నడక నేర్పించిన నాన్నను సొంతూరికి చేర్చేందుకు ఎవరూ చేయని సాహసం చేసింది బిహార్‌కు చెందిన జ్యోతి కుమారి. లాక్‌డౌన్‌ కాలంలో ఒకటి కాదు...రెండు కాదు ఏకంగా 1,200 కిలోమీటర్ల పాటు తండ్రిని వెంటపెట్టుకుని సైకిల్‌ తొక్కిన ఆ బాలిక అసామాన్య ధైర్యంపై దేశ ప్రజలంతా ప్రశంసల వర్షం కురిపిస్తున్నారు. ప్రొఫెషనల్‌ అథ్లెట్లకు కూడా సాధ్యం కాని విధంగా ఏడు రోజుల సుదీర్ఘ ప్రయాణం చేసిన జ్యోతిపై భారత సైక్లింగ్‌ ఫెడరేషన్‌ కూడా ప్రశంసలు కురిపించింది. అంతేకాదు తనకు సైక్లింగ్‌లో ఉచితంగా శిక్షణ కూడా అందించేందుకు ముందుకొచ్చింది. గాయపడిన తండ్రిని కాపాడుకోవాలనే తాపత్రయంలో జ్యోతి చేసిన సాహసానికి అమెరికా అధ్యక్షుడు డొనాల్డ్‌ ట్రంప్‌ కూతురు ఇవాంకా ట్రంప్‌ కూడా ముగ్ధురాలయింది. ఈ మేరకు ట్విటర్‌ వేదికగా ఆ బాలికపై ప్రశంసల వర్షం కురిపించింది.

కరోనా ప్రభావంతో బడుగు జీవుల బతుకు ప్రశ్నార్థకమైంది. పొట్ట నింపుకోవడానికి వివిధ పట్టణాలకు వలస వెళ్లిన కార్మికులు పనులు దొరక్క పస్తులుంటున్నారు. దాతలు అందించే అన్నపానీయాలతోనే రోజూ కడుపు నింపుకొంటున్న ఆ కూలీలు గత్యంతరం లేక సొంతూళ్లకు పయనమవుతున్నారు. చేతిలో చిల్లిగవ్వ లేకపోవడంతో వేలాది కిలోమీటర్ల దూరంలో నున్న స్వస్థలాలకు కాలినడకన వెళుతున్నారు. ప్రభుత్వం శ్రామిక్‌ రైళ్లను నడుపుతున్నా కాలినడకన వెళ్లే వారి సంఖ్య ఏ మాత్రం తగ్గడం లేదు. అలా ఓ 15 ఏళ్ల ఆడకూతురు గాయపడిన తన తండ్రిని సైకిల్‌పై కూర్చోబెట్టుకుని దిల్లీ నుంచి బిహార్‌ వరకు ప్రయాణించింది. ఒకటి కాదు...రెండు కాదు ఏకంగా 1200కిలోమీటర్లు సైకిల్ తొక్కుకుంటూ ప్రయాణం సాగించిన ఆ తండ్రీకూతుళ్లు ఎట్టకేలకు సొంతగూటికి చేరుకున్నారు.

రంజాన్‌ మాసంలో ఉపవాసం (రోజా) పాటించే ముస్లింలు ఎక్కువగా బయట తిరగరు. ఏదైనా అవసరమొచ్చి బయటకు వెళ్లినా త్వరగా పనులు ముగించుకుని ఇంటికి చేరుకుంటారు. ఈ మాసమంతా ఇంట్లోనో, మసీదులోనో ప్రార్థనలు చేస్తూ, ఖురాన్‌ను పఠిస్తూ ఉంటారు. ఈనేపథ్యంలో ఉపవాసం పాటిస్తూనే చురుగ్గా సేవా కార్యక్రమాల్లో పాల్గొంటోంది దిల్లీకి చెందిన ఇమ్రాన్‌సైఫీ. కరోనా తెచ్చిన కష్టకాలంలో తన వంతు బాధ్యతగా పరిశుభ్రతపై ప్రజలకు అవగాహన కల్పిస్తూ ఇళ్లు, గుళ్లు, మసీదులు, గురుద్వారాల్లో స్వయంగా శానిటైజర్‌ స్ర్పే చేస్తోంది. ముస్లింలు సంప్రదాయంగా ధరించే బుర్ఖాతోనే పరిసరాలన్నింటినీ పరిశుభ్రం చేస్తోందీ సూపర్‌వుమన్‌. మరి కరోనా మహమ్మారిపై తనదైన పోరు సాగిస్తున్న ఈ యోధురాలి గురించి కొన్ని ఆసక్తికర విషయాలు తెలుసుకుందాం రండి.

