సమస్త సృష్టికి ఆధారం.. అనంత శక్తికి సంకేతం..
వసుధను నడిపే వసుంధరకు వందనం! శిరసాభివందనం!!

Movie Masala

Video Gallery

 

మీ ప్రశ్న అడగండి

(Press ctrl+g to switch(English/Telugu))

హలో డాక్టర్‌. నాకు డెలివరీ తర్వాత ట్యుబెక్టమీ చేశారు. పొట్ట తగ్గడానికి బెల్టు పెట్టుకోమన్నారు. కానీ నేను దానికి బదులు చీర ఉపయోగిస్తున్నా. దీనివల్ల నిజంగానే పొట్ట తగ్గుతుందా? మళ్లీ బెల్టు/చీర వాడడం ఆపేశాక పొట్ట పెరుగుతుందా? - ఓ సోదరి


నార్మల్‌ డెలివరీ/సిజేరియన్‌ జరిగిన వెంటనే కొద్ది రోజుల పాటు పొట్ట బాగా వదులుగా, ఎలాంటి ఆసరా లేనట్లుగా అనిపిస్తుంది.. కాబట్టి బెల్టు ఉపయోగించమని డాక్టర్లు చెబుతారు. కానీ నిజానికి బెల్టు వాడడం వల్ల కండరాల్లో బలం పెరిగి తిరిగి యథాస్థితికి రావడం గానీ, పొట్ట తగ్గిపోవడం కానీ జరగదు. అలాగే బెల్టు, చీర వాడడం ఆపేశాక.. తిరిగి వదులుగానే అనిపిస్తుంది. కాబట్టి మీకు పొట్ట తగ్గిపోవాలంటే వ్యాయామం చేయడం ఒక్కటే మార్గం.


Know More

నమస్తే మేడం. నాకు ఎనిమిదో నెల ఉన్నప్పుడు నా గర్భంలోనే బేబీ చనిపోయింది. బేబీ హార్ట్‌బీట్‌ తక్కువగా ఉన్నందు వల్లే అలా జరిగిందని డాక్టర్‌ చెప్పారు. బిడ్డ చనిపోయి అప్పటికే మూడు రోజులైనా నార్మల్‌ డెలివరీ చేసి బేబీని బయటికి తీశారు. అసలు అలా సాధ్యమవుతుందా? నేను మళ్లీ గర్భం ధరించే అవకాశాలున్నాయా? మొదటిసారి ఎదురైన ఈ సమస్య ప్రభావం మరోసారి గర్భంపైన పడుతుందా? సలహా ఇవ్వండి. - ఓ సోదరి


మూడో త్రైమాసికంలో గర్భంలోనే బిడ్డ చనిపోవడం అనేది చాలా అరుదే అయినా అప్పుడప్పుడూ జరుగుతుంది. అయితే మీరు అడిగిన ప్రశ్నలన్నింటికీ సమాధానాలు చెప్పాలంటే ముందుగా కొన్ని వివరాలు తెలియాలి. మీరు గర్భవతిగా ఉన్నప్పుడు మీ ఆరోగ్యం ఎలా ఉంది?, బీపీ-షుగర్‌ పెరిగాయా?, కాళ్లలో వాపులొచ్చాయా?, గర్భవతిగా ఉన్నప్పుడు రక్తస్రావమేమైనా కనపడిందా?, బిడ్డను తీశాక పోస్ట్‌ మార్టమ్‌ కానీ, క్రోమోజోమ్‌ టెస్టులు గానీ చేశారా?, ఎక్స్‌రే తీశారా?.. వంటి వివరాలన్నీ తెలిస్తేనే తర్వాతి గర్భం గురించి సురక్షితంగా ప్లాన్‌ చేసుకోవచ్చు. ఏదేమైనా ఆ వివరాలన్నీ లేకపోయినా కూడా మీరు ఒక హై రిస్క్‌ ప్రెగ్నెన్సీ యూనిట్‌లో సంప్రదించి వివరంగా పరీక్షలన్నీ చేయించుకోవాల్సి ఉంటుంది. ముఖ్యంగా APLA సిండ్రోమ్‌, డయాబెటిస్‌, క్రోమోజోముల వివరాలు.. వంటివన్నీ పరిశీలించుకోవాలి.


Know More

నమస్తే డాక్టర్‌. మా వారికి చర్మ అలర్జీ ఉంది. అదే సమస్య మా పాపకి కూడా ఉంది. వారిద్దరిదీ O+ve బ్లడ్‌ గ్రూప్‌. కానీ నాది O-ve. ఇప్పుడు మేము రెండో బేబీ కోసం ప్లాన్‌ చేసుకోవాలనుకుంటున్నాం. కానీ పుట్టబోయే బేబీలో కూడా ఈ సమస్య వస్తుందేమోనని భయంగా ఉంది. అది ఎంత వరకు నిజం? మేం ప్రెగ్నెన్సీ కోసం ప్లాన్‌ చేసుకోవచ్చా? సలహా ఇవ్వండి. - ఓ సోదరి


మామూలుగా అలర్జీలనేవి వంశపారంపర్యంగా రావచ్చు. అయితే ఇప్పుడున్న పాపకి అదే సమస్య వచ్చింది కాబట్టి పుట్టబోయే బేబీలో వస్తుందా, రాదా తెలియాలంటే.. అసలు మీ వారి చర్మ సమస్యేంటో కరక్ట్‌గా తెలియాలి. దాన్ని బట్టి ఇది వంశపారంపర్యంగా వచ్చేదా, కాదా అన్నది చెప్పడానికి వీలవుతుంది. అందుకే మీ వారిని, పాపను ఒకసారి చర్మవ్యాధి నిపుణులకు చూపించి సరైన వ్యాధి నిర్ధారణ చేసుకోవాలి. ఆ తర్వాత ఆ రిపోర్టులన్నీ తీసుకొని జెనెటిక్‌ కౌన్సెలింగ్‌కి వెళ్తే.. పుట్టబోయే బిడ్డకు అలర్జీ వచ్చే అవకాశం ఎంత వరకు ఉందో వాళ్లు చెప్పగలుగుతారు. మీరు భయపడుతున్నట్లు ఇది బ్లడ్‌ గ్రూప్‌ మీద ఆధారపడి ఉండదు. ఏదేమైనా రెండో ప్రెగ్నెన్సీ కోసం ప్లాన్‌ చేసుకోవడం కోసం ఎలాంటి ఇబ్బందులు లేకపోవడమే మంచిది. అలాగే అలర్జీ అనేది ప్రమాదకరమైంది కాదు.. కాబట్టి మీరు దాని గురించి అంత సీరియస్‌గా ఆలోచించాల్సిన అవసరం లేదు.


