మన పిల్లలు ఏదైనా గొప్ప పనిచేస్తే అమ్మగా గర్వపడతాం.. భర్త విజయంలో వెన్నంటే ఉంటూ భార్యగా గర్వపడతాం. అలాంటిది భార్య సాధించిన విజయాన్ని గొప్పగా చెప్పుకొని మురిసిపోయే భర్తలెంతమంది ఉంటారు..? మహా అయితే అలాంటి వారిని వేళ్ల మీద లెక్కపెట్టచ్చు. ఆ కొద్దిమందిలో తానూ ఒకరని అంటున్నారు భారత మాజీ ఫుట్‌బాల్‌ క్రీడాకారుడు గౌరమాంగి సింగ్‌. ఈ కరోనా ప్రతికూల పరిస్థితుల్లో ముందుండి సేవలందిస్తోన్న తన భార్యను చూస్తుంటే ఎంతో గర్వంగా ఉందని, తాను ఇండియన్‌ జెర్సీ ధరించి.. గొంతెత్తి జాతీయ గీతం పాడుతున్నప్పుడు ఎంతలా పులకరించిపోయానో.. ఇప్పుడూ అదే ఫీలింగ్‌ కలుగుతోందంటున్నాడీ ఫుట్‌బాలర్‌. మరి, ఇంతకీ ఈ స్టార్‌ ప్లేయర్‌ భార్య ఎవరు? ఏం చేస్తుంటారు? తన భర్త గర్వించేలా ప్రస్తుత విపత్కర పరిస్థితుల్లో ఆమె అందిస్తోన్న సేవలేంటి? తెలుసుకోవాలంటే ఈ స్టోరీ చదవాల్సిందే!

స్మృతి ఇరానీ... రాజకీయాల ద్వారానే కాదు.. సామాజిక మాధ్యమాలతోనూ ప్రజలకు నిరంతరం చేరువగా ఉండే నేతల్లో ఒకరు. తానొక కేంద్రమంత్రిని అన్న అధికార దర్పాన్ని ఏ మాత్రం తలకెక్కించుకోని వ్యక్తిత్వం ఆమె సొంతం. చూడడానికి సింపుల్‌గా, సరదాగా కనిపించే ఆమె.. సోషల్‌ మీడియాలోనూ యాక్టివ్‌గా ఉంటారు.

‘కరోనా వైరస్‌ సే ఆజ్‌ పూరా దేశ్‌ లడ్‌ రహా హై, యాద్‌ రహే హమే బీమారీసే లడ్‌నా హై, బీమార్‌ సే నహీ’... ఈ కరోనా కాలంలో ఎవరికి ఫోన్‌ చేసినా మొదట వినిపించే కాలర్‌ ట్యూన్‌ ఇదే. అయితే ఇలా ఓ ఆత్మీయురాలిగా, ఎంతో ఓపికతో కరోనా మహమ్మారి గురించి అవగాహన కల్పించే ఆ తియ్యటి గాత్రం ఎవరిదో మీరెప్పుడైనా ఆలోచించారా? దిల్లీకి చెందిన జస్లీన్‌ భల్లాదే ఆ గొంతు. వివిధ భారతీయ భాషల్లో అనువదించి రికార్డ్‌ చేసిన ఈ కాలర్‌ ట్యూన్‌కి మూడు భాషల్లో తన గొంతును అరువిచ్చారీ వాయిస్‌ ఓవర్‌ ఆర్టిస్ట్‌. దాదాపు పదేళ్లుగా ఈ రంగంలో కొనసాగుతోన్న ఆమె.. ఎన్నో ప్రకటనలు, రైళ్లు-విమానయాన సేవలకు సంబంధించిన గైడింగ్‌ వాయిస్‌ను కూడా అందించారు. ఈ నేపథ్యంలో జస్లీన్‌ గురించి కొన్ని ఆసక్తికర విశేషాలు మీకోసం..