కరోనా వైరస్‌తో ప్రపంచం స్తంభించిపోయింది. లాక్‌డౌన్‌ కారణంగా ఎవరికి వారే స్వయంగా ‘సెల్ఫ్‌ ఐసోలేషన్‌’ పాటిస్తూ ఇంట్లోనే బంధించుకోవాల్సిన పరిస్థితి ఏర్పడింది. ఇక చాలామంది వారాలకు వారాలు ఇంట్లో ఉండి ఏం చేయాలో తెలియక తలలు పట్టుకుంటున్నారు. ఇదే సమయంలో చాలామంది వలస కార్మికులు ఉపాధి కోల్పోయి రోడ్డున పడ్డారు. ఉండడానికి గూడు, తినడానికి కూడు లేక దాతల సహాయం కోసం కళ్లు కాయలు కాచేలా ఎదురుచూస్తున్నారు.

సుమారు ఏడేళ్ల సుదీర్ఘ నిరీక్షణ అనంతరం ‘నిర్భయ’ దోషులు ఉరికంబం ఎక్కారు. ఆ ఆరుగురు కీచకులకు మరణదండన అమలు కావడంలో నిర్భయ తల్లిదే ప్రధాన పాత్ర. కడుపుకోతను దిగమింగుతూ ఆమె చేసిన అవిశ్రాంత పోరాటం ఫలితంగానే దోషులకు ఉరిశిక్ష పడిందని చెప్పవచ్చు. అయితే ఆమెతో పాటు మరో మహిళ కూడా ఏకధాటిగా ఏడేళ్ల పాటు నల్ల దుస్తులు వేసుకుని మరీ న్యాయం కోసం పోరాడింది. డిఫెన్స్‌ లాయర్ల ఎత్తుగడలు తిప్పికొడుతూ క్షమించరాని తప్పు చేసిన ఆ మానవ మృగాలకు మరణశాసనం లిఖించింది. ఆ లాయరే సీమా కుష్వాహా. అలా అని అమె ప్రొఫెషనల్‌ లాయరేమీ కాదు. ట్రెయినీగా ప్రాక్టీస్‌ చేస్తూనే.. చేపట్టిన తొలి కేసులోనే విజయం సాధించింది. ‘నిర్భయ’కు న్యాయం జరగగడంలో కీలకపాత్ర పోషించి ప్రస్తుతం అందరి అభినందనలు అందుకుంటున్న ఆ ట్రెయినీ లాయర్‌ గురించి కొన్ని ఆసక్తికర విషయాలు తెలుసుకుందాం రండి.

2020 మార్చి 20.. ఉదయం 5.30గంటలు.. ఆరుగురు కీచకుల చేతిలో హత్యాచారానికి గురై కన్నుమూసిన ఓ అభాగ్యురాలి ఆత్మ శాంతించింది. న్యాయం కోసం అలుపెరగని పోరాటం చేస్తోన్న ఓ కన్నతల్లికి మనశ్శాంతి దొరికింది. తమ సహోదరికి ఎప్పుడెప్పుడు న్యాయం జరుగుతుందా?అని ఆశగా ఎదురుచూస్తోన్న కోట్లాది ఆడపిల్లల ఆకాంక్ష నిజమైంది. చట్టం ఎవరికీ చుట్టం కాదని..దేశంలో సగ భాగమైన అరవై కోట్ల మంది ఆడపడుచులకు అండగా ఉంటానని న్యాయ దేవత సగర్వంగా తలెత్తి చాటింది.