Know More

నమస్తే డాక్టర్‌. నాకు పిరియడ్స్‌ రెగ్యులర్‌గా వస్తాయి. అయితే ఈమధ్యే నాకు పిరియడ్‌ మిస్‌ అయితే ఇంట్లో హోమ్‌ ప్రెగ్నెన్సీ టెస్ట్‌ చేసుకుంటే పాజిటివ్‌ అని వచ్చింది. అయితే హాస్పిటల్‌లో చేసుకుంటే వీక్‌ పాజిటివ్‌ అని డాక్టర్‌ చెప్పారు. అల్ట్రాసౌండ్‌ స్కాన్‌ చేసి Dydroboon ట్యాబ్లెట్స్‌ ఇచ్చారు. అవి వాడితే లేత గోధుమ రంగు, ఎరుపు రంగు డిశ్చార్జ్‌ లైట్‌గా అవుతుంది. అసలు నేను గర్భిణినా, కాదా తెలియట్లేదు. ఒకవేళ నేను ప్రెగ్నెంట్‌ని కాకపోతే అంతకుముందులాగా నాకు పిరియడ్స్‌ వచ్చి, నార్మల్‌ బ్లీడింగ్‌ కావాలంటే నేనేం చేయాలో చెప్పగలరు. - ఓ సోదరి


మీరు రాసిన దాన్ని బట్టి చూస్తే బహుశా మీకు గర్భం వచ్చినందుకే అది నిలవడానికి డాక్టర్‌ ఆ ట్యాబ్లెట్స్‌ ఇచ్చి ఉంటారు. అయితే లోపల పిండం సరిగ్గా ఎదుగుతుందా, లేదా తెలుసుకోవాలంటే మీరు మళ్లీ అల్ట్రాసౌండ్‌ స్కాన్‌ చేయించుకోవాల్సి ఉంటుంది. ఒకవేళ పిండం ఎదుగుదల సరిగ్గా లేకపోతే మాత్రల ద్వారా గానీ లేదా ఒక చిన్న ఆపరేషన్‌ ద్వారా గానీ గర్భాశయాన్ని శుభ్రం చేయాల్సి ఉంటుంది. ఆ తర్వాత పిరియడ్స్‌ ముందులాగే నార్మల్‌గా వస్తాయి.


Know More

హాయ్‌ మేడమ్‌. నాకు ఇటీవలే పెళ్లైంది. మాకు అప్పుడే పిల్లలు వద్దనుకుంటున్నాం. అందుకోసం సురక్షితమైన గర్భ నిరోధక పద్ధతులు ఏమున్నాయో చెప్పగలరు. అలాగే గర్భం రాకూడదంటే రుతుచక్రంలో అండం విడుదలయ్యే రోజుల్ని ఎలా లెక్క పెట్టుకోవాలి? ఆ రోజుల్లో కలవకుండా, ఇతర రోజుల్లో కలిసినా గర్భం వచ్చే అవకాశాలేమైనా ఉన్నాయా? దయచేసి సలహా ఇవ్వండి. - ఓ సోదరి


ప్రస్తుతం మనకు ఎన్నో రకాల సురక్షితమైన గర్భ నిరోధక పద్ధతులు అందుబాటులో ఉన్నాయి. అయితే అందరికీ ఒకే పద్ధతి పని చేయకపోవచ్చు. ఎవరికి ఏ పద్ధతి సరైనది అని తెలుసుకోవడానికి డాక్టర్లు ఎన్నో విషయాలు పరీక్షించి చూస్తారు. ఉదాహరణకు.. మీ కుటుంబ చరిత్ర, జీవనశైలి, ఆరోగ్యం.. ఇవన్నీ కూడా పరిగణనలోకి తీసుకుంటారు.

ఇక అండం విడుదలయ్యే రోజులంటే.. ఇది కూడా మీ రుతుక్రమం ఎన్ని రోజులకోసారి వస్తుందనే దానిపై ఆధారపడి ఉంటుంది. మామూలుగా నెలసరి రావడానికి 14 రోజుల ముందుగా అండం విడుదలవుతుంది. అంటే.. మీరు 10వ రోజు నుంచి 20వ రోజు వరకు రోజు విడిచి రోజు కలిసి ఉంటే గర్భం వచ్చే అవకాశాలు ఎక్కువగా ఉంటాయి. ఇక ఇతర రోజుల్లో కలిసి ఉంటే గర్భం వచ్చే అవకాశాలు తక్కువే అయినా పూర్తిగా రాదని చెప్పలేం. ఎందుకంటే ఒక్కోసారి రుతుచక్రంలో అండం ఏ రోజైనా విడుదల కావచ్చు.


Know More

హలో డాక్టర్‌. మా పాపకు 20 నెలలు. నేను తనకు పాలు మాన్పించాలనుకుంటున్నా. అయితే నా రొమ్ముల్లో పాల గడ్డలు రాకుండా ఉండాలంటే ఏ మాత్రలు వాడచ్చు? ఇవి కాకుండా సహజసిద్ధమైన మార్గాలేమైనా ఉన్నాయా? - ఓ సోదరి


ఏ దశలో అయినా సరే పాలివ్వడం మొదలుపెట్టాక.. తిరిగి ఆపేసినప్పుడు కొద్ది రోజులు రొమ్ములు గట్టిపడడం, నొప్పిగా ఉండడం సహజమే! ఏ మాత్రలు వాడినా కూడా ఒకసారి మొదలైన లాక్టేషన్‌ మీద ప్రభావం చూపలేవు. కొన్ని ప్రత్యేక సందర్భాలలో కొన్ని కారణాల వల్ల కాన్పు జరిగిన వెంటనే అసలు పాల తయారీ మొదలు కాకుండా ఉండాలంటే Cabergolin అనే మాత్రలు కొద్ది రోజుల పాటు వాడచ్చు. ఒకసారి పాలివ్వడం మొదలుపెట్టాక ఇవి కూడా పనిచేయవు. అయితే పూర్తిగా పాలివ్వడం మానేసిన తర్వాత నొప్పి తగ్గడానికి కొద్ది రోజులు పారాసిటమాల్‌ వంటి మాత్రలు వేసుకోవడం, కాపడం పెట్టుకోవడం, చక్కటి ఆసరా ఇచ్చే బ్రా వేసుకోవడం.. వంటివి చేస్తే రెండుమూడు రోజుల్లో ఫలితం ఉంటుంది.


Know More

హలో డాక్టర్‌. నాకు సిజేరియన్‌ అయి 5 నెలలవుతోంది. గత నెలలో నా కుట్లు చీము పట్టాయి. డాక్టర్‌ని సంప్రదిస్తే మందులిచ్చారు. ఇప్పుడు కాస్త తగ్గాయి.. కానీ ఇన్ని రోజులైనా ఇంకా నా కుట్లు ఎందుకు పచ్చిగానే ఉన్నాయి. ఇవి త్వరగా మానాలంటే ఏం చేయాలి? చెప్పగలరు. - ఓ సోదరి


మామూలుగా ఆపరేషన్‌ అయిన 48 గంటల్లోనే చర్మం చివర్లు దగ్గరికొచ్చేస్తాయి (ప్రైమరీ హీలింగ్‌ పూర్తవుతుంది). వారం రోజుల కల్లా ఇంకా కుట్లలో పచ్చిదనం ఉండకూడదు. అయితే మీకు ఐదు నెలలవుతున్నా ఇంకా చీము వస్తోందంటే.. కాస్త క్లిష్టమైన ఇన్ఫెక్షన్‌ ఏదైనా ఉందని అర్థం. దీనికి రకరకాల కారణాలుండచ్చు. మీకు రక్తహీనత ఉన్నా, మీ వ్యాధి నిరోధక వ్యవస్థ బలహీనంగా ఉన్నా, మీకు చాలా సేపు నొప్పులొచ్చి ఉమ్మనీరు పోయాక ఆలస్యంగా సిజేరియన్‌ చేసినా.. ఇలా ఇన్ఫెక్షన్‌ రావడానికి అవకాశం ఉంటుంది. ఈ చీమును కల్చర్‌ అండ్‌ సెన్సిటివిటీ పరీక్షకు పంపించడం ద్వారా ఏ మందులు పనిచేస్తాయో తెలుసుకొని ఆ మందులు వాడితే కొంత వరకు ఫలితం ఉండచ్చు. అయినా కూడా తగ్గకపోతే.. లోపల ఫేషియాకు వేసిన సూచర్‌ మెటీరియల్ (కరిగిపోని దారం) ఉంటుంది. ఆపరేషన్‌ చేసిన చోట తిరిగి ఓపెన్‌ చేసి ఆ దారమంతా తీసేసి, లోపలి వరకు శుభ్రం చేసి, మళ్లీ తాజాగా కుట్లు వేయాల్సి ఉంటుంది.


