ఎవరైనా తాము అనుకున్న గమ్యానికి చేరుకున్నప్పుడు... వాళ్లు సాధించిన విజయమే పైకి కనిపిస్తుంది తప్ప... ఆ గెలుపును చేరుకోవడానికి వాళ్లు పడిన కష్టాలు, రాల్చిన కన్నీళ్లు ఎవరికీ కనిపించవు. ముఖ్యంగా సినిమా ఇండస్ట్రీలో ప్రస్తుతం స్టార్స్‌గా వెలుగొందుతోన్న ఎంతోమంది తారలు తమ కెరీర్ ప్రారంభంలో ఎన్నో రకాల ఇబ్బందులు ఎదుర్కొన్న వారే...! ఈ క్రమంలో తన జీవితంలో కూడా ఎన్నో కష్టాలున్నాయంటోంది బాలీవుడ్‌ బ్యూటీ హీనాఖాన్‌. తాను ఇండస్ట్రీలోకి రావడం తన తల్లిదండ్రులకు ఇష్టం లేదన్న హీనా... ఇటీవల తన వ్యక్తిగత జీవితానికి సంబంధించిన కొన్ని విషయాలను అందరితో షేర్‌ చేసుకుంది.
11 ఏళ్ల క్రితం ‘యే రిష్తా క్యా కెహ్‌లాతా హై’ (తెలుగులో ‘పెళ్లంటే నూరేళ్ల పంట’) అనే సీరియల్‌తో బుల్లితెరపై ఎంట్రీ ఇచ్చింది కశ్మీర్‌ కుటుంబానికి చెందిన హీనా ఖాన్‌. అక్షర సింఘానియా పాత్రలో లక్షల మంది అభిమానులను సొంతం చేసుకుంది. ఆ తర్వాత ‘కసౌటి జిందగీ కే ’ సీరియల్‌తో తన పాపులారిటీని మరింత పెంచుకుంది. ‘ఖత్రోన్‌ కే ఖిలాడీ’, ‘బిగ్బాస్’ తదితర రియాలిటీ షోల ద్వారా బాలీవుడ్‌ బుల్లితెరపై అత్యధిక ఆదాయం ఆర్జిస్తున్న నటీమణిగా అశేష గుర్తింపు పొందింది. అంతేకాదు.. సినిమాల్లోకి రాకముందే కేన్స్‌ ఫిలిం ఫెస్టివల్‌లో హొయలొలికించే గౌరవం దక్కించుకుంది. ఈ ఏడాది ‘హ్యాక్డ్‌’, ‘అన్‌లాక్‌’ లాంటి సినిమాలతో అలరించిన ఈ అందాల తార ప్రస్తుతం ‘నాగిన్‌ సిరీస్ 5’లో నటిస్తోంది. ఈ క్రమంలో తన బాలీవుడ్‌ జర్నీ గురించి ‘హ్యూమన్స్‌ ఆఫ్‌ బాంబే’ వేదిక ద్వారా అందరితో షేర్‌ చేసుకుంది.
అక్కడ నటన అనే మాట నిషిద్ధం!
‘నేను సంప్రదాయ కశ్మీరీ కుటుంబం నుంచి వచ్చాను. అక్కడ నటన అన్న మాట నిషిద్ధం. కళాశాల చదువు నిమిత్తం నన్ను దిల్లీ పంపేందుకు కూడా నా తల్లిదండ్రులు సందేహించారు. ఎలాగోలా నాన్నను ఒప్పించి దిల్లీకి వచ్చేశాను. ఆ సమయంలో నా స్నేహితురాలు ‘సీరియల్‌ కోసం ఆడిషన్స్‌ జరుగుతున్నాయి. నువ్వు వెళ్లు’ అని సూచించింది. అయితే నేను నో చెప్పాను. కానీ తను వదల్లేదు. పట్టుబట్టి మరీ నన్ను వెళ్లమంది. దీంతో తన బలవంతం మీద ఆడిషన్స్‌కు హాజరయ్యాను. మరుసటి రోజే సీరియల్‌లో మెయిన్ రోల్‌కు ఎంపికైనట్లు కాల్‌ వచ్చింది’..
మా ఫ్యామిలీతో సంబంధాలు తెంచుకున్నారు!