అమెరికా అధ్యక్షుడు ట్రంప్‌ కుటుంబ సమేతంగా ఇటీవలే భారత పర్యటనకు వచ్చి వెళ్లిన విషయం తెలిసిందే. వీళ్లు దిల్లీలో పర్యటించిన ఆ రెండురోజులూ అక్కడే కాదు.. దేశమంతా సందడి నెలకొంది. అయితే ఈ పర్యటనలో భాగంగా రెండో రోజు ట్రంప్‌ సతీమణి, అమెరికా ప్రథమ మహిళ.. మెలానియా ట్రంప్‌ దిల్లీ మోతీబాగ్‌లోని సర్వోదయ పాఠశాలను సందర్శించారు. అక్కడి విద్యార్థులు ఆమెను సంప్రదాయబద్ధంగా, ఎంతో ఆత్మీయంగా స్వాగతించారు. ఆపై అక్కడి విద్యార్థులు చేసిన నృత్యాలు, పాఠశాలలో నిర్వహించే ‘హ్యాపీనెస్‌ కరిక్యులం’ క్లాసులు ఆమెను ఎంతగానో ఆకట్టుకున్నాయి. ఈ నేపథ్యంలో భారత పర్యటన తనకెన్నో మధురానుభూతుల్ని మిగిల్చిందని, ముఖ్యంగా సర్వోదయ పాఠశాలలోని విద్యార్థులు, అక్కడి హ్యాపీనెస్‌ తరగతులు తనలో ఎంతగానో స్ఫూర్తి నింపాయని అమెరికాకు వెళ్లాక ట్వీట్ల మీద ట్వీట్లు చేశారు మెలానియా. అంతేకాదు.. ఈ క్రమంలో ఆమె ఆనందాన్ని ఇలా పంచుకున్నారు.

‘హ్యాపీనెస్‌ కరిక్యులం’... దిల్లీ ప్రభుత్వ పాఠశాలల్లో రెగ్యులర్‌ తరగతులతో పాటు అమలవుతున్న ఓ స్పెషల్‌ ప్రోగ్రాం. విద్యార్థుల్లో సృజనాత్మకతను మెరుగుపరిచే ఉద్దేశంతో అక్కడి ప్రభుత్వం చేపట్టిన ఈ కార్యక్రమం మంచి సత్ఫలితాలనిచ్చింది. ఈ క్రమంలో ప్రస్తుతం భారత పర్యటనలో ఉన్న అమెరికా ప్రథమ మహిళ మెలానియా ట్రంప్ ఈ ‘హ్యాపీనెస్‌ క్లాస్‌’ కు హాజరయ్యారు. తరగతి గదుల్లోకి వెళ్లి చిన్నారులతో కలిసి సరదాగా ముచ్చటించిన ఆమె కొద్దిసేపు హ్యాపీనెస్‌ పాఠాలు విన్నారు. ఇక మెలానియా రాకతో ఆ ప్రభుత్వ పాఠశాలలో పండగ వాతావరణం నెలకొంది.

‘ప్రతి మగాడి విజయం వెనుక ఒక ఆడది’ ఉన్నట్లే తన విజయం వెనుక తన భార్య సునీతా కేజ్రీవాల్‌ ఉందంటున్నారు ముచ్చటగా మూడోసారి దిల్లీ ముఖ్యమంత్రిగా గద్దెనెక్కనున్న అరవింద్‌ కేజ్రీవాల్‌. ఇటీవలే జరిగిన దిల్లీ అసెంబ్లీ ఎన్నికల్లో 70 స్థానాలకు 62సీట్లు గెలుచుకొని విజయదుందుభి మోగించింది ఆప్‌. ‘ఇంత గొప్ప విజయం వెనుక నా భార్య సునీత ఉంది.. ఆమె లేకుంటే ఈరోజు అరవింద్ కేజ్రీవాల్ అనే వ్యక్తికి గుర్తింపే లేదు.. నా భార్యే నా విజయ రహస్యం..’ అంటూ చెబుతున్నారు కేజ్రీ. సహధర్మచారిణిగా తన ప్రతి బాధ్యతను నెరవేర్చుతూ, ఎల్లప్పుడూ భర్తకు చేదోడు వాదోడుగా ఉంటూ ఈరోజు తన భర్త దిల్లీ పీఠానికి ముచ్చటగా మూడోమారు అధిపతిగా మారేందుకు ప్రేరణగా నిలిచారామె. ఈ నేపథ్యంలో ఈ ముచ్చటైన జంట ప్రేమకబుర్లేంటో మనమూ చదివేద్దామా..!!