Know More

నమస్తే మేడం. నా వయసు 26. పెళ్లై ఆరేళ్లయింది. నాకు 4 ఏళ్ల బాబున్నాడు. ఈమధ్యే మళ్లీ బాబు పుట్టాడు. అయితే మా రెండో బాబు రెండు చెవులు, ఒక ముక్కు రంధ్రం మూసుకుపోయి పుట్టాడు. కిడ్నీలో వాపుందని, గుండె సమస్య కూడా ఉందని చెప్పారు. ఆసుపత్రిలో ఉన్నప్పుడు శ్వాస తీసుకోలేకపోతున్నాడని ఆక్సిజన్‌ పెట్టే ఉంచారు. ఇక ఐదు రోజులకు ఇంటికి తీసుకొచ్చాక చనిపోయాడు. అసలు ఇలా బిడ్డ అవయవలోపంతో పుట్టడానికి ఏవైనా కారణాలున్నాయా? దీని ప్రభావం మరో ప్రెగ్నెన్సీపై ఏమైనా ఉంటుందా? దయచేసి సలహా ఇవ్వండి. - ఓ సోదరి


మీ రెండో బాబు దురదృష్టవశాత్తూ చనిపోయాడంటే అందుకు పుట్టుకతోనే వచ్చే అనేక లోపాలు కారణం అని అర్థమవుతుంది. ఎందుకంటే మీరు ముక్కు, చెవులు, కిడ్నీ, గుండె.. వీటన్నింటిలో తేడాలున్నాయని రాశారు. మరి ఇవన్నీ గమనించినప్పుడు.. మీరు గర్భవతిగా ఉన్నప్పుడు గానీ, బాబు పుట్టాక గానీ.. మీకు, బాబుకి ఎలాంటి పరీక్షలైనా జరిగాయా? మామూలుగా పుట్టుకతోనే వచ్చే అవయవలోపాలు క్రోమోజోముల్లో గానీ, జీన్స్‌లో గానీ లోపాలుంటే వస్తాయి. బిడ్డను వివరంగా పరీక్షించడం ద్వారా వివిధ రకాల సిండ్రోమ్స్‌ని కూడా గుర్తిస్తారు. మీకు తర్వాతి ప్రెగ్నెన్సీ గురించి అవగాహన కావాలంటే ఈ బాబు వివరాలన్నీ తీసుకొని జెనెటిక్‌ కౌన్సెలింగ్‌కి వెళ్లాలి. అప్పుడే పుట్టబోయే బిడ్డకు ఇలా జరగడానికి ఎంత శాతం అవకాశం ఉంటుంది? అదీ మీరు గర్భవతిగా ఉండగా మొదటి లేదా రెండో త్రైమాసికంలోనే గుర్తించగలుగుతామా?.. వంటి విషయాలన్నీ మీకు చెప్పగలుగుతారు.


Know More

నమస్తే మేడమ్. నాకు పెళ్లై 8 ఏళ్లవుతోంది. నాకు ఈ మధ్య కలయిక సమయంలో వెజైనా నుంచి బ్లడ్‌ క్లాట్స్‌, చీములా బయటికి వస్తోంది. ఇదేమైనా సమస్యా? ఈ సమస్య నుంచి బయటపడాలంటే ఎలాంటి చికిత్సలు చేయించుకోవాలి? దయచేసి చెప్పండి. - ఓ సోదరి


కలయిక తర్వాత రక్తం, చీము బయటికి రావడం అనేది ఏమాత్రం మంచిది కాదు. తప్పనిసరిగా మీరు గైనకాలజిస్ట్‌ దగ్గరికి వెళ్లి పరీక్షలు చేయించుకోవాలి. ఎందుకంటే గర్భాశయ ద్వారంలో ఎరోజన్‌ (Erosion) ఉన్నా, పాలిప్స్‌ ఉన్నా, క్యాన్సర్ ఉన్నా కూడా ఇలాంటి లక్షణాలే కనిపిస్తాయి. అలాగే గర్భాశయం లోపల సమస్యలున్నా కూడా ఇలాగే జరుగుతుంది. కాబట్టి డాక్టర్‌ మీకు పాప్‌స్మియర్‌, హెచ్‌పీవీ పరీక్ష, అల్ట్రాసౌండ్‌ స్కాన్‌ చేయడం ద్వారా వ్యాధి నిర్ధారణ చేయగలుగుతారు. అందుకే ఆలస్యం చేయకుండా డాక్టర్‌ని సంప్రదించడం మంచిది.


Know More

హలో డాక్టర్‌. నా వయసు 30. నాకు ఎనిమిదేళ్ల బాబున్నాడు. రెండోసారి గర్భం ధరించినప్పుడు నాకు చికెన్‌పాక్స్‌ సమస్య వచ్చింది. దీనివల్ల బేబీకి అవయవ లోపం రావచ్చన్న ఉద్దేశంతో మూడో నెలలోనే అబార్షన్‌ చేశారు. ఇప్పుడు మేము మళ్లీ గత మూడు నెలల నుంచి ప్రెగ్నెన్సీ కోసం ప్లాన్‌ చేసుకుంటున్నాం. కానీ సక్సెసవ్వట్లేదు. డాక్టర్‌ని సంప్రదిస్తే ఫాలోపియన్‌ ట్యూబ్స్‌లో బ్లాక్స్‌ ఏమీ లేవని, అయితే నా అండం పరిమాణంలో పెరుగుదల లేదని అన్నారు. నాకు నెలసరి సమస్యలు కూడా ఏమీ లేవు. నేను త్వరగా గర్భం ధరించాలంటే ఏం చేయాలో చెప్పండి. - ఓ సోదరి


మీరు మూడు నెలల నుంచి ప్రెగ్నెన్సీ కోసం ప్రయత్నిస్తున్నా సక్సెసవ్వట్లేదని చెబుతున్నారు. అయితే ఒకవేళ అండం పరిమాణంలో పెరుగుదల లేకపోతే దాని కోసం ప్రత్యేకంగా మందులు వాడాల్సి ఉంటుంది. ఏదేమైనా త్వరగా గర్భం ధరించడమనేది మన చేతిలో లేదు. ఎలాంటి సమస్యలు లేకపోయినప్పటికీ ఒక సంవత్సర కాలంలో వంద ప్రయత్నాల్లో 60-70 శాతం మాత్రమే సక్సెసవుతాయి. అందుకే ఇంకా కొన్ని రోజులు సాధారణంగానే ప్రయత్నించి చూడండి. ఒకవేళ అప్పటికీ గర్భం నిలవకపోతే దానికి అవసరమైన చికిత్స తీసుకోవచ్చు.


Know More

హలో డాక్టర్‌. నా వయసు 26. పెళ్లై ఆరేళ్లవుతోంది. నాకు ఒక పాప. పాప పుట్టాక రెండేళ్లకి నాకు థైరాయిడ్‌ ఉందని తెలిసింది. అప్పట్నుంచి 75mcg మాత్రలు వాడుతున్నా. నెలసరి సమయానికే వస్తుంటుంది.. కానీ పిరియడ్స్ పూర్తయ్యాక కడుపు నొప్పిగా ఉంటుంది. అలాగే ప్రస్తుతం మేము మరో బేబీ కోసం ప్రయత్నిస్తున్నాం. కానీ సక్సెసవ్వట్లేదు. పిల్లలు పుట్టే మార్గం చెప్పండి. - ఓ సోదరి


మీరు బిడ్డ కోసం ప్రయత్నించడం మొదలుపెట్టి ఏడాది దాటితే ఎందుకు సక్సెసవ్వట్లేదో తప్పనిసరిగా పరీక్షలన్నీ చేయించుకోవాల్సి ఉంటుంది. అండం విడుదల కోసం, హార్మోన్ల స్థాయుల కోసం, ఫెలోపియన్‌ ట్యూబుల్లో అడ్డంకులు లేవని నిర్ధారించుకోవడానికి.. పరీక్షలు చేయించుకోవాల్సి ఉంటుంది. అలాగే మీ వారికి సెమెన్‌ అనాలసిస్‌ పరీక్ష కూడా చేయాల్సి ఉంటుంది. మీకు దగ్గర్లోని గైనకాలజిస్ట్‌ని సంప్రదిస్తే ఈ పరీక్షలన్నీ చేసి చూసి మీకు ఏ చికిత్స ద్వారా పిల్లలు పుడతారో చెప్పగలుగుతారు.


