మొన్నటి వరకు ‘అంగూర్లు.. అరటి పండ్లు..’ అంటూ నోరుపోయేలా అరిచినా ఎవరూ వినేవారే లేరు.. ఇప్పుడు ఆమె గొంతెత్తి పాడితే చెవులు రిక్కించి విననివారుండరు! 64 ఏళ్ల కనకవ్వ పాడిన మేడారం జాతర పాటకు 65 లక్షలమంది అభిమానులు ఉండటం విశేషం...

శివసత్తుల పూనకాలు, పొర్లు దండాలు, బెల్లం ఘుమఘుమలు, బంగారం(బెల్లం) మొక్కులు.. వెరసి గిరిజన సంస్కృతీ సంప్రదాయాలకు అద్దం పట్టే వనదేవతల పండగే మేడారం సమ్మక్క-సారలమ్మ జాతర. కోరుకున్న కోర్కెలు తీర్చి భక్తుల కొంగు బంగారంగా విలసిల్లే ఈ జాతరకు రంగం సిద్ధమైంది. ప్రపంచంలోనే అతి పెద్ద గిరిజన జాతరగా ఖ్యాతి గాంచిన ఈ జాతరకు తెలంగాణవ్యాప్తంగానే కాదు.. దేశవిదేశాల నుంచీ కోట్ల సంఖ్యలో భక్తులు తరలివస్తారు.. అమ్మల ఆశీర్వాదాలు అందుకుంటారు.. భక్తి పారవశ్యంలో మునిగితేలుతారు. రెండేళ్లకోసారి జరిగే ఈ పండగకు ఎప్పటిలాగే ఈసారి కూడా పెద్ద సంఖ్యలో భక్తులు తరలివస్తుండడంతో అమ్మల వనమంతా జనసంద్రంగా మారిపోయింది. తెలంగాణ రాష్ట్ర పండగగా గుర్తింపు పొందిన ఈ జాతర ఈ ఏడాది ఫిబ్రవరి 5 నుంచి 8 వరకు జరగనుంది. ఈ నేపథ్యంలో మేడారం జాతరకు సంబంధించిన కొన్ని విశేషాలు మీకోసం..

మేడారం జాతర జరిగినప్పుడల్లా జనసంద్రం పోటెత్తుతుంది... భక్తులు గద్దెల ముందు తన్మయత్వంతో సాగిలపడతారు... అంతేనా.. కొందరైతే ఆ అమ్మలగన్న అమ్మల సన్నిధిలో మాతృమూర్తులవడానికే ప్రత్యేకంగా తరలివస్తారు... వారి కోసమే మేడారంలో ప్రత్యేకంగా లేబర్‌ రూం ఏర్పాటైంది... అప్పుడే కళ్లు తెరిచిన తమ సంతానానికి భక్తి పారవశ్యంతో సమ్మక్క, సారలమ్మ, జంపన్నల పేర్లు పెట్టుకొని మురిసిపోతారు.