కొన్ని నెలల క్రితం కరోనా విజృంభణ తీవ్రంగా ఉండడంతో వైద్య సేవలు అందించలేక విదేశీయులను తమ సొంత దేశాలకు వెళ్లిపొమ్మంటూ ఇటలీ ప్రభుత్వం ఆదేశాలిచ్చింది. అదే సమయంలో అంతర్జాతీయ విమాన సేవలు సైతం నిలిపి వేశారు. దీంతో ఇటలీలో ఉంటోన్న భారతీయులు దిక్కుతోచని స్థితిలో సతమతమయ్యారు. మరికొన్ని రోజులు అక్కడే ఉంటే తాము కూడా కరోనాకు బలవుతామనే భయంతో ప్రాణాలను అరచేతిలో పెట్టుకొని కాలాన్ని గడిపారు. ఈ క్రమంలో ఇటలీలో చిక్కుకుపోయిన 263 మంది భారతీయులను మన దేశానికి సురక్షితంగా తీసుకొచ్చేందుకు ఓ భారీ బోయింగ్‌ 777 విమానాన్ని సిద్ధం చేసింది ఎయిర్‌ ఇండియా సంస్థ. ఈ విమానానికి సారథ్యం వహించింది ఓ మహిళ. తనే కెప్టెన్ స్వాతి రావల్‌. కరోనా హాట్‌స్పాట్‌గా ఉన్న ఇటలీ లాంటి దేశం నుంచి మన వాళ్లను క్షేమంగా స్వదేశానికి చేర్చి.. రెస్క్యూ ఫ్లైట్‌కు సారథ్యం వహించిన తొలి మహిళా సివిలియన్‌ పైలట్‌గా చరిత్ర సృష్టించిందీ వీరనారి. అప్పటి తన ప్రయాణానికి సంబంధించిన కొన్ని సంఘటనలను ఇటీవల మళ్లీ గుర్తుకు తెచ్చుకుంది స్వాతి. ఈక్రమంలో తన అనుభవాలను షేర్‌ చేసుకుంది. మరి వాటిని ఆమె మాటల్లోనే విందాం రండి..

భారత్‌లో బయో టెక్నాలజీ అంటే టక్కున గుర్తొచ్చే పేరు కిరణ్‌ మజుందార్‌షా. 70 దశకంలో చిన్న సంస్థగా ప్రారంభమైన బయోకాన్‌ నేడు భారత్‌లోనే అతి పెద్ద బయో ఫార్మా కంపెనీగా రూపుదిద్దుకుందంటే.. అందుకు కిరణ్‌ వ్యాపార దక్షత, పట్టుదలే కారణం. ప్రస్తుతం ఆ సంస్థ ఛైర్‌పర్సన్‌, మేనేజింగ్‌ డైరెక్టర్‌గా వ్యవహరిస్తోన్న ఆమె.. వ్యాపార రంగంలోనే కాదు, సామాజిక సేవలోనూ ముందున్నారు. ఆర్థిక అంతరాలతో సంబంధం లేకుండా అవసరమైన వారందరికీ వైద్య సదుపాయాలు కల్పిస్తున్నారు. బయోఫార్మా రంగానికి సంబంధించి ఆమె చేస్తోన్న సేవలకు గుర్తింపుగా ఇప్పటికే ఎన్నో అవార్డులు, పురస్కారాలు అందుకున్నారీ సూపర్‌ వుమన్‌. ఈ క్రమంలో ఆమె తాజాగా మరో అవార్డును సొంతం చేసుకున్నారు. ఈ ఏడాదికి గాను ప్రతిష్ఠాత్మక ఈవై వరల్డ్‌ ఎంట్రప్రెన్యూర్‌ పురస్కారానికి ఎంపికైన ఆమె ఈ అవార్డును అందుకున్న మూడో భారతీయురాలిగా అరుదైన గుర్తింపు సొంతం చేసుకున్నారు.

సాయం చేయడం ఆమె బలం.. బలహీనత.. పిచ్చి! పైసా ప్రయోజనం ఆశించకుండా పరుల కోసమే జీవిస్తోంది. పదిమంది బాగు పడతారని ఉన్న ఒక్క ఇల్లూ అమ్మేసింది...ఓ వ్యక్తి ప్రాణం నిలబెట్టడానికి తన కిడ్నీనే దానం చేసింది... అయినవాళ్లను ఆదుకోవడానికే తటపటాయిస్తున్న ఈ రోజుల్లో తన సర్వస్వం ధారపోస్తున్న ఆ మహాతల్లి ఉమా ప్రేమన్‌... ఇరవై ఏళ్లుగా నిరుపేదలకు వెలుగు దివ్వెలా అండగా నిలుస్తున్న ఆమెను ‘వసుంధర’ పలకరించింది.

