‘నీలాంబరి’, ‘శివగామి’ ఈ క్యారక్టర్స్‌ పేర్లు వింటేనే రమ్యకృష్ణ నట విశ్వరూపం గుర్తొస్తుంది. ఆమె తప్ప మరెవరూ ఈ పాత్రలకు సరిపోరేమో అన్నవిధంగా తనదైన నటనతో ముద్రవేసిందీ మేటి నటీమణి. మళ్లీ అలాంటి పవర్‌ఫుల్‌ పాత్రతో మనల్ని అలరించడానికి సిద్ధమైంది రమ్య. జయలలిత జీవితకథ ఆధారంగా నిర్మితమవుతున్న ‘క్వీన్‌’ అనే వెబ్‌ సీరీస్‌లో రమ్య నటిస్తోన్న సంగతి తెలిసిందే. తాజాగా దీనికి సంబంధించిన ట్రైలర్‌ని చిత్రబృందం విడుదల చేసింది. ఇందులో జయ రాజకీయ జీవితానికి సంబంధించిన పాత్రలో రమ్య కనిపించనున్నారు. కానీ ట్రైలర్‌లో ఎక్కడా జయలలిత పేరుని చిత్రబృందం తెలియనివ్వలేదు. అందులో పాత్రని ‘శక్తి శేషాద్రి’గా ట్రైలర్‌లో చూపించారు. మరి మీరు కూడా ఈ ట్రైలర్‌లో రమ్య నటనా కౌశలాన్ని చూసేయండి!

సోషల్‌ మీడియాలో యాక్టివ్‌గా ఉండే తారల్లో నటి రేణూ దేశాయ్‌ ఒకరు. తన వ్యక్తిగత విషయాలతో పాటు తన అభిప్రాయాలను, సూచనలను ఈ వేదిక ద్వారా అభిమానులతో పంచుకొంటుంటుందీ తార. ఈక్రమంలో రేణూ తాజాగా కొన్ని ఫొటోలను పోస్ట్‌ చేస్తూ ‘మన మనసుకు నచ్చిన ఆహారాన్నే మితంగా తీసుకోవాలని నేనెప్పుడూ చెబుతుంటాను. దానితో పాటు మనం తరచూ యోగా, వర్కవుట్లు వంటివి చేస్తుండాలి. మన జీవితం చాలా చిన్నది. అందుకే మన ఆత్మను సంతృప్తి పరిచే పనులు మాత్రమే చేద్దాం. ఎట్టి పరిస్థితుల్లో మద్యం, మత్తు పదార్థాలకు బానిసలుగా మారకండి. చివరి ఫొటో నేను ఆహారం కోసం ఆత్రంగా ఎదురు చూస్తున్నప్పుడు తీసింది.’ అని రాసుకొచ్చింది.

సోషల్‌ మీడియా విస్తరించాక సెలబ్రిటీలను సంప్రదించడం, వాళ్లతో తమ అభిప్రాయాలు పంచుకోవడం అభిమానులకు సులభంగా మారిపోయింది. అభిమానులు తమను ట్యాగ్‌ చేసిన పోస్టులకు సెలబ్రిటీలే స్వయంగా స్పందించిన సందర్భాలు చాలా ఉన్నాయి. అల్లు అర్జున్‌, పూజా హెగ్డే జంటగా నటిస్తోన్న ‘అల..వైకుంఠపురములో’ సినిమాలోని ‘రాములో.. రాములా..!’ అనే పాట ప్రేక్షకులను ఎంతగా ఆకట్టుకుందో తెలిసిందే. ఈ క్రమంలో ఈ పాటకు ఓ చిన్నారి ముద్దుగా డ్యాన్స్‌ చేస్తుండగా తీసిన వీడియో పూజ దృష్టికి వెళ్లింది. ఈ వీడియోను తను ట్విట్టర్‌లో షేర్‌ చేస్తూ ‘ఎవరో ఈ వీడియోను నాకు షేర్‌ చేశారు. ఈ క్యూటీని చూడకుండా ఉండలేకపోతున్నా..! ‘రాములో.. రాములా..!’ పాట అన్ని వయసుల వారినీ ఆకట్టుకుంటోంది’ అని రాసుకొచ్చింది.

