అందాల భామ హంసానందిని కేరళ అందాలను తన ఫోన్‌లో బంధించింది. ఈ ఫొటోలను పోస్ట్‌ చేస్తూ ‘ఇందుకే నేను విహారయాత్రలకు వెళ్తుంటాను’ అనే వ్యాఖ్యను జత చేసింది.

టాలీవుడ్‌ భామ సమంత తన తాజా లుక్‌ని అభిమానులతో పంచుకుంది.

సూపర్‌ స్టార్‌ మహేష్‌ బాబు గారాల పట్టి సితార తన పిన్నితో కలిసి దిగిన ఫొటోని పోస్ట్‌ చేసింది.

బాలీవుడ్‌ సుందరి భాగ్యశ్రీ ఆనందంతో గంతులేస్తున్నట్టుగా దిగిన ఫొటోని పోస్ట్‌ చేసింది. ఈ సందర్భంగా ‘సోమవారం ఇలా సంతోషంగా ఉంటే వారమంతా ఆనందంగా గడిచిపోతుంది. నా కూతురు, భర్త ‘నువ్వు ఇంత ఎనర్జిటిక్‌గా ఎలా ఉండగలుగుతున్నావ్‌?’ అని ఎప్పుడూ అడుగుతుంటారు.

‘బిగ్‌బాస్‌’ బ్యూటీ పునర్నవి భూపాలం త్వరలో పెళ్లిపీటలెక్కనుందా? తాను తాజాగా ఇన్‌స్టాలో పంచుకున్న ఫొటో ఇది నిజమేనని చెప్పకనే చెబుతోంది. ఈ సందర్భంగా వేలికి ఉంగరం, ఆ ముందు ఒక అబ్బాయి నిల్చున్నట్లుగా ఉన్న ఫొటోని పోస్ట్‌ చేసిన పున్ను.. ‘నేను యస్‌ చెప్పాను.. తను ఉద్భవ్‌ రఘునందన్‌.. మిగతా విషయాలన్నీ రేపు చెబుతా..’ అంటూ తన ఫ్యాన్స్‌ని సస్పెన్స్‌లో పడేసింది.

బాలీవుడ్‌ సుందరి మల్లికా శెరావత్‌ తన పుట్టినరోజు వేడుకలను ముగించుకుని తిరిగి తన వర్కౌట్‌ రొటీన్‌ను మొదలుపెట్టింది. ఈ సందర్భంగా దిగిన ఫొటోని అభిమానులతో పంచుకుంది.

అందాల తార అంజలి ‘సిటీకి దూరంగా’ అంటూ ఓ రాయిపై కూర్చున్న ఫొటోని పోస్ట్‌ చేసింది. దీనికి ఆకాశం, చెట్లు, కొండలు, ప్రకృతి వంటి హ్యాష్‌ట్యాగ్‌లను జోడించింది.

బాలీవుడ్‌ ముద్దుగుమ్మ మాధురీ దీక్షిత్‌ దంపతులు నేడు వివాహ వార్షికోత్సవాన్ని జరుపుకొంటున్నారు. ఈ సందర్భంగా వారిద్దరూ కలిసి దిగిన ఫొటోని పంచుకుంటూ ‘ప్రతి వార్షికోత్సవం మా ప్రయాణంలో మరొక కొత్త సంవత్సరాన్ని సూచిస్తుంది. ఈ విషయాన్ని మీతో పంచుకుంటున్నందుకు ఎంతో ఆనందంగా ఉంది. మీ ప్రేమాభిమానాలకు కృతజ్ఞతలు’ అని రాసుకొచ్చింది.