Know More

మేడమ్‌.. నా వయసు 27. 2013లో బాబు పుట్టాడు.. ఈ మధ్యే పాప పుట్టింది. ఇప్పుడు పాప వయసు ఏడు నెలలు. సి-సెక్షన్‌ డెలివరీ అయింది. ప్రసవం తర్వాత బ్లీడింగ్‌, కడుపునొప్పి బాగా వస్తున్నాయి. అలాగే నీరసం, కాళ్లు, చేతులు నొప్పి పుట్టడం, లాగడం.. వంటి సమస్యలొస్తున్నాయి. ఈ సమస్యలకు తగిన పరిష్కారం చెప్పండి. - ఓ సోదరి


మీరు పాప వయసు ఏడు నెలలు అని రాశారు.. కానీ ఇంకా పాలిస్తున్నారో లేదో రాయలేదు. పాలిచ్చేటప్పుడు తప్పనిసరిగా ఐరన్‌, క్యాల్షియం, విటమిన్లు.. మొదలైన సప్లిమెంట్స్‌ వాడాలి. లేకపోతే మీకు నీరసం, నొప్పులు రావడం సహజం. ఇక బ్లీడింగ్‌, కడుపునొప్పి ఎందుకొస్తున్నాయో తెలుసుకోవడానికి మీరు తప్పనిసరిగా గైనకాలజిస్ట్‌ని సంప్రదించి అల్ట్రాసౌండ్‌ స్కాన్‌, రక్తపరీక్షలు.. మొదలైనవి చేయించుకోవాల్సి ఉంటుంది.


Know More

హలో మేడం. నా వయసు 25. నాకు ప్రెగ్నెన్సీ కన్ఫర్మ్‌ అయ్యాక ఓసారి కళ్లు తిరిగి పడిపోయాను. అప్పుడు నాకు టెస్ట్‌ చేసి ట్యూబల్‌ ప్రెగ్నెన్సీ వచ్చింది.. లోపల పిండం బర్‌స్ట్‌ అయిపోయిందని చెప్పారు. ల్యాప్రోస్కోపీ సర్జరీ చేసి తీసేశారు. నాకు ఈ ఆపరేషన్‌ జరిగి 8 నెలలవుతోంది. ఇప్పుడు మళ్లీ పిల్లల కోసం ట్రై చేద్దామనుకుంటున్నాం. మళ్లీ మొదటిసారిలాగే జరిగే అవకాశం ఉంటుందా? - ఓ సోదరి


మీకు ట్యూబల్‌ ప్రెగ్నెన్సీ కోసం ల్యాప్రోస్కోపీ చేసినప్పుడు రెండో ఫెలోపియన్‌ ట్యూబ్‌ ఎలా ఉందో తప్పనిసరిగా డాక్టర్లు గమనించి ఉంటారు. ఒకవేళ ఆ ట్యూబు ఆరోగ్యంగా ఉంటే తిరిగి ఎక్టోపిక్‌ ప్రెగ్నెన్సీ రావడానికి ఐదు నుంచి పది శాతం వరకు అవకాశాలుంటాయి. ఒకవేళ ఆ ట్యూబు ఆరోగ్యంగా లేకపోతే అంటే ఎండోమెట్రియోసిస్‌, టీబీ, అతుకులు, పీఐడీ.. వంటి జబ్బులుంటే మొదటిసారి లాగే జరగడానికి అవకాశాలు చాలా ఎక్కువగానే ఉంటాయి. అయినా ఈసారి ప్రెగ్నెన్సీ ప్లాన్‌ చేసుకునే ముందు ఓసారి గైనకాలజిస్ట్‌ని సంప్రదిస్తే మీ రిపోర్టుల్ని బట్టి ఏ జాగ్రత్తలు పాటించాలో సూచిస్తారు.


Know More

హలో డాక్టర్‌. నా వయసు 26. ఎత్తు 5’5’’. బరువు 62 కిలోలు. పెళ్లై రెండు నెలలవుతోంది. మూడేళ్ల క్రితం నేను ఉద్యోగరీత్యా బెంగళూరు వెళ్లాను. అప్పట్నుంచి నాకు పిరియడ్స్‌ వచ్చాక రెండు రోజులే బ్లీడింగ్‌ అవుతోంది. ఇదేమైనా సమస్యా? దీనివల్ల ప్రెగ్నెన్సీ ఆలస్యమవుతుందా? సలహా ఇవ్వగలరు. - ఓ సోదరి


మీ సమస్యకు ప్రదేశంలో మార్పు, అక్కడి వాతావరణంలో మార్పు కొంతవరకు కారణం కావచ్చు. కానీ ఇతరత్రా ఏమైనా సమస్య ఉందేమో తెలుసుకోవాలంటే ఇంకా కొన్ని వివరాలు కావాలి. బరువు పెరిగారా?, ఉద్యోగంలో ఒత్తిడి ఎక్కువైందా? అన్న విషయాలు కూడా తెలియాలి. ఒకసారి అల్ట్రాసౌండ్‌ స్కాన్‌, హార్మోన్‌ టెస్టులు చేయించుకుంటే హార్మోన్ల అసమతుల్యత ఉందేమో అర్థమవుతుంది. ఒకవేళ రిపోర్టులన్నీ నార్మల్‌గా ఉంటే గర్భం రావడానికి ఇది సమస్య కాదు.


Know More

నమస్తే డాక్టర్‌. నా వయసు 29. నాకు 18 నెలల బాబున్నాడు. నాకు ప్రెగ్నెన్సీ డయాబెటిస్‌ ఉంది. దాన్నెలా తగ్గించుకోవాలి? అలాగే నాకు తరచుగా చంకలో గడ్డలు వస్తుంటాయి. వేసవి కాలం ఈ సమస్య మరింతగా ఉంటుంది. ఈ రెండు సమస్యలకు తగిన పరిష్కారం చెప్పండి. - ఓ సోదరి


మీకు ప్రెగ్నెన్సీ డయాబెటిస్‌ ఉందంటే ప్రెగ్నెన్సీలో వచ్చిన డయాబెటిస్‌ ఇంకా కొనసాగుతోందా? లేదంటే తగ్గిపోయిందా? అన్న విషయంలో స్పష్టత లేదు. ఒకవేళ మొదటి ప్రెగ్నెన్సీలో డయాబెటిస్‌ వచ్చి కాన్పు తర్వాత తగ్గిపోయి ఉంటే మీరు సరైన జీవనశైలిని పాటించడం, ఆహార-వ్యాయామ నియమాలు పాటించడం.. తప్పనిసరిగా చేయాలి. తర్వాత ప్రెగ్నెన్సీలో కూడా ఈ డయాబెటిస్‌ రావడానికి అవకాశాలు ఉంటాయి. అందుకని ప్రెగ్నెన్సీకి ప్లాన్‌ చేసుకునే ముందు ఓసారి డాక్టర్‌ని సంప్రదించడం మంచిది. ఒకవేళ ప్రెగ్నెన్సీలో వచ్చి ఇప్పటికీ డయాబెటిస్‌ కొనసాగుతున్నట్లయితే మీరు ఫిజీషియన్‌ సలహాతో దానికి చికిత్స తీసుకోవాల్సి ఉంటుంది.