‘అలా 20 ఏళ్ల వయసులో కుటుంబ సభ్యులకు చెప్పకుండా ముంబయి వెళ్లాను. అక్కడ ఇల్లు వెతుక్కోవడంలో ప్రొడక్షన్‌ వాళ్లు నాకు బాగా హెల్ప్‌ చేశారు. ఇక నా నటన గురించి నాన్నతో చెప్పడానికి చాలా వారాలు పట్టింది. ఈ విషయం వినగానే ఆయన షాక్‌ అయ్యారు. అమ్మ తరఫున స్నేహితులు, బంధువులు మా కుటుంబంతో సంబంధాలు తెంచుకున్నారు. అయితే అదృష్టవశాత్తూ నేను నటించిన సీరియల్‌ ఎంతో పాపులారిటీని సొంతం చేసుకుంది. దీంతో కొన్ని వారాల తర్వాత నేను నటనను కొనసాగించేందుకు నాన్న కూడా అంగీకరించారు. కానీ చదువు కూడా కొనసాగించాలని కండిషన్ పెట్టి అందరూ నాతో పాటు ముంబయి వచ్చేశారు. ఇక నాన్నకిచ్చిన మాటను అమలు పరుస్తూ రాత్రి వేళల్లో షూటింగ్‌లకు హాజరవుతూ, బ్రేక్‌ టైంలో చదువుకునేదాన్ని. దిల్లీకి వెళ్లి పరీక్షలు రాసి వచ్చేదాన్ని. ఈ క్రమంలో వివిధ కారణాల వల్ల ఎన్నోసార్లు కుటుంబ సభ్యులతో గొడవపడ్డాను. కానీ ఏటా నా సీరియల్‌ టాప్‌లో నిలిచింది. దీంతో కెమెరా మీదున్న ప్రేమను కాదనలేకపోయాను.
రాకీ గురించి చెప్పగానే మళ్లీ షాక్‌ అయ్యారు!
‘మొత్తం 8 సంవత్సరాల పాటు సీరియల్స్‌లో కొనసాగిన నాకు 2017లో బిగ్బాస్-11 రూపంలో మంచి ఆఫర్‌ వచ్చింది. అయితే సీరియల్స్‌లో నటించే ముందు ‘నేను షార్ట్స్‌ ధరించను. అసభ్యకరమైన సన్నివేశాల్లో అసలు నటించను’ అని కొన్ని కండిషన్లు పెట్టాను. అలాగే బిగ్బాస్ ఆఫర్‌ వచ్చేనాటికి నాకంటూ కొన్ని సొంత నియమాలు రూపొందించుకున్నాను. ఇక మా అమ్మానాన్నలు నాకు పెళ్లి సంబంధాలు చూస్తున్న సమయంలోనే రాకీ (బాయ్‌ఫ్రెండ్‌) గురించి వారికి చెప్పాను. దీంతో మా కుటుంబ సభ్యులందరూ మళ్లీ షాక్‌ అయ్యారు. ఎందుకంటే అప్పటిదాకా మా ఫ్యామిలీలో ఎవరూ ప్రేమ వివాహాలు చేసుకోలేదు. అయితే వాళ్ల అంగీకారం కోసం నేను ఎంతో ఓపికతో ఎదురుచూశాను. చివరకు నేను కోరుకున్నట్లే వారు నా ప్రేమను ఆశీర్వదించారు. ఇప్పుడు మా అమ్మానాన్న నా కంటే తననే ఎక్కువగా ప్రేమిస్తున్నారు’..
అమ్మానాన్నలకు చెప్పిన తర్వాతే ఆ సీన్‌కు ఓకే చెప్పాను!
‘ఇక సీరియల్స్‌తో పాటు టీవీ ఛాన్సులు భారీగా వస్తున్న సమయంలోనే ధైర్యం చేసి సినిమాల్లోకి వెళ్లాను. నేను నటించిన మొదటి చిత్రమే గతేడాది జరిగిన కేన్స్‌ ఫిల్మ్‌ ఫెస్టివల్‌లో ప్రదర్శితమైంది. ఇది నాకెంతో గర్వంగా అనిపించింది. ఇక ఈ ఏడాదే ఓటీటీ ప్లాట్‌ఫాంలోకి కూడా ప్రవేశించాను. అక్కడ స్ర్కిప్ట్‌లో భాగంగా ఓ ముద్దు సన్నివేశంలో నటించాల్సి వచ్చింది. దీని గురించి అమ్మానాన్నలతో మాట్లాడాను. వారు నన్ను అర్థం చేసుకుని అంగీకరించిన తర్వాతే ఆ సీన్‌కు యస్‌ అని చెప్పాను. ఇప్పుడు ఆ చిత్రం ఆన్‌లైన్‌లో అత్యధిక మంది చూసిన చిత్రాల జాబితాలో చేరింది. నేను కెమెరా ముందుకొచ్చి 11 ఏళ్లు పూర్తయ్యాయి. శ్రీనగర్‌లో పుట్టి పెరిగిన నేను కేన్స్‌ వరకు వెళతానని అసలు ఊహించలేదు. ప్రతి అడుగులో నేను ఎదుర్కొన్న కష్టమే ఇక్కడ వరకు నన్ను నడిపించిందని అనుకుంటున్నాను’ అని చెప్పుకొచ్చిందీ బ్యూటీ క్వీన్.