలా ఎలా చెప్పింది ? అనుకుంటున్నారా... అయితే వివరాల్లోకి వెళ్దాం రండి !

అజ్ఞానానికి సంకేతం... అనర్థాలకు మూలం చీకటి. కంటికి వెలుగు కనబడకపోవడమే చీకటి కాదు. మస్తిష్కం విచక్షణా జ్ఞానాన్ని కోల్పోవడం కూడా చీకటే ! ఈ చీకటే ప్రపంచంలోని చాలా అనర్థాలకు... ముఖ్యంగా ఆడవారిపై జరిగే అఘాయిత్యాలకు కారణంగా నిలుస్తోంది. ఎన్నో ఏళ్లుగా దిశ వంటి ఎందరో స్త్రీల జీవితాలను ఈ చీకటి తన అజ్ఞానాంధకార గుప్పిట్లో బంధిస్తున్న విషయం మనందరికీ తెలిసిందే. ఇటీవల ఈ చీకటి మరింత వ్యాప్తి చెందుతుండడంతో సమాజంలోని బాహ్య చీకటిని, మనిషిలోని అంత: చీకటిని తొలగించేందుకు కంకణం కట్టుకున్నాయి కొన్ని ప్రభుత్వాలు. అందులో ముందుంటోంది దిల్లీ ప్రభుత్వం. ఇందుకు నిదర్శనమే దిల్లీ ముఖ్యమంత్రి కేజ్రీవాల్‌ బాలురతో చేయించిన ఈ ప్రతిజ్ఞ.

పిల్లల్ని కనడమే కాదు. వారి భవిష్యత్తుని అందంగా తీర్చిదిద్దడం తల్లిదండ్రుల బాధ్యత. అందుకే అన్ని విషయాల్లో ‘నా కొడుకే ఫస్ట్‌ రావాలి,’ ‘నా కూతురే టాపర్‌గా నిలవాలి’ అని చాలామంది పేరెంట్స్‌ కోరుకుంటుంటారు. ఇందుకోసం ఒక్కొక్కరూ ఒక్కో శైలిని అనుసరిస్తుంటారు. పిల్లలను పెంచే విధానంలోనూ ఎన్నో జాగ్రత్తలు తీసుకుంటారు. ఈ నేపథ్యంలో వారికి నియమ నిబంధనలు సైతం విధిస్తూ ఉంటారు. ఈ క్రమంలో తమ కూతురిని ఓ ప్రొఫెషనల్‌ టేబుల్‌ టెన్నిస్‌ ప్లేయర్‌గా తీర్చిదిద్దేందుకు చైనాకు చెందిన తల్లిదండ్రులు ఏం చేశారో మీరే చూడండి.

ప్రపంచంలో ఎవరి ప్రేమకైనా ప్రత్యామ్నాయం దొరుకుతుందేమో కానీ..అమ్మ ప్రేమకు మాత్రం దొరకదంటారు. పుట్టుకతోనే మనకు ప్రేమను పరిచయం చేసే ఆమె స్థానాన్ని మరెవరితోనూ భర్తీ చేయలేరన్నది జగమెరిగిన సత్యం. ఇక పసి పిల్లలకు తల్లి అవసరం ఎలాంటిదో ప్రత్యేకంగా చెప్పక్కర్లేదు. తండ్రి కనిపించకపోయినా ..అంతగా ఆందోళన చెందరు కానీ..ఒక్క క్షణం తల్లి కనిపించకపోతే గుక్కపట్టి ఏడుస్తారు. ఆ సమయంలో వారి ముందు తల్లి అలా ప్రత్యక్షమైతే చాలు..ఒక్కసారిగా ఏడుపు ఆపేస్తారు. తల్లి , పిల్లల మధ్య ఉన్న అనుబంధం అలాంటిది. అయితే తాను ఎదురుగా లేనప్పటికీ..తన పిల్లాడి మోములో చిరునవ్వు చెదరకుండా ఉండేందుకు జపాన్‌కు చెందిన ఓ మహిళ సరికొత్త ప్రయోగాన్ని అమలు చేసింది.