ఇక వేసవిలో చంకలో గడ్డలు రావడం అనేది హెయిర్‌ ఫాలికల్‌ ఇన్ఫెక్షన్‌ వల్ల వస్తుంది. ఒకసారి చర్మ వ్యాధి నిపుణులను సంప్రదించండి.


Know More

హలో డాక్టర్‌. నా వయసు 22. ఎత్తు 5’3’’. బరువు 55 కిలోలు. నాకు పీసీఓఎస్‌ ఉంది. డాక్టర్‌ మూడు నెలల కోర్సు ఇచ్చారు. ఈ కోర్సు పూర్తయిన తర్వాత రెండు నెలలు పిరియడ్స్‌ బాగానే వచ్చాయి. ఆ తర్వాత ఒక నెల పిరియడ్స్‌ రాలేదు. తర్వాతి నెలలో వచ్చినా బ్లీడింగ్‌ అవ్వలేదు. ఆపై నెలలో పిరియడ్స్‌ రెండు రోజుల ముందే వచ్చాయి.. పది రోజుల పాటు బ్లీడింగ్‌ అయింది. కానీ ఇప్పుడు ఐదు రోజుల ముందే నెలసరి వచ్చింది.. బ్లీడింగ్‌ ఎక్కువగా ఉంది.. ఇలా పిరియడ్స్‌ విషయంలో రెగ్యులారిటీ అంటూ లేదు. బ్లీడింగ్‌ కూడా విపరీతంగా అవుతోంది.. నా సమస్యకు పరిష్కారమేంటి? - ఓ సోదరి


మీకు ఇప్పటికే పీసీఓఎస్‌ ఉందని నిర్ధారణ జరిగింది. మీరు మూడు నెలల కోర్సు కూడా వాడానని రాశారు. అయితే పీసీఓఎస్‌ ఉన్న వారికి హార్మోన్ల అసమతుల్యత వల్ల నెలసరి ముందూ వెనుక గానీ, బ్లీడింగ్‌లో హెచ్చుతగ్గులు గానీ జరగొచ్చు. పీసీఓఎస్‌ అనేది కొద్ది నెలల చికిత్సతో పూర్తిగా నయమైపోయే వ్యాధి కాదు. ఈ అసమతుల్యత జీవితాంతం ఉంటుంది. అందుకని డాక్టర్ల పర్యవేక్షణలో దీర్ఘకాలికంగా చికిత్స తీసుకోవాల్సి ఉంటుంది.


Know More

నమస్తే డాక్టర్‌. నాకు రెండుసార్లు అబార్షన్‌ అయింది. కడుపులోని బిడ్డకు హార్ట్‌ బీట్‌ లేదని మొదటిసారి తీసేశారు. రెండోసారి మొదట హార్ట్‌ బీట్‌ వచ్చినా.. 8 వారాలకు చేసిన స్కాన్‌లో హార్ట్‌ బీట్‌ లేదన్నారు. ఈ రెండుసార్లు నాకు Subchorionic Hematoma Issues వచ్చాయి. నేను APLAS, Thyroid Beta, CBR టెస్టులు చేయించుకున్నా. ఏ సమస్యా లేదన్నారు. ఇప్పుడు మూడోసారి ప్రెగ్నెన్సీ కోసం ప్రయత్నిద్దామంటే ఈసారి కూడా గతంలోలాగే జరుగుతుందేమోనని భయమేస్తోంది. నాకు పిల్లలు పుట్టే మార్గం చెప్పండి. - ఓ సోదరి


మీకు ఇప్పటికే రెండుసార్లు వరుస అబార్షన్లు అయ్యాయి కాబట్టి మీరు ఇదివరకే చేయించుకున్న పరీక్షలతో పాటు అదనంగా ఇంకా కొన్ని పరీక్షలు చేయించుకోవాల్సి ఉంటుంది. 3D-ట్రాన్స్‌ వెజైనల్‌ స్కాన్‌ ద్వారా గర్భాశయంలో ఏవైనా లోపాలున్నాయేమో చూడాలి. అలాగే క్రోమోజోముల్లో గానీ జీన్స్‌లో గానీ లోపాలుండడం వల్ల కూడా వరుస గర్భస్రావాలు జరగచ్చు. దీనికోసం క్రోమోజోమ్‌ టెస్టులు.. ఒకవేళ అది నార్మల్‌గా ఉంటే కొన్ని ముఖ్యమైన జీన్స్‌ టెస్టులు చేయించుకోవాలి. మీకు రక్తంలో హోమోసిస్టిన్‌ స్థాయి ఎక్కువగా ఉందేమో చూడాలి. అలాగే ఒకసారి మీవారికి కూడా సెమెన్‌ ఎనాలిసిస్‌ వివరంగా చేయాలి. మీ హార్మోన్లన్నీ సమతుల్యంగా ఉన్నాయో, లేదో చూసుకోవాలి. ఈసారి ప్రెగ్నెన్సీకి ప్లాన్‌ చేసుకునే ముందు ఇవన్నీ చేయించుకొని ప్లాన్‌ చేసుకోండి.


Know More

నమస్తే మేడమ్‌. నా వయసు 22. నాకు పీసీఓఎస్‌ ఉందని ఇటీవలే తెలిసింది. ఇది దీర్ఘకాలిక సమస్య అని, పూర్తిగా నయం కాదని చదివాను. అప్పట్నుంచి ఏదో తెలియని భయం. ఇది నిజంగానే నయం కాని వ్యాధా? పీసీఓఎస్‌ ఉంటే ఎలాంటి జాగ్రత్తలు పాటించాలి? - ఓ సోదరి


పీసీఓఎస్‌ అనేది దీర్ఘకాలిక సమస్య అని మీరు చదివింది సరైందే.. కానీ భయపడడం అనవసరం. పీసీఓఎస్‌ ఉన్నా కూడా అది ఎప్పటికీ మిమ్మల్ని వేధిస్తూనే ఉంటుందని అనుకోనవసరం లేదు. దాన్ని అదుపులో ఉంచుకోవడానికి ఆరోగ్యకరమైన జీవనశైలిని పాటించడం అన్నింటికంటే ముఖ్యమైనది. బరువు ఎప్పుడూ అదుపులో ఉండాలి. వ్యాయామం చేయడం మీ జీవనశైలిలో ఒక భాగం కావాలి. అయితే పీసీఓఎస్‌లో ఉండే హార్మోన్ల అసమతుల్యతను, మెటబాలిక్‌ సమస్యల్ని సరిచేయడానికి చక్కని మందులున్నాయి. అలాగే గర్భం నిలవకపోతే అండం విడుదల కోసం వాడడానికి కూడా మంచి మందులున్నాయి. ఇవన్నీ కూడా సత్ఫలితాలనిస్తాయి. కాబట్టి మీరు చేయాల్సింది ఆరోగ్యకరమైన జీవనశైలిని పాటించడంతో పాటు డాక్టర్ల పర్యవేక్షణలో ఎప్పటికప్పుడు చెకప్‌ చేయించుకుంటూ ఉండాలి.