అదనులో వేసిన పంట... సరైన సమయంలో అందుకున్న అవకాశం ఫలిస్తాయి, ప్రయోజనాల పంట పండిస్తాయి. ఈ మహిళలూ అదే చేశారు. ఓ విద్యాసంస్థలో పనిచేస్తున్న ఆ మహిళా బృందం కరోనా సమయంలో అద్భుతమే చేసింది. ఒకరికొకరు దూరంగా ఉన్నా కలిసికట్టుగా పనిచేశారు. అందుబాటులో ఉన్న సాంకేతికతను సద్వినియోగం చేసుకున్నారు. లక్షల్లో ఫేస్ షీల్డ్స్ ను, వివిధ రకాల కరోనా రక్షణ సామగ్రిని తయారుచేశారు..

హింసతో పెచ్చరిల్లే దేశం దక్షిణ సూడాన్‌. గొడవలు, కల్లోలాలు అక్కడ నిత్యకృత్యం. ఎటువైపు నుంచి ఏ ఉపద్రవం ముంచుకొస్తుందో తెలియదు. ఈ పరిస్థితుల్లో మిలిటరీ పరిశీలకురాలిగా ఉన్న వారెవరైనా సాయుధులై ఉండటం రివాజు. భారతీయ సైన్యాధికారి మేజర్‌ సుమన్‌ గవానీ దీనికి భిన్నం. ఆమె ఆయుధాన్ని ఇంటి దగ్గరే వదిలి కార్యక్షేత్రంలోకి దిగుతారు. మహిళలు, పిల్లలతో ప్రేమగా మాట కలుపుతారు. కల్లోల ప్రాంతాల్లో ప్రేమామృతం కురిపిస్తారు. అలాగని విధుల్ని నిర్లక్ష్యం చేయరు. ఆ విలక్షణతకు, పనిలో రాజీ పడని తత్వానికి ప్రతిష్ఠాత్మక ‘ఐక్యరాజ్య సమితి జెండర్‌ అడ్వొకేట్‌ అవార్డు ఆఫ్‌ ది ఇయర్‌ - 2019’ వరించింది. ఈ పురస్కారం అందుకోనున్న తొలి భారతీయురాలిగా నిలిచారామె.

ప్రపంచంపై కరోనా ప్రకోపం చల్లారడం లేదు. ఇప్పటికే లక్షలాది మందిని బలితీసుకున్న ఈ వైరస్‌ రోజురోజుకీ తన పరిధిని పెంచుకుంటోంది. ఇక రోగ నిరోధక శక్తి తక్కువగా ఉండడంతో వృద్ధులే ఎక్కువగా ఈ మహమ్మారికి బలవుతున్నారని గణాంకాలు చెబుతున్నాయి. అందుకే మనదేశంతో పాటు చాలా దేశాల్లో లాక్‌డౌన్ ఆంక్షల్లో సడలింపులిచ్చినా వృద్ధులు మాత్రం ఎట్టి పరిస్థితుల్లో బయటకు రాకూడదని మార్గదర్శకాలు జారీ చేశారు. అయితే ఆరోగ్యకరమైన జీవనశైలి, సానుకూల దృక్పథం ఉంటే ఎలాంటి వ్యాధినైనా ఎదుర్కోగలమని ఇప్పటికే చాలామంది వయోవృద్ధులు నిరూపిస్తున్నారు. తద్వారా తమ లాంటి వారికి వూరటనిస్తూ బతుకుపై ఆశలు కల్పిస్తున్నారు. ఈకోవకే చెందుతుంది ఇండోర్‌కు చెందిన చందాబాయి. వయసులో సెంచరీ దాటిన ఈ బామ్మ కరోనా నుంచి పూర్తిగా కోలుకుని ఇటీవలే ఇంటికి చేరుకుంది.