‘అమ్మాయిల డ్రస్సింగ్‌ సెన్స్‌ గురించి మాట్లాడుకునే బదులు అబ్బాయిల కామన్‌ సెన్స్‌ గురించి మాట్లాడుకుందాం’... ఓ ప్రసంగంలో ఓ మహిళ అన్న మాటలివి. ప్రియాంక రెడ్డి హృదయ విదారక ఉదంతంలో చాలామంది నెటిజన్లు విచారం వ్యక్తం చేస్తూ, అమ్మాయిలు రాత్రి వేళ బయటకి వెళ్లకపోవడమే మంచిది అంటున్నారు. నిజంగా అమ్మాయిలు రాత్రి పూట బయటకి వెళ్లడం వల్లే ఇటువంటి ఘోరాలు జరుగుతున్నాయా ? సమాజంలో నిత్యం స్త్రీలపై జరుగుతున్న అఘాయిత్యాలకు మూల కారణం స్త్రీనే అన్న ప్రచారం ఎప్పటి నుంచో జరుగుతోంది. ఇందులో భాగంగానే చాలామంది తల్లిదండ్రులు కూడా అత్యాచారాల విషయంలో అమ్మాయిలతోనే ఎక్కువగా మాట్లాడుతున్నారట ! కానీ అబ్బాయిలకు అమ్మాయిలతో ఎలా నడుచుకోవాలో తెలపడం లేదట. అందుకే చాలామంది అబ్బాయిలు రేప్‌ కల్చర్‌లో భాగమవుతున్నారు. రేప్‌ కల్చర్‌ అంటే భౌతిక దాడి మాత్రమే కాదు. తమ పరుష పదజాలంతో మహిళల మనోభావాలు దెబ్బతీయడం, డేటింగ్‌లో ఎమోషనల్‌ బ్లాక్‌ మెయిలింగ్‌ చేయడం వంటివి కూడా రేప్‌లో భాగమే. అటు విద్యలోనూ ఇటు ఆర్థికంగానూ అగ్రగామి అనిపించుకున్న అమెరికాలో సైతం ప్రతి ముగ్గురు స్త్రీలలో ఒకరు ఇలా రేప్‌కు గురవుతున్నారంటే నేటి సమాజంలో ఆడవారి పరిస్థితి ఏ రకంగా ఉందో అర్థం చేసుకోవచ్చు. ఇక భారత్‌లో అయితే ఏటా పాతిక వేలకు పైగానే రేప్‌ కేసులు నమోదవుతుండగా అనధికారికంగా ఎందరో అమ్మాయిలు అత్యాచారానికి గురవుతున్నారు. మరి ఇటువంటి దారుణ పరిస్థితులకు కారణం ఎక్కడుంది ? అసలు ఈ రేప్‌ కల్చర్‌ని అంతమొందించడం ఎలా ? తెలుసుకుందాం రండి !

పిల్లల మేధస్సుకు పదును పెట్టే ఆట వస్తువుల్లో రూబిక్స్‌ క్యూబ్‌ ఒకటి. పిల్లలకే ఏంటి.. పెద్దలకు కూడా అని చెప్పొచ్చు. ఎవరికైనా ఒక్కసారి దీన్ని పూర్తి చేస్తే చాలు.. ‘నేనో పెద్ద మేధావిని’ అనే ఫీలింగ్‌ వచ్చేస్తుంది. అందుకే చాలామంది పట్టువదలని విక్రమార్కుడిలా గంటల తరబడి, రోజుల తరబడి దీంతో కుస్తీ పడుతుంటారు. భేతాళ ప్రశ్న లాంటి దీన్ని సాల్వ్‌ చేయడం పెద్దలకే చాలా కష్టం. అటువంటిది ఈ చిన్నారి అవలీలగా రూబిక్స్‌ క్యూబ్‌ని పూర్తి చేసి ‘వరల్డ్స్‌ యంగెస్ట్‌ జీనియస్‌’ అనిపించుకుంది. అది కూడా మామూలుగా కాదు.. కళ్లకు గంతలు కట్టుకొని, పద్యాలు చదువుతూ !