Know More

డాక్టర్‌.. నా వయసు 32. నేను నెల రోజులుగా ఐయూఐ చేయించుకుంటున్నాను. కానీ పిరియడ్‌ వచ్చింది. మా డాక్టర్‌ నాకు 14వ రోజు ఐయూఐ చేశారు. నాకు 16 లేదా 17వ రోజున అండం విడుదలవుతుందని చెప్పి ముందే ఎందుకు చేశారో అర్థం కాలేదు. అలాగే పిరియడ్‌ వచ్చాక రెండో రోజు రమ్మన్నారు. ఈ ట్రీట్‌మెంట్‌ వల్ల చాలా నొప్పిగా ఉంటోంది.. భయమేస్తోంది. అసలు ఇది సక్సెసవుతుందా? దయచేసి చెప్పండి. - ఓ సోదరి


మీ డాక్టర్‌ ఐయూఐ ఫలానా రోజు చేసే ముందు అండం ఎప్పుడు విడుదలవుతుందో అల్ట్రాసౌండ్ స్కాన్‌ ద్వారా నిర్ధారించుకున్న తర్వాతే చేస్తారు. అదీ ఒక నెలలో ఒకసారి గానీ లేదా రెండుసార్లు మాత్రమే చేస్తారు. మీరు ఐయూఐ ఎందుకు చేయించుకోవాలనుకున్నారో కారణం రాయలేదు. ఏమైనా ఐయూఐ సక్సెసయ్యే అవకాశాలు నూటికి 10-15 శాతం వరకు మాత్రమే ఉంటాయి. అత్యధికంగా ఆరు నెలలు మాత్రమే ఈ చికిత్స ప్రయత్నించడానికి వీలుంటుంది. ఇది సక్సెస్‌ కాకపోతే సాధారణంగా ఐవీఎఫ్‌ చికిత్స సూచిస్తారు.


Know More

హాయ్‌ మేడమ్‌.. నా రెండు రొమ్ముల్లో గడ్డలున్నాయి. వాటివల్ల కొన్నిసార్లు నొప్పిగా ఉంటుంది.. మరికొన్ని సార్లు నొప్పేమీ ఉండట్లేదు. స్కానింగ్‌ చేయించుకొని ట్యాబ్లెట్స్‌ వాడాను. మళ్లీ కొన్ని నెలల తర్వాత గడ్డలు ఏర్పడ్డాయి. అప్పుడు మళ్లీ స్కానింగ్‌ చేయించుకుంటే రిపోర్ట్స్‌లో నార్మల్‌ అని వచ్చింది.. కానీ నాకు మాత్రం గడ్డలున్నట్లుగా తెలుస్తోంది. మా నాయనమ్మ అవి పాల గడ్డలు అని చెబుతోంది.. ప్రస్తుతం నాకు నాలుగేళ్ల బాబున్నాడు. అసలు ఎందుకిలా అవుతుంది? ఇదేమైనా సమస్యా? దయచేసి చెప్పండి. - ఓ సోదరి


Know More

మేడమ్‌.. నాకు పెళ్లై ఎనిమిదేళ్లవుతోంది.. ఇంకా పిల్లల్లేరు. నాకు థైరాయిడ్‌ సమస్య ఉంది (TSH-6.19). అలాగే కిడ్నీలో రాళ్లున్నాయి. నేను, మా వారు చెకప్స్‌ చేయించుకుంటున్నాం.. మా వారికి స్పెర్మ్‌ కౌంట్‌ 30 మిలియన్లు ఉన్నాయి. మాకు పిల్లలు పుట్టే మార్గం చెప్పండి. - ఓ సోదరి


పెళ్లై ఎనిమిదేళ్లయిందన్నారు కానీ మీ వయసెంతో రాయలేదు. ఇప్పటికే ఎనిమిదేళ్లంటే చెకప్స్‌ కాకుండా చికిత్స తప్పనిసరిగా తీసుకోవాలి. ఇందుకోసం పరీక్షలన్నీ వివరంగా చేయాల్సి ఉంటుంది. మీ గర్భాశయం - అండాశయాలు ఎలా ఉన్నాయో; మీ ఫెలోపియన్‌ ట్యూబ్స్‌లో అడ్డంకులేవీ లేకుండా తెరుచుకొని ఉన్నాయో, లేదో; మీ హార్మోన్ల సమతుల్యం ఎలా ఉందో.. ఈ వివరాలన్నీ తెలుసుకోవాలి. అలాగే మీవారి స్పెర్మ్‌ కౌంట్‌ బాగానే ఉన్నా కదలిక ఎంత శాతం ఉందో, ఆరోగ్యంగా ఉన్న స్మెర్మ్స్‌ ఎంత శాతం ఉన్నాయో ఆ వివరాలు కూడా కావాలి. మీ థైరాయిడ్‌ సమస్య కూడా TSH స్థాయి 6.19 ఉందని రాశారు. కానీ మీకు పిల్లలు కావాలంటే ఈ స్థాయి 2.5 కంటే తక్కువగా ఉండాలి. ఒకసారి మీకు దగ్గర్లో ఉన్న ఐవీఎఫ్‌ స్పెషలిస్ట్‌ని సంప్రదిస్తే మీకు ఏ చికిత్స ద్వారా గర్భం నిలుస్తుందో సూచించగలుగుతారు.


Know More

హాయ్‌ మేడమ్‌.. నా వయసు 34 ఏళ్లు. నాకు పీసీఓఎస్‌ ఉంది. అవాంఛిత రోమాలు బాగా వస్తున్నాయి. దీనివల్ల నలుగురిలోకీ వెళ్లలేకపోతున్నా.. ఈ సమస్యకేదైనా పరిష్కార మార్గం చెప్పండి. - ఓ సోదరి


పీసీఓఎస్‌ ఉన్న వారికి శరీరంలో ఆండ్రోజన్‌ స్థాయులు ఎక్కువగా ఉండడం వల్ల అవాంఛిత రోమాలు ఎక్కువగా పెరుగుతాయి. దీనికోసం రెండు రకాల చికిత్సలు అవసరమవుతాయి.
మొదటిది- అంతర్గతంగా ఉన్న హార్మోన్ల అసమతుల్యతకు చికిత్స చేయడం. దీనికోసం యాంటీ ఆండ్రోజన్‌ ఉన్న కాంట్రాసెప్టివ్‌ పిల్స్ డాక్టర్ల సలహా మేరకు వాడాలి. మీ బరువు ఎక్కువగా ఉంటే అది తగ్గడానికి ఆహార నియమాలు పాటిస్తూ వ్యాయామాలు చేయాలి.
రెండోది- కాస్మెటిక్‌ చికిత్స తీసుకోవాల్సి ఉంటుంది. ఇది ఏదైనా బ్యూటీ పార్లర్‌లో త్రెడింగ్‌ ద్వారా కానీ, వ్యాక్సింగ్‌ ద్వారా కానీ అవాంఛిత రోమాలు తొలగించడం లేదా శాశ్వతంగా పరిష్కారం కావాలంటే లేజర్‌ ద్వారా తొలగించాల్సి ఉంటుంది. అయితే మొదటి చికిత్స తీసుకోకుండా రెండోది సరిగ్గా పనిచేయదు.


Know More

హలో మేడమ్‌. నా వయసు 21 ఏళ్లు. పిరియడ్స్‌ సమయంలో, మూత్ర విసర్జనకు వెళ్లినప్పుడల్లా మంటగా ఉంటోంది. నాకు యూరిన్‌ ఇన్ఫెక్షన్‌ ఉంది. ఆస్పత్రిలో చూపించుకొని ట్యాబ్లెట్స్‌ వాడినా, నీళ్లు ఎక్కువగా తాగుతున్నా సమస్య తగ్గట్లేదు. నా సమస్యకు పరిష్కారమేంటో చెప్పండి. -ఓ సోదరి


మీరు రాసిన వివరాలను బట్టి మీకు యూరినరీ ఇన్ఫెక్షన్‌ తరచుగా వస్తోందని అర్ధమవుతోంది. ఇలా రావడానికి కొన్ని కారణాలుంటాయి. మీకు ఇన్ఫెక్షన్‌ కలుగజేస్తోన్న బ్యాక్టీరియా మందులకు లొంగకపోవచ్చు. లేదంటే మీకు మూత్ర వ్యవస్థలో రాళ్లు, అడ్డంకులు.. వంటి సమస్యలుండచ్చు. మీకు వ్యాధి నిరోధక శక్తి తక్కువగా ఉండచ్చు.. లేదా డయాబెటిస్‌ వంటి వ్యాధులుండచ్చు.