మాజీ విశ్వ సుందరి సుస్మితా సేన్‌.. జీవితం గురించి ఆలోచింపజేసే ఓ ఫొటోని పోస్ట్‌ చేసింది. ఈ ఫొటోలో ‘జీవితం ఒక కఠినమైన పరీక్ష.. చాలామంది ఈ పరీక్షలో ఫెయిల్‌ అవుతుంటారు. దానికి కారణం మరొకరిని కాపీ కొట్టడమే. అలాగే ఎవరి క్వశ్చన్‌ పేపర్‌ వారిదే అన్న విషయాన్ని కూడా వారు అర్థం చేసుకోరు’ అని రాసి ఉంది. దీనికి ‘సరైన ప్రిపరేషన్‌, ప్రాక్టీస్‌ ఉంటే జీవితమనే పరీక్ష సులభంగానే ఉంటుంది. జీవితం మనకు సంధించే ప్రశ్నలు ప్రతి ఒక్కరికీ వేర్వేరుగా ఉంటాయి. కాబట్టి ఎవరి ప్రశ్నలకు వారే సమాధానాలు వెతుక్కోవాలి. జీవితం ఒక పరీక్ష అయితే దానికి పాఠ్యాంశం మీరే. కాబట్టి మిమ్మల్ని మీరు తెలుసుకోండి. ధైర్యంగా ఉండండి. ఒకరిని కాపీ కొట్టకుండా మీ ప్రశ్నలకు మీరే సమాధానాలను వెతికే ప్రయత్నం చేయండి. విజయానికి పరాజయానికి మధ్య అతి పెద్ద తేడా ఇదేనని నా భావన’ అంటూ షేరింగ్‌, అథెంటిక్‌ పవర్‌, కోర్‌ బిలీఫ్స్‌ హ్యాష్‌ట్యాగ్‌లను జోడించింది.

టాలీవుడ్‌ భామ సమంత తమ పెళ్లి రోజు సందర్భంగా భర్త నాగచైతన్యతో దిగిన ఫొటోని అభిమానులతో పంచుకుంది. దీనికి ‘నీకు నేను.. నాకు నువ్వు.. ఒకరికొకరం కష్టసుఖాలు ఏవైనా కలిసి పంచుకుందాం. ప్రియమైన శ్రీవారికి వివాహ వార్షికోత్సవ శుభాకాంక్షలు’ అంటూ నాగచైతన్య ఖాతాని ట్యాగ్‌ చేసింది. ఈ పోస్ట్‌కు స్పందించిన పలువురు తారలు సమంత-నాగచైతన్యలకు పెళ్లి రోజు శుభాకాంక్షలు తెలియజేశారు.

టాలీవుడ్‌ నటి, నిర్మాత మంచు లక్ష్మి తన తల్లితో దిగిన చిన్నప్పటి ఫొటోని పోస్ట్ చేసింది. ఈ సందర్భంగా ‘ఒక్క ఫొటో వెయ్యి మాటలు తెలియజేస్తుంది.. కానీ ఈ ఫొటో నా తల్లి నన్ను ఎంత ప్రేమిస్తుందో నాకు గుర్తు చేస్తుంది.. నాకు గొప్ప గురువు, థెరపిస్ట్‌, బెస్ట్‌ ఫ్రెండ్‌ అన్నీ అమ్మే. నేను నీకు ఎప్పటికీ రుణపడి ఉంటాను.. అమ్మా.. లవ్‌ యూ’ అంటూ తల్లిపై తనకున్న ప్రేమను వ్యక్తపరిచింది.

క్యారక్టర్‌ ఆర్టిస్ట్‌ ప్రగతి తన తాజా ఫొటోలను అభిమానులతో పంచుకుంది. దీనికి ‘మీకు తగిలిన గాయాలే మిమ్మల్ని కొత్తగా తీర్చిదిద్దడంలో ఉపయోగపడతాయి. కాబట్టి వాటిని మర్చిపోకండి’ అని రాసుకొచ్చింది.

బాలీవుడ్‌ సుందరి కాజోల్‌ తన తల్లికి పుట్టినరోజు శుభాకాంక్షలు తెలిపింది. ఈ సందర్భంగా తనతో దిగిన ఫొటోని పంచుకుంటూ ‘నేను నీతో ఉన్నప్పుడు ఒక సైన్యంతో ఉన్నంత భావన కలుగుతుంది.. ఒక మహిళలో ఉండే అన్ని కోణాలను నాపై చూపించిన నీకు పుట్టినరోజు శుభాకాంక్షలు. హ్యాపీ బర్త్‌ డే మమ్మా.. లవ్‌ యూ సో మచ్‌. నీ బిడ్డగా నాకు జన్మనిచ్చినందుకు ఎప్పుడూ నీకు రుణపడి ఉంటాను’ అంటూ తల్లిపై తనకున్న ప్రేమను వ్యక్తం చేసిందీ బ్యూటీ.

సూపర్‌ స్టార్‌ మహేష్‌ బాబు సతీమణి నమ్రతా శిరోద్కర్‌ ఓ ఆసక్తికరమైన ఫొటోని పోస్ట్‌ చేసింది. దీనికి ‘ఇది మీ బుర్రకు పదునుపెట్టే సమయం. ఈ ఫొటోలో ఏడుగురు మనుషులు, ఒక పిల్లి ఎక్కడ ఉన్నాయో కనిపెట్టండి. మీరు కనిపెట్టినట్లయితే మీ మెదడు బాగా పని చేస్తోందని అర్థం.. ఒకవేళ అయిదుగురి కంటే తక్కువ మందిని మాత్రమే కనిపెట్టగలిగితే ఒక్కసారి గట్టిగా ఊపిరి తీసుకొని తిరిగి తాజాగా ప్రయత్నించండి’ అని చెప్పుకొచ్చింది.