ఆమె పేరులో మార్క్స్‌ ఉన్నాడు. ఆమె పేరులో లెనిన్‌ ఉన్నాడు. దిల్లీలో ఆప్‌ సాధించిన విజయంలో తనకూ వాటా ఉంది. ఆ పార్టీ మేనిఫెస్టోలో ఆమె ప్రమేయం ఉంది. అయిదేళ్లు దేశమంతా చర్చించుకున్న ఆప్‌ సర్కార్‌ సంస్కరణల్లో తన ఆలోచనలూ ఉన్నాయ్‌. దిల్లీ ఎన్నికల్లో దద్దరిల్లే విజయం సొంతం చేసుకున్న ఆ ఇంతి పేరు అతిషి మార్‌లెన.

అజ్ఞానానికి సంకేతం... అనర్థాలకు మూలం చీకటి. కంటికి వెలుగు కనబడకపోవడమే చీకటి కాదు. మస్తిష్కం విచక్షణా జ్ఞానాన్ని కోల్పోవడం కూడా చీకటే ! ఈ చీకటే ప్రపంచంలోని చాలా అనర్థాలకు... ముఖ్యంగా ఆడవారిపై జరిగే అఘాయిత్యాలకు కారణంగా నిలుస్తోంది. ఎన్నో ఏళ్లుగా దిశ వంటి ఎందరో స్త్రీల జీవితాలను ఈ చీకటి తన అజ్ఞానాంధకార గుప్పిట్లో బంధిస్తున్న విషయం మనందరికీ తెలిసిందే. ఇటీవల ఈ చీకటి మరింత వ్యాప్తి చెందుతుండడంతో సమాజంలోని బాహ్య చీకటిని, మనిషిలోని అంత: చీకటిని తొలగించేందుకు కంకణం కట్టుకున్నాయి కొన్ని ప్రభుత్వాలు. అందులో ముందుంటోంది దిల్లీ ప్రభుత్వం. ఇందుకు నిదర్శనమే దిల్లీ ముఖ్యమంత్రి కేజ్రీవాల్‌ బాలురతో చేయించిన ఈ ప్రతిజ్ఞ.

మగువల అందానికి, ఆత్మవిశ్వాసానికి ప్రతీకలుగా నిలుస్తాయి అందాల పోటీలు. అందుకే ఈ పోటీల్లో తమ దేశం తరఫున పాల్గొనాలని.. విజేతగా నిలిచి, తమ దేశానికి పేరు ప్రఖ్యాతులు తీసుకురావాలని అందాల భామలు ఆరాటపడుతుంటారు. ఎప్పుడెప్పుడు ఆ అందాల కిరీటం ధరిస్తామా అని కలలు కంటుంటారు. అలా అనుకున్న కల నెరవేరినప్పడు వారి ఆనందానికి ఇక ఆకాశమే హద్దు. మాటల్లో చెప్పలేని మధురానుభూతులు వారి మనసులో మెదులుతాయి. ప్రస్తుతం అలాంటి అనుభూతుల్లోనే తేలియాడుతోంది 16 ఏళ్ల ఆయుషీ ఢోలాకియా. వడోదరకు చెందిన ఈ అమ్మాయి ‘మిస్‌ టీన్‌ ఇంటర్నేషనల్‌-2019’ విజేతగా అవతరించింది. సుమారు 27 ఏళ్ల చరిత్ర కలిగిన ఈ ప్రతిష్ఠాత్మక పోటీల్లో ఇప్పటివరకు ఇండియా నుంచి ఒక్కరు కూడా ఈ టైటిల్‌ గెలవలేదు. ఇప్పుడు ఆ ఘనతను సాధించి, తను కలలు కన్న అందాల కిరీటాన్ని సొంతం చేసుకుంది.