వ్యాపారం సాగింది లేదు.. పరిశ్రమ నడిచిందీ లేదు... సకలం బంద్‌... ఇప్పుడు లాక్‌డౌన్‌ ఎత్తివేయడంతో మళ్లీ కొత్త సందడి మొదలవబోతోంది. కార్యకలాపాల రీస్టార్ట్‌ అంటే ఒకరకంగా మళ్లీ మొదటి నుంచీ ప్రారంభించడమే! అందరితోపాటు మహిళా పారిశ్రామికవేత్తలకూ ఇది ఇబ్బందికరమైన పరిస్థితి. దీన్నుంచి గట్టెక్కేదెలా? వ్యాపారం సజావుగా సాగే మార్గాలేంటో చెబుతున్నారు ఉషారాణి మన్నె... ప్రతిష్ఠాత్మక ఫిక్కీ లేడీస్‌ ఆర్గనైజేషన్‌ (ఫ్లో) హైదరాబాద్‌ చాప్టర్‌కి ఆమె ఈమధ్యే నూతన ఛైర్‌పర్సన్‌గా ఎంపికయ్యారు. ఈ సందర్భంగా ఆమెను వసుంధర పలకరించింది...

‘సిస్టర్‌.. జాగ్రత్త!’ అన్నారెవరో! ఫర్వాలేదులే అన్నట్టుగా చిన్నగా నవ్విందామె! కొన్నాళ్లకు.. ‘సిస్టర్‌.. జాగ్రత్త!’ అన్నారింకెవరో!! ‘నా ధర్మం నేను నిర్వర్తించాలి. భయపడితే ఎలా?’ అని సమాధానమిచ్చింది. ఇంకొన్నాళ్లకు.. ‘సిస్టర్‌.. జాగ్రత్త!’ అంటూ ఆ రాష్ట్ర మంత్రి ఫోన్‌ చేశారు. ‘ధన్యవాదాలు..’ అని చెప్పి కొత్త శక్తితో మళ్లీ విధుల్లో చేరింది. ఈ మూడు సంఘటనలు ఆమె శక్తిని తెలియజేసేవే! కరోనా బాధితులకు సేవలు చేసి.. తానూ వైరస్‌ బారిన పడి.. కొవిడ్‌పై గెలిచి మళ్లీ విధులకు హాజరవుతున్నారు కేరళ నర్సు రేష్మా మోహన్‌దాస్‌. ఆమెను వసుంధర పలకరించింది.. ఈ నర్సమ్మ అనుభవాలు ఆమె మాటల్లోనే..

మిట్టమధ్యాహ్నం.. ఎండ మండిపోతోంది. హైదరాబాద్‌లో ఓ రహదారి. దానికి పక్కనే అపస్మారకస్థితిలో పడి ఉన్న ఓ యాభై ఏళ్ల మహిళ. అదే సమయంలో అటుగా వెళుతున్న జీహెచ్‌ఎంసీ సిబ్బంది దృష్టి ఆమెపై పడింది. తమవెంట తీసుకెళ్లారు. ఇంకోరోజు ఇద్దరు చిన్నారులు రోడ్డుపై బిక్కుబిక్కుమంటూ కనిపించారు. తినడానికి ఏమైనా దొరక్కపోతుందా అని ఆశగా ఎదురుచూస్తున్నారు. వారినీ చేరదీశారు. లాక్‌డౌన్‌ వేళ.. ఏ దిక్కూ లేకుండా పడిగాపులు కాస్తున్న ఎందరినో ఆదుకుంటున్నారు జీహెచ్‌ఎంసీ మహిళా ఉద్యోగుల బృందం..

