మానవత్వానికి మచ్చ తెచ్చిన ‘నిర్భయ’ దోషులను ఉరితీశారు. ఆడపిల్లల భద్రతపై సందేహాలు రేకెత్తించిన ‘దిశా’ హత్యాచార దోషులను పోలీసులు ఎన్‌కౌంటర్‌ చేశారు. అయినా సమాజంలోని కొన్ని మానవ మృగాలు మారడం లేదు. మనిషి ముసుగు ధరించి విచ్చలవిడిగా తిరుగుతూ ఆడపిల్లలపై దారుణ హత్యాచారాలకు పాల్పడుతున్నాయి. సాటి మనిషి అన్న స్పృహ, కనికరం లేకుండా కర్కశంగా ప్రవరిస్తూ అమాయకపు అబలలను బలిగొంటున్నాయి. ఈ నేపథ్యంలో ‘నిర్భయ చట్టాలు’, ’పోలీసుల తూటాలు’ తమనేవీ భయపెట్టలేవంటున్న కొందరు ఉన్మాదుల చేతుల్లో మరో ‘నిర్భయ’ బలైపోయింది.

ఆడపిల్ల కనిపిస్తే చాలు.. కొందరు మగాళ్ల కళ్లు కామంతో మూసుకుపోతాయి. ఎప్పుడెప్పుడు అమ్మాయి ఒంటరిగా కనిపిస్తుందా? ఎప్పుడెప్పుడు తమ కోరిక తీర్చుకుందామా? అన్న ఆలోచనలే వారి మదిలో మెదులుతాయి. రాత్రీ పగలూ అన్న తేడా లేకుండా పశువుల్లా ప్రవర్తిస్తూ అఘాయిత్యాలకు పాల్పడుతున్నారు కొందరు మృగాళ్లు. ఇలాంటి ఘటనల్లో వెలుగు చూసేవి వేళ్ల మీద లెక్క పెట్టచ్చు. ఇక మరుగున పడిపోయే వాటికైతే లెక్కేలేదు. తాజాగా ఉత్తరప్రదేశ్‌లో మైనర్‌ బాలికపై జరిగిన రేప్‌, పాకిస్థాన్‌లో తన ఇద్దరు పిల్లలు చూస్తుండగానే తల్లిపై జరిగిన అత్యాచారం.. రాన్రానూ ఆడవారికి రక్షణ కరువవుతోందనడానికి ప్రత్యక్ష సాక్ష్యాలు.

అమానవీయం.. అకృత్యం.. దారుణం.. బహుశా ఇలాంటి పదాలేవీ ‘నిర్భయ’ ఘటనను ఉదహరించడానికి సరిపోకపోవచ్చు. ఏడేళ్ల క్రితం దిల్లీ నడిబొడ్డున ‘నిర్భయ’ ఘటనతో యావత్‌ దేశం ఒక్కసారిగా ఉలిక్కిపడింది. అసహాయురాలైన ఆడపిల్లను బలిగొన్న దుర్మార్గులకు ఉరే సరి అంటూ నినదించింది. చట్టంలో ఉన్న లోటుపాట్లను తమకు సానుకూలంగా మార్చుకుంటూ ఎత్తులకు పై ఎత్తులు వేస్తూ ఈ కీచకులు శిక్షనుంచి మూడు సార్లు తప్పించుకున్నా ఆఖరికి ఉరికంబానికి వేలాడక తప్పలేదు. అమాయకురాలైన తన బిడ్డను కోల్పోయి.. పొంగి వస్తోన్న దుఃఖాన్ని అణచుకుని మరీ ఏడేళ్లుగా పోరాడిన ఆ తల్లి గర్భశోకం నేటితో శాంతించింది. ఈ రోజు ఉదయం 05:30 గంటలకు దోషుల ఉరితీతతో ‘నిర్భయ’ ఆత్మకు శాంతి చేకూరింది. దీంతో యావత్‌ దేశం సంబరాలు చేసుకుంది. ఆడపిల్లకు అన్యాయం జరిగితే ఊరుకునేది లేదన్న విషయం మరోసారి రుజువైంది. ఈ ఉరిపై సామాన్యులే కాదు.. సెలబ్రిటీలూ సోషల్‌ మీడియా వేదికగా హర్షం వ్యక్తం చేస్తున్నారు. ఎట్టకేలకు నిర్భయకు న్యాయం జరిగిందంటూ తమ ఆనందాన్ని ట్వీట్లు, పోస్టుల రూపంలో పంచుకుంటున్నారు.

2020 మార్చి 20.. ఉదయం 5.30గంటలు.. ఆరుగురు కీచకుల చేతిలో హత్యాచారానికి గురై కన్నుమూసిన ఓ అభాగ్యురాలి ఆత్మ శాంతించింది. న్యాయం కోసం అలుపెరగని పోరాటం చేస్తోన్న ఓ కన్నతల్లికి మనశ్శాంతి దొరికింది. తమ సహోదరికి ఎప్పుడెప్పుడు న్యాయం జరుగుతుందా?అని ఆశగా ఎదురుచూస్తోన్న కోట్లాది ఆడపిల్లల ఆకాంక్ష నిజమైంది. చట్టం ఎవరికీ చుట్టం కాదని..దేశంలో సగ భాగమైన అరవై కోట్ల మంది ఆడపడుచులకు అండగా ఉంటానని న్యాయ దేవత సగర్వంగా తలెత్తి చాటింది.