‘మహానటి’ కీర్తి సురేశ్‌ నేడు తన పుట్టిన రోజు జరుపుకుంటోంది. ఈ సందర్భంగా సూపర్‌ స్టార్‌ మహేష్‌ దంపతులు, నటి మీనా తదితరులు తనకి పుట్టినరోజు శుభాకాంక్షలు తెలిపారు.

అందాల భామ పార్వతీ నాయర్‌ చీరకట్టులో మెరిసిపోతోన్న ఫొటోలను పోస్ట్‌ చేసింది. దీనికి ‘ఇండియాలో ఉన్నప్పుడు సీజన్లతో పని ఉండదు. ఎందుకంటే ఇక్కడ సంవత్సరమంతా వేడిగానే ఉంటుంది. కాబట్టి ఫ్లోరల్స్‌ ధరించడానికి స్ప్రింగ్‌ సీజన్‌ కోసం వేచి చూడకండి. నాకు చీరలంటే అంటే చాలా ఇష్టం. అందుకే ప్రతిరోజూ చీర కట్టుకోవడానికే ప్రాధాన్యం ఇస్తుంటాను. మరి మీరు కూడా అంతేనా?’ అంటూ అభిమానులను అడుగుతోందీ తార.

కన్నడ భామ ప్రణీత లాక్‌డౌన్‌ సమయంలో దిగిన ఓ ఫొటోని పోస్ట్‌ చేసింది. ‘ఇది మెజెస్టిక్ బస్టాండ్‌. ఎక్కడ చూసినా నిర్జీవంగా ఉంది. నిత్యం ప్రయాణికులు, బస్సులతో రద్దీగా ఉండేది. ఇంతకుముందెన్నడూ ఇలా చూడలేదు. ఇకముందు కూడా ఇలా చూడకూడదని కోరుకుంటున్నాను’ అని రాసుకొచ్చిందీ భామ. అంతేకాదు.. దీనికోసం పర్మిషన్‌ తీసుకున్నానని గుర్తు చేసింది.

‘ఎక్కడికి పోతావు చిన్నవాడా’ సినిమాతో తెలుగు ప్రేక్షకులకు పరిచయమైంది నటి నందితా శ్వేత. ఈ సినిమాలో దెయ్యం పాత్రలో కనిపించి ప్రేక్షకులను భయపెట్టడంతో పాటు తన అందంతో మెస్మరైజ్‌ చేసింది. ‘శ్రీనివాస కళ్యాణం’, ‘బ్లఫ్‌ మాస్టర్‌’ చిత్రాలతో తెలుగు ప్రేక్షకులకు మరింత చేరువైందీ కన్నడ బ్యూటీ. ఇక తెలుగుతో పాటు తమిళ చిత్రాల్లోనూ నటిస్తోన్న నందిత సోషల్ మీడియాలో చాలా యాక్టివ్‌గా ఉంటుంది. తన సినిమాకు సంబంధించిన విశేషాలతో పాటు ఫొటోలను ఎప్పటికప్పుడు సామాజిక మాధ్యమాల ద్వారా అభిమానులతో పంచుకుంటుంది. ఈక్రమంలోనే తాజాగా నందిత ఓ ఫొటోను పోస్ట్‌ చేసింది. చేతిలోని పువ్వును తదేకంగా చూస్తున్న ఓ బ్లాక్‌ అండ్‌ వైట్‌ ఫొటోను పోస్ట్‌ చేస్తూ ‘మిమ్మల్ని మీరు ఒక పువ్వులా భావించండి..! ప్రతిరోజూ కొత్తగా అనిపిస్తుంది.,!’ అనే క్యాప్షన్‌ను జోడించింది. ఇక మరో ఫొటోను పోస్ట్‌ చేసిన నందిత ‘మీరు చేయాలనుకుంటున్న దానిపైనే దృష్టి పెట్టండి. ఇతరులు ఏం చేస్తున్నారన్న దానిపై కాదు..!’ అని రాసుకొచ్చింది.