ఇలా తరచూ వచ్చే వారిలో ఒక్కోసారి కలయిక సమయంలో భర్త దగ్గర్నుంచి కూడా ఇన్ఫెక్షన్ సంక్రమించే అవకాశాలుంటాయి. అందుకే ఇలాంటి ఇన్ఫెక్షన్లను నిర్ధారించే పరీక్షలతో పాటు, షుగర్ టెస్టు, యూరిన్ కల్చర్ అండ్ సెన్సిటివిటీ పరీక్ష, అల్ట్రాసౌండ్ స్కాన్ మొదలైనవి చేయించుకోవాల్సి ఉంటుంది. ఒకవేళ వీటిలో కారణం దొరక్కపోతే ఒకసారి నెఫ్రాలజిస్ట్‌ని సంప్రదించడం మంచిది.


Know More

హాయ్‌ మేడమ్‌. నాకు గత రెండు నెలల నుంచి పిరియడ్స్‌ రావట్లేదు. దాంతో ఇంట్లోనే ప్రెగ్నెన్సీ టెస్ట్‌ చేసుకుంటే నెగెటివ్‌ వచ్చింది. ఆ తర్వాత కొన్నాళ్లకు మూత్రంలో రక్తం కనిపించింది. డాక్టర్‌ని సంప్రదిస్తే మరోసారి హోమ్‌ ప్రెగ్నెన్సీ టెస్ట్‌ చేసుకోమన్నారు. అప్పటికీ నెగెటివ్‌ వస్తే పిరియడ్‌ రావడానికి మందులు వేసుకోమన్నారు. ఈ సమయంలో అవి వేసుకోవడం సరైందేనా? ఇతర పరీక్షలేమైనా చేయించుకోవాలా? చెప్పండి. - ఓ సోదరి


మీకు ప్రెగ్నెన్సీ టెస్ట్‌ రెండుసార్లు నెగెటివ్‌ వచ్చింది కనుక ప్రస్తుతం పిరియడ్‌ రావడానికి మీ డాక్టర్‌ మందులు వేసుకోమన్నారు. అయితే ఇది తాత్కాలిక పరిష్కారం మాత్రమే! కానీ తరచూ ఇలాగే అవుతుంటే మాత్రం తప్పనిసరిగా కారణం తెలుసుకోవడానికి పరీక్షలు చేయించుకోవాల్సి ఉంటుంది. వీటిలో అల్ట్రాసౌండ్‌ స్కాన్‌, హార్మోన్ల పరీక్షలు ముఖ్యమైనవి.


Know More

మేడమ్‌.. నాకు పెళ్లై ఆరేళ్లవుతోంది. పిల్లల్లేరు. పెళ్లైన తర్వాత తొమ్మిది నెలలకు ఒకసారి గర్భం దాల్చాను. కానీ తెలియకుండానే అప్పుడు అబార్షన్‌ అయింది. అప్పట్నుంచి మళ్లీ గర్భం రాలేదు. గత మూడేళ్లుగా థైరాయిడ్‌ సమస్య వేధిస్తోంది. ప్రస్తుతం 12.5mcg ట్యాబ్లెట్స్‌ వాడుతున్నా. నాకు పిల్లలు పుట్టే మార్గం చెప్పండి. - ఓ సోదరి


పెళ్లై ఆరేళ్లయినా పిల్లలు పుట్టలేదు అంటే తప్పనిసరిగా మీరు అవసరమైన పరీక్షలన్నీ చేయించుకోవాలి. మీకు గర్భాశయం, అండాశయాలు సరిగ్గా ఉన్నాయో, లేదో చూడాలి. అండం విడుదలవుతుందా, హార్మోన్లన్నీ సక్రమంగానే ఉన్నాయా అని పరీక్షించి చూడాలి. మీ ఫెలోపియన్‌ ట్యూబుల్లో అడ్డంకులున్నాయేమో తెలుసుకోవడానికి హిస్టెరోసాల్పింగోగ్రామ్‌ చేయించుకోవాలి. అలాగే మీ వారికి సెమెన్‌ అనాలిసిస్‌ చేయించాలి. ఈ వివరాలన్నీ పరిశీలించి చూస్తేనే గర్భం ఎందుకు నిలవట్లేదో అర్థమవుతుంది. దాన్ని బట్టి చికిత్స చేయాల్సి ఉంటుంది.


Know More

హాయ్‌ డాక్టర్. నా వయసు 25. బరువు 58 కిలోలు. నాకు పెళ్లై ఏడు నెలలవుతోంది. పిల్లల కోసం ట్రై చేస్తున్నాం. గత ఐదేళ్లుగా నేను సిస్టులతో (వాటర్‌ బబుల్స్‌తో) బాధపడుతున్నా. డాక్టర్‌ బరువు తగ్గమని సలహా ఇచ్చారు.. అయితే మొదట్లో మందులు వాడినా గత మూడేళ్ల నుంచి మందులు వాడడం ఆపేశాను. మళ్లీ చెకప్‌ కూడా చేయించుకోలేదు. ఒకవేళ నీటి బుడగలుంటే వాటిని సహజసిద్ధంగా తగ్గించుకోలేమా? నేను తల్లినయ్యే మార్గం చెప్పండి. - ఓ సోదరి


మీరు సిస్టులతో బాధపడుతున్నానని రాశారు. అంటే మీకు పీసీఓఎస్‌ సమస్య ఉండచ్చు. ప్రస్తుతం మీకు నెలసరి సక్రమంగా వస్తుందా? లేదా? అనే వివరాలు రాయలేదు. మామూలుగా అయితే పెళ్లైన ఏడు నెలలకే పరీక్షలన్నీ చేయాల్సిన అవసరం ఉండదు. కానీ మీరు ఇంతకుముందు సిస్టుల కోసం మందులు వాడానంటున్నారు కాబట్టి ఒకసారి పరిస్థితి ఎలా ఉందో తెలుసుకోవడానికి అల్ట్రాసౌండ్‌ స్కాన్‌, పూర్తి హార్మోన్ల పరీక్ష చేసి చూడాలి. పీసీఓఎస్‌ ఉన్న వారికి అండం విడుదల కాదు కాబట్టి దాని కోసం డాక్టర్ల పర్యవేక్షణలో మందులు వాడాల్సి ఉంటుంది.


Know More

హలో డాక్టర్‌. నా వయసు 23. 14 ఏళ్లకు రజస్వల అయ్యాను. ఇప్పుడు నాకు నెలకు రెండుసార్లు పిరియడ్స్‌ వస్తున్నాయి. 21 ఏళ్లున్నప్పుడు ఇలాగే వస్తే డాక్టర్‌ని సంప్రదించాను. బలం కోసం మందులిచ్చారు. అవి వాడిన తర్వాత బాగానే ఉంది.. కానీ ఇప్పుడు సమస్య మళ్లీ మొదలైంది. ఎందుకిలా జరుగుతుంది..? పరిష్కారం చెప్పండి. - ఓ సోదరి


నెలసరి నెలకోసారి కాకుండా త్వరగానో, ఆలస్యంగానో వస్తే అది హార్మోన్ల సమస్య అని అర్థం. అండాశయం నుంచి తయారయ్యే హార్మోన్లలో కానీ లేదా పిట్యూటరీ నుండి తయారయ్యే హార్మోన్లలో లోపం ఉంటే ఇలా జరుగుతుంది. ఒక్కోసారి అండాశయాల్లో సిస్టులు తయారైతే కూడా ఇలాంటి తేడాలొస్తాయి. అందుకని మీరు ఒకసారి గైనకాలజిస్ట్‌ని సంప్రదిస్తే ట్రాన్స్‌ వెజైనల్‌ అల్ట్రాసౌండ్‌ స్కాన్‌, ఇంకా అవసరమైతే హార్మోన్ల పరీక్షలు చేసి దాని ప్రకారం చికిత్స చేస్తారు.


