సమస్త సృష్టికి ఆధారం.. అనంత శక్తికి సంకేతం..
వసుధను నడిపే వసుంధరకు వందనం! శిరసాభివందనం!!

Movie Masala

Video Gallery

 

మా పాపకు ఆ అలవాటుంది.. ఎలా మాన్పించాలి?

నమస్తే మేడమ్‌.. మా పాప వయసు 12 ఏళ్లు. 7వ తరగతి చదువుతోంది. మా పాప 5, 6 తరగతులు బాగానే చదివింది. కానీ ఇప్పుడు సరిగ్గా చదవడం లేదు. మంచి మార్కులు కూడా రావట్లేదు. అలాగే కొన్ని రోజుల క్రితం తన స్కూల్లో టీచర్‌ పర్సులో నుంచి ఎవరికీ తెలియకుండా డబ్బు తీసుకుంది. ఈ విషయం తెలుసుకున్న టీచర్‌.. స్కూల్‌ డైరెక్టర్‌కి కంప్లైంట్‌ చేస్తే.. సీసీ కెమెరాలు పరిశీలించి మమ్మల్ని పిలిపించారు. ఇంటికొచ్చిన తర్వాత పాపను అడిగితే నేను తీయలేదని అబద్ధాలు చెప్పింది. కొన్ని రోజుల క్రితం ఎగ్జామ్‌ రాసిన తర్వాత తిరిగి ఆ పేపర్ టీచర్లకి ఇవ్వలేదని తెలిసింది. వాళ్ల టీచర్లు ఎంతమంది అడిగినా ఇచ్చాననే సమాధానం చెప్పింది. అయితే ఇంటికొచ్చాక తిట్టి అడిగితే.. అప్పుడు కావాలనే పేపర్ ఇవ్వకుండా బయట పడేశానని చెప్పింది. ఇలా పాప అబద్ధాలు చెప్పకుండా ఎలా మాన్పించాలి? - ఓ సోదరి


డా|| పద్మజ

సైకాలజిస్ట్

ఈ సమస్యను రెండు కోణాల్లో చూడాలి. ఒకటి- అబద్ధాలు చెప్పే అలవాటు కేవలం ఇటీవలే మొదలుపెట్టిందా? లేకపోతే ఈ ఆలోచనా ధోరణి ఇంతకుముందు నుంచీ ఉందా?.. రెండోది- కేవలం ఏడో తరగతి వచ్చిన తర్వాతే గనుక ఆమె ఇలా ప్రవర్తిస్తోందంటే తనలో ఈ సమయంలో వస్తున్నటువంటి మార్పులేంటి? అనే విషయాలను శారీరక, మానసిక కోణాల్లోంచి ఆలోచించాలి. అలాగే మీ పాప ప్రవర్తనలో ఇటీవల వచ్చిన మార్పులేంటి అనేది గమనించాలి. ఉదాహరణకు.. తన స్నేహితుల్లో ఎవరైనా అలా ప్రవర్తించి తనపై ప్రభావం చూపించారా?, ఎవరైనా అలా చేయడం గురించి విన్నదా? లేదా తను ఏదైనా అలాంటి పని చేస్తున్నప్పుడు ఇతరులు ప్రశంసిస్తూ తను దాన్ని గొప్పగా భావించేలా చేశారా?, తమకు తెలిసో తెలియకో ఎవరైనా అలా చేయమని తనను ప్రోత్సహించారా? వంటి విషయాల గురించి కూడా ఆలోచించాలి.

అలాగే మీ పాప ఏ విషయంలోనైనా తన గురించి తాను తక్కువగా అంచనా వేసుకుంటోందా? లేదా తనకు శక్తి సామర్థ్యాలు లేవనే ఆత్మనూన్యత భావనలో ఉందా? అసలు మీరు ఆమె పట్ల తగిన శ్రద్ధ చూపిస్తున్నారా? ఇలా అన్నింటినీ క్రోడీకరించి తనలో వచ్చిన, వస్తున్నటువంటి మార్పులను విశ్లేషించాలి. ఈ క్రమంలో మీ పాపను తప్పనిసరిగా మానసిక నిపుణుల వద్దకు తీసుకెళ్లాల్సిన అవసరం ఎంతైనా ఉంది. మీ పాప ప్రవర్తనలో వచ్చినటువంటి ధోరణిని క్షుణ్ణంగా పరిశీలించి.. వారే తగిన పరిష్కారం చూపుతారు.




Post Your Comment Here

(Press ctrl+g to switch(English/Telugu))

మీ ప్రశ్న అడగండి

(Press ctrl+g to switch(English/Telugu))