సాధారణంగా వివిధ రంగాల్లో రాణిస్తోన్న మహిళలు వివాహం తర్వాత లేదా తల్లయ్యాక తమ వృత్తిగత జీవితానికి వీడ్కోలు చెబుతుంటారు. కానీ, కొంతమంది మహిళలు మాత్రమే ఓ పక్క భార్యగా, తల్లిగా బాధ్యతలు సమర్థంగా నిర్వర్తిస్తూనే.. మరోపక్క తమ వృత్తిగత జీవితానికి సైతం న్యాయం చేస్తుంటారు. ప్రముఖ టెన్నిస్‌ స్టార్‌ సానియా మీర్జా కూడా ఈ కోవకే చెందుతుంది. మెటర్నిటీ బ్రేక్‌ తర్వాత తిరిగి తన కెరీర్‌ను పునః ప్రారంభించిన ఈ స్టార్‌ మామ్‌.. మాతృత్వం మహిళల ఆశయ సాధనకు ఏమాత్రం అడ్డు కాదని నిరూపిస్తోంది. ఈ క్రమంలో ఫెడ్ కప్ సంస్థ (ఇంటర్నేషనల్‌ టెన్నిస్‌ ఫెడరేషన్‌ - ITFకు అనుబంధ సంస్థ) ఇటీవలే సానియాను ‘ఫడ్‌ కప్ హార్ట్ అవార్డు’కు ఎంపిక చేసింది. ఈ ఘనత అందుకొన్న తొలి భారతీయురాలిగా సానియా చరిత్రకెక్కడం విశేషం.

అమ్మను మించిన దైవం లేదంటారు. ఎందుకంటే ఆకాశమే హద్దుగా ఆమె చూపించే ప్రేమకు అంతనేది ఉండదు. సహనానికి నిలువెత్తు సాక్ష్యంగా నిలిచే తల్లి.. పిల్లల మోములో చిరునవ్వు కోసం ఎన్ని కష్టాలకైనా ఎదురీదుతుంది. ఈ మాటలను మరోసారి నిజం చేసింది మహారాష్ర్టలోని పుణే జిల్లా చించావడ్‌కు చెందిన సోనూ ఖందారే. లాక్‌డౌన్‌ కారణంగా సుదూర ప్రాంతంలో చిక్కుకుపోయిన తన కుమారుడిని వెనక్కి తీసుకొచ్చేందుకు పెద్ద సాహసమే చేసిందామె. ఈ ఆపత్కాలంలో కొడుకు తన కళ్లెదుటే ఉండాలని స్కూటీపై ఒంటరిగా రానూ పోనూ.. మొత్తంగా 1200కిలోమీటర్లు ప్రయాణం చేసిందామె. మరి ‘మాతృ దినోత్సవం’ వేళ అమ్మ ప్రేమకు అంతులేదని రుజువుచేసిన ఈ సూపర్‌ మామ్‌ గురించి కొన్ని ఆసక్తికర విషయాలు తెలుసుకుందాం రండి...

2015 క్రికెట్‌ వరల్డ్‌ కప్‌! సిడ్నీ క్రికెట్‌ గ్రౌండ్‌లో ఆస్ర్టేలియా, భారత్‌ జట్ల మధ్య సెమీస్‌ మ్యాచ్‌ జరుగుతోంది.. భారత క్రికెట్‌ అభిమానుల ఆశలన్నీ స్టార్‌ క్రికెటర్‌ విరాట్‌ కోహ్లీ పైనే ఉన్నాయి! అయితే వారి ఆశలపై నీళ్లు చల్లుతూ కేవలం ఒక్క పరుగుకే పెవిలియన్‌ చేరుకున్నాడు విరాట్‌! ఆ మ్యాచ్‌లో భారత జట్టు 95 పరుగుల తేడాతో ఓటమి పాలైంది..! భారత ఆటగాళ్ల సమష్టి వైఫల్యమే ఈ పరాజయానికి కారణమని క్రీడా పండితులు కూడా విశ్లేషించారు. కానీ అనుష్క కారణంగానే కోహ్లీ త్వరగా ఔటయ్యాడని, అందుకే భారత జట్టు పరాజయం మూటగట్టుకుందని చాలామంది ఆమెను ఆడిపోసుకున్నారు. ఈ సందర్భంలోనే కాదు.. కోహ్లీ క్రికెట్‌లో ఫెయిలయినప్పుడల్లా చాలామంది అనుష్కనే బాధ్యురాలిని చేస్తూ విమర్శలు గుప్పించారు. ఈక్రమంలో భర్త వైఫల్యానికి భార్యను ఎలా బాధ్యురాలిని చేస్తారు అని ప్రశ్నిస్తోంది టెన్నిస్‌ స్టార్ సానియా మీర్జా.