చిత్ర పరిశ్రమలో అడుగుపెట్టి దాదాపు 16 ఏళ్లు దాటినప్పటికీ ఇంకా స్టార్‌ హీరోయిన్‌గా అభిమానుల చేత నీరాజనాలు అందుకొంటోన్న నటి నయనతార. ఎలాంటి బ్యాక్‌గ్రౌండ్‌ లేకుండా పరిశ్రమకు వచ్చి సూపర్‌ స్టార్‌గా ఎదిగిన తారల్లో నయన్‌ కూడా ఒకరు. 2003లో ‘మనస్సినక్కరే’ అనే మలయాళ చిత్రంతో వెండితెరకు పరిచయమైన ఈ బ్యూటీ.. తెలుగు, తమిళ, మలయాళ భాషల్లో అనేక చిత్రాల్లో నటించింది. సినిమాల్లోకి రాక ముందు నయనతార ఓ మలయాళ టీవీ ఛానల్‌లో యాంకర్‌గా పనిచేసేది. తను యాంకర్‌గా వ్యవహరించిన అప్పటి కార్యక్రమానికి సంబంధించిన ఓ వీడియో ప్రస్తుతం సోషల్‌ మీడియాలో చక్కర్లు కొడుతోంది. ఈ వీడియోలో నయన్‌ను గుర్తుపట్టడం చాలా కష్టమే..! 13 సెకన్ల నిడివి ఉన్న ఈ వీడియోలో నయన్‌ తన పేరు డయానా అని చెప్పడం గమనార్హం. అవును.. ఈ తళుకు తార అసలు పేరు డయానా మరియం కురియన్‌. ఈ వీడియో చూసిన నెటిజన్లు ‘టీవీ యాంకర్‌గా పని చేసే స్థాయి నుంచి లేడీ సూపర్‌ స్టార్‌గా ఎదిగిన నయన్‌ జీవితం ఎందరికో ఆదర్శం’ అంటూ తెగ కామెంట్లు పెడుతున్నారు.

మోడల్‌గా తన కెరీర్‌ను ప్రారంభించి నటిగా మంచి గుర్తింపు తెచ్చుకున్న తారల్లో నమ్రతా శిరోద్కర్‌ ఒకరు. సినిమాల్లోకి రాకముందు పలు అందాల పోటీల్లో పాల్గొన్న ఈ తార.. 1993లో మిస్‌ ఇండియా టైటిల్‌ను దక్కించుకున్న సంగతి తెలిసిందే. మహేష్‌తో వివాహం తర్వాత నమ్రత సినిమాలకు గుడ్‌బై చెప్పి కుటుంబ బాధ్యతలకే అంకితమైంది. సోషల్‌ మీడియాలో యాక్టివ్‌గా ఉండే ఈ బ్యూటీ.. తనకు సంబంధించిన విశేషాలను ఎప్పటికప్పుడు అందులో పోస్ట్‌ చేస్తుంటుంది. ఈ క్రమంలో తను మోడల్‌గా ఉన్న రోజుల్లో ర్యాంప్‌ వాక్‌ చేస్తుండగా తీసిన కొన్ని ఫొటోలను నమ్రత తాజాగా ఇన్‌స్టాలో పోస్ట్‌ చేసింది. ‘వేదికే నీ ప్రపంచం అయినప్పుడు..! స్నేహితులతో ఉన్న ఆ రోజులు ఎంతో బాగుండేవి..!’ అని రాసుకొచ్చింది నమ్రత.

అక్కినేని కుటుంబం ఇటీవలే సినీ నటి రేఖను ‘ఏఎన్నార్‌ జాతీయ పురస్కారం’తో సత్కరించిన సంగతి తెలిసిందే. ఈ వేడుకకు అక్కినేని కుటుంబ సభ్యులతో పాటు పలువురు సినీ ప్రముఖులు హాజరయ్యారు. ఈ క్రమంలో నటి అమల, మంచు లక్ష్మి, నిహారికలు.. రేఖతో కలిసి దిగిన ఫొటోలను సోషల్‌ మీడియాలో షేర్‌ చేశారు. అమల రేఖతో దిగిన ఫొటోను ట్విట్టర్లో షేర్‌ చేస్తూ ‘రేఖాజీతో గడిపిన ఈ సాయంత్రం ఎప్పటికీ మరపురానిది. ఆమె 2019సంవత్సరానికి గాను ఈ పురస్కారానికి ఎంపికైంది. మీరు మా హృదయాలకు చేరువైనందుకు మీకు కృతజ్ఞతలు..!’ అని రాసుకొచ్చింది.

తెలుగు సినిమా పరిశ్రమ గర్వించదగ్గ నటుడు నట సామ్రాట్‌ అక్కినేని నాగేశ్వరరావు. ఆయన తన కెరీర్‌లో ఎన్నో వైవిధ్యమైన పాత్రలు పోషించారు. నటనపై ఆయనకున్న అంకితభావం ఎలాంటిదంటే.. చివరి రోజుల్లో అస్వస్థతకు గురైనా ఆయన సినిమాల్లో నటించడం మానలేదు. ఏఎన్నార్‌ మరణించిన తర్వాత ఆయన జ్ఞాపకార్థం భారత సినిమా పరిశ్రమలో ప్రతిభ కనబర్చిన నటీనటులకు ప్రతి ఏడాదీ ‘ఏఎన్నార్‌ అవార్డ్స్‌’ పేరిట పురస్కారాలు అందజేస్తున్నారు ఆయన కుమారుడు నాగార్జున.