‘బిగ్‌బాస్‌’ బ్యూటీ హిమజ ఆనందంతో గెంతులేస్తున్నట్టుగా దిగిన ఫొటోని పోస్ట్‌ చేసింది. దీనికి ‘మొదట మిమ్మల్ని మీరు ప్రేమించుకోండి’ అని రాసుకొచ్చింది.

టాలీవుడ్ సుందరి రష్మిక పళ్ళు కనిపించేలా నవ్వుతున్న ఫొటోని పోస్ట్ చేసింది. 'తమకు తెలియని వ్యక్తులెవరైనా తమను చూసి నవ్వినప్పుడు కొంతమంది విచిత్రంగా చూస్తారు.. లేదా అలా నవ్వేవారికి పిచ్చి అనుకుంటారు.. మీరు కూడా అలాగే అనుకునేటట్లయితే మీరు నా ఫ్రెండ్ కాదు.. ఎందుకంటే నేను కూడా అలాంటి అపరిచితురాలినే.. ఎవరిని చూసినా నా స్టైల్ లో నేను నవ్వేస్తుంటాను..' అంటూ కోతి ఎమోజీ జత చేసిందీ భామ.

బాలీవుడ్‌ సుందరి షమితా షెట్టి తనకి ముద్దుపెడుతున్న ఓ బాబు ఫొటోని అభిమానులతో పంచుకుంది. దీనికి ‘మిస్సింగ్‌ మై నాటీ లిటిల్‌ బేబీ’ అని క్యాప్షన్‌ కూడా ఇచ్చింది. ఆ అబ్బాయి ఎవరో కాదు.. తన సోదరి శిల్పా శెట్టి కొడుకు. ఈ పోస్ట్‌కి ‘మీరిద్దరూ నా బేబీసే’ అంటూ శిల్ప రిప్లై ఇచ్చింది.

నటి ప్రగతి నవ్వుతోన్న తన ఫొటోని పోస్ట్‌ చేసింది. ‘ఏదైనా కావాలని మీరు బలంగా కోరుకున్నప్పుడు విశ్వం మొత్తం దానిని సాధించడంలో మీకు సహకరిస్తుంది..’ అని చెప్పుకొచ్చిందీ భామ.

మాటల మరాఠీ, యాంకర్‌ సుమా కనకాల ‘వాట్సప్‌ కష్టాలు’ అంటూ ఓ వీడియోని పోస్ట్‌ చేసింది. ఈ వీడియోలో చాటింగ్‌ కోసం ఏ అంశానికి ఎలాంటి ఎమోజీలు ఉపయోగిస్తుంటారో ఫన్నీగా చెబుతోంది సుమక్క.

ప్రముఖ హీరోయిన్‌ మీనా తన ఫిష్‌ పాట్‌లో ఉన్న చేపలను చూస్తోన్న ఫొటోని పోస్ట్‌ చేస్తూ ‘ఎవరైనా ఈ ఫొటోకి మంచి క్యాప్షన్‌ పెడతారా’ అని అభిమానులను అడిగింది. దాంతో ‘మీనాలను చూస్తోన్న మీనా’, ‘ఒక అందమైన చేప మరో రెండు అందమైన చేపలను చూస్తోంది’, ‘బంగారు వర్ణపు చేపలను చూస్తోన్న అందాల రాశి’ అంటూ పలువురు అభిమానులు కామెంట్ల రూపంలో పెట్టారు. వీటికి స్పందింస్తూ ‘వావ్‌.. మీరు ఇచ్చిన క్యాప్షన్లలో ఒక్కదానినే ఎంచుకోవాలంటే చాలా కష్టం. నాకు అన్నీ నచ్చాయి. మీ ఇమాజినేషన్‌కి ముగ్ధురాలినయ్యాను. అందరికీ కృతజ్ఞతలు’ అంటూ అభిమానులకు రిప్లై ఇచ్చిందీ సుందరి.