Know More

డాక్టర్‌.. నా వయసు 38. నాకు ఇద్దరు పిల్లలు. రెండుసార్లూ సిజేరియనే అయింది. అయితే ఈ మధ్య కొన్ని నెలల నుంచి నాకు మూత్రం లీకవుతోంది. నెలసరి పూర్తవగానే వెజైనా దగ్గర దురద, మంటగా ఉంటోంది. కలయికలో పాల్గొన్నా ఇదే సమస్య. అలాగే ఎడమవైపు రొమ్ములో కూడా నొప్పిగా ఉంటోంది. ఎందుకిలా జరుగుతుందో దయచేసి చెప్పండి. - ఓ సోదరి


మీరు రాసిన వివరాలను బట్టి మీకు మూడు సమస్యలున్నాయి.

మొదటిది - మూత్రం లీకవడం. అయితే దీని గురించి ఇంకా కొన్ని వివరాలు అవసరమవుతాయి. అంటే.. మీకు బాత్రూమ్‌కి వెళ్లే వరకు ఆగకుండా త్వరగా లీకవుతోందా?, దగ్గినప్పుడు-తుమ్మినప్పుడు లీకవుతోందా?, దానంతటదే లీకవుతూనే ఉంటుందా? అనేది తెలుసుకోవడానికి పరీక్ష చేయాలి. అలాగే గర్భాశయం, దాంతో పాటు యూరినరీ బ్లాడర్‌ జారడం వంటి సమస్యలున్నాయేమో చూడాలి. యూరినరీ బ్లాడర్‌ కండరాలు బలహీన పడి.. లోపల మూత్రం నిల్వ ఉండిపోతోందేమో చూడాలి. ఇన్ని చేసినా సమస్య అర్థం కాకపోతే యూరో డైనమిక్స్‌ అనే పరీక్షలు చేయాల్సి ఉంటుంది. వీటన్నింటి రిపోర్టులు చూసిన తర్వాతే చికిత్స సూచించగలుగుతారు.
మీ రెండో సమస్య - వెజైనా దగ్గర దురద, మంట. ఇది సాధారణంగా ఇన్ఫెక్షన్‌ వల్ల వస్తుంది. అయితే ఎలాంటి ఇన్ఫెక్షనో తెలుసుకోవాలంటే మాత్రం పరీక్ష చేసి చూడాలి.
మూడో సమస్య - రొమ్ములో నొప్పి.. అంటే అది కూడా హార్మోన్ల ప్రభావం వల్ల కావచ్చు.. లేదా ఇన్ఫెక్షన్ల వల్ల కావచ్చు.. మీరు ఒకసారి మీకు దగ్గర్లో ఉన్న గైనకాలజిస్ట్‌ దగ్గరికెళ్తే మీ లక్షణాలన్నీ తెలుసుకొని అవసరమైన పరీక్షలు సూచిస్తారు.


Know More

హలో డాక్టర్‌. నా వయసు 24, మా వారి వయసు 30 ఏళ్లు. మాకు పెళ్లై రెండేళ్లవుతోంది. పిల్లల్లేరు. నాకు పీసీఓఎస్‌ ఉంది.. మా వారికి Azoospermia ఉంది. డాక్టర్‌ని సంప్రదిస్తే స్పెర్మ్‌ డోనర్‌ దగ్గరికి వెళ్లమన్నారు. కానీ అది నాకు ఇష్టం లేదు. అది తప్ప ఇంకో దారి లేదా? ఒకవేళ వెళ్తే ఎదురయ్యే లాభనష్టాలేంటి? దాని పద్ధతేంటి? దయచేసి చెప్పండి. - ఓ సోదరి


మీకు పీసీఓఎస్‌ సమస్య ఉంటే అండం విడుదల కావడానికి మందులు వాడాల్సి ఉంటుంది. కానీ మీ వారికి Azoospermia అంటే సెమెన్‌ అనాలిసిస్‌ చేసినప్పుడు అందులో వీర్య కణాలు అసలే లేవని అర్థం. అయితే దీనికి కారణాలు రెండు రకాలుగా ఉండచ్చు.

మొదటిది - అసలు వీర్య కణాలు తయారు కాకుండా ఉండడం

రెండోది - వృషణాల్లో తయారవుతున్నా కూడా అవి ప్రయాణం చేసే దారిలో అడ్డంకులు ఉండడం వల్ల అవి బయటికి రాలేకపోవడం. వీటిలో ఏ సమస్య వల్ల మీ వారికి Azoospermia ఉందో తెలుసుకోవాలంటే స్క్రోటల్‌ అల్ట్రాసౌండ్‌ స్కాన్‌, హార్మోన్‌ పరీక్షలు, టెస్టిక్యులర్‌ బయాప్సీ.. వంటి పరీక్షలు చేసి చూడాలి.

ఒకవేళ స్పెర్మ్స్‌ తయారీ వరకు సరిగ్గానే ఉంటే సూటిగా టెస్టిస్‌లో నుంచే స్పెర్మ్స్‌ని తీసుకొని వాటిని మీ అండంతో కలిపి ఫలదీకరణం చెందిస్తారు. ఇలా ఐవీఎఫ్‌ ద్వారా మీరు గర్భం ధరించచ్చు.
ఒకవేళ లోపల తయారు కావడమే జరగ్గపోతే అప్పుడు తప్పనిసరిగా డోనర్‌ స్పెర్మ్‌ తీసుకోవాల్సి ఉంటుంది. అయితే డోనర్‌ స్పెర్మ్‌ తీసుకోవాలా? వద్దా? అనేది మీ ఇద్దరి ఇష్టాయిష్టాల మీద ఆధారపడి ఉంటుంది. ఒకవేళ మీరు గనుక డోనర్‌ ఐవీఎఫ్‌కి సరే అంటే మీకు చికిత్స చేసే డాక్టర్‌ దాని పద్ధతేంటో వివరిస్తారు.


Know More

నమస్తే డాక్టర్‌. నా వయసు 25. బరువు 49 కిలోలు. నాకు పెళ్లై ఆరేళ్లవుతోంది. పెళ్లైన తొమ్మిది నెలలకు గర్భం దాల్చాను. అయితే ఆ తర్వాత అబార్షన్‌ అయింది. ఇప్పటిదాకా మళ్లీ ప్రెగ్నెన్సీ రాలేదు. నాకు థైరాయిడ్‌ ఉంది. ప్రస్తుతం 12.5 ఎంసీజీ మాత్రలు వాడుతున్నా. నాకు పిల్లలు పుట్టే మార్గం చెప్పండి. - ఓ సోదరి


మీకు ఈ ఆరేళ్లలోనూ మొట్టమొదట అయిన గర్భస్రావం తప్ప తిరిగి గర్భం రాలేదంటున్నారు. అంటే మీరు వివరంగా పరీక్షలన్నీ చేయించుకోవాలి. గైనకాలజిస్ట్‌ దగ్గరికి వెళ్తే జననేంద్రియాల ఆరోగ్యం గురించి, గర్భాశయం, అండాశయాలు, ఫెలోపియన్‌ ట్యూబ్స్‌ పరిస్థితి గురించి, మీ హార్మోన్ల స్థాయుల గురించి వివరంగా పరీక్షలు చేసి చూస్తారు. అలాగే మీ వారికి సెమెన్‌ అనాలిసిస్‌ పరీక్ష కూడా చేయాల్సి ఉంటుంది. ఈ పరీక్షల ఫలితాలను బట్టే మీరు ఎలాంటి చికిత్స తీసుకుంటే గర్భం నిలుస్తుందో అర్థమవుతుంది.


Know More