అందాల తార సమంత క్యారట్లను పట్టుకొని దిగిన ఫొటోని అభిమానులతో పంచుకుంది. దీనికి ‘ఈ వారం మెనూ.. క్యారట్‌ జ్యూస్‌, క్యారట్‌ పచ్చడి, క్యారట్‌ హల్వా, క్యారట్‌ ఫ్రై, క్యారట్‌ పకోడి, క్యారట్‌ ఇడ్లీ, క్యారట్‌ సమోసా’ అంటూ ‘గ్రో విత్‌ మి’ అనే హ్యాష్‌ట్యాగ్‌ని జత చేసిందీ భామ. ఈ క్యారట్లను సమంతే స్వయంగా తన గార్డెన్‌లో పండించింది.

నటి ప్రగతి తన తాజా ఫొటోని పోస్ట్‌ చేసింది. దీనికి ‘మీకు మీరే ఒక ఫైటర్.. గతంలో మీరు అధిగమించిన సమస్యలను, పరిస్థితులను ఒక్కసారి గుర్తు తెచ్చుకోండి. ఇప్పుడు కూడా అలాగే పోరాడండి.. పారిపోకండి..’ అంటూ కరోనా కష్ట కాలంలో తన అభిమానులకి ధైర్యం చెబుతోందీ సూపర్‌ మామ్.

టాలీవుడ్‌ భామ రేణూ దేశాయ్‌ తన జుట్టు విరబోసినట్టుగా ఉన్న ఫొటోని అభిమానులతో పంచుకుంది. దీనికి ‘హ్యుమిడిటీ వల్ల నా జుట్టంతా చింపిరిగా మారింది.. పిచ్చుకలు కచ్చితంగా నా జుట్టుపై గూళ్లు కడతాయి.. దయచేసి వాటిని లెక్కించండి’ అంటూ తన స్నేహితులను జత చేసిందీ భామ.

టాలీవుడ్‌ భామ లావణ్యా త్రిపాఠి అంటే మనకు మొదట గుర్తుకు వచ్చేది ‘అందాల రాక్షసి’ చిత్రం. ఈ చిత్రం విడుదలై నేటితో 8 వసంతాలను పూర్తి చేసుకుంది. ఈ సందర్భంగా లావణ్య ఈ సినిమాలోని కొన్ని ఫొటోలను అభిమానులతో పంచుకుంది.

సూపర్‌ స్టార్‌ మహేష్‌ బాబు సోదరి మంజులా ఘట్టమనేని తన కుటుంబ సభ్యులు భౌతిక దూరం పాటిస్తూ మాట్లాడుకుంటున్నట్టుగా ఉన్న ఓ ఫొటోని పోస్ట్ చేసింది. దీనికి ‘భౌతిక దూరం పాటించడం అంత కష్టంగా ఏమీ లేదు.. ఇది మన ప్రమేయం లేకుండా వచ్చింది’ అంటూ ఫ్రెండ్స్‌ టైమ్ హ్యాష్‌ట్యాగ్‌ని జోడించింది.

అందాల తార కియారా అడ్వాణీ నేడు తన పుట్టిన రోజు జరుపుకొంటోంది. ఈ సందర్భంగా వివిధ కేకుల ముందు కూర్చొని ఉన్న ఫొటోని అభిమానులతో పంచుకుంది. ‘నా పుట్టిన రోజు సందర్భంగా నా కుటుంబ సభ్యులు, స్నేహితులు, అభిమానులు... వీడియోలు, మెసేజ్‌లు, ఫోన్‌ కాల్స్‌తో ప్రేమాభిమానాల వర్షం కురిపించారు. మీ అందరికీ నా హృదయపూర్వక ధన్యవాదాలు. చాలా ఆనందంగా ఉంది. నేను ఇప్పుడు ఎలా ఉన్నానో, మీరు కూడా అంతే ఆనందంగా, ఆరోగ్యంగా ఉండాలని ప్రార్థిస్తున్నాను.. ఇదంతా దేవుని ఆశీర్వాదమే’ అంటూ రాసుకొచ్చిందీ సుందరి.

టాలీవుడ్‌ సెన్సేషనల్‌ హీరో విజయ్‌ దేవరకొండ, అందాల తార రీతూ వర్మ నటించిన చిత్రం ‘పెళ్లిచూపులు’. చిన్న సినిమాగా విడుదలై మంచి కలెక్షన్లు పొందిన ఈ చిత్రం విడుదలై నేటికి నాలుగు సంవత్సరాలైంది. ఈ సందర్భంగా రీతూ వర్మ అప్పటి జ్ఞాపకాలను, ఫొటోలను అభిమానులతో పంచుకుంది.