సమస్త సృష్టికి ఆధారం.. అనంత శక్తికి సంకేతం..
వసుధను నడిపే వసుంధరకు వందనం! శిరసాభివందనం!!

Movie Masala

Video Gallery

 

మీ ప్రశ్న అడగండి

(Press ctrl+g to switch(English/Telugu))

హాయ్‌ మేడమ్‌.. మాకు పెళ్లై ఐదు సంవత్సరాలవుతోంది. నా భర్త పెళ్లికి ముందు ఒకరిని ప్రేమించారు. కులాలు వేరు కావడంతో పెద్దవాళ్లు పెళ్లికి ఒప్పుకోలేదు. ఎప్పుడూ ఆ అమ్మాయి గురించే ఆలోచిస్తుంటారు.. ఒక్కోసారి ఏడుస్తారు కూడా. ఇదిలా ఉంటే దీనికి తోడు తనకు పరిచయమున్న ఇతర అమ్మాయిలను రెస్టారంట్లకు తీసుకువెళ్తుంటారు. నన్ను మాత్రం కనీసం పుట్టినరోజు, పెళ్లి రోజు వంటి సందర్భాల్లో కూడా బయటకు తీసుకెళ్లరు. దూరం ఎక్కువని ఆఫీస్ దగ్గరే రూమ్‌ తీసుకుని ఉంటున్నారు. మమ్మల్ని కూడా తీసుకెళ్లమంటే ‘మా అమ్మ ఇక్కడ వాతావరణానికి అలవాటు పడింది.. మీరు ఇక్కడే ఉండండి’ అంటున్నారు. ఇంట్లో ఖర్చులకు ఎలాంటి లోటూ చేయడు. కానీ, ఇంటికి వచ్చినప్పుడు నాతో సంతోషంగా ఉండడు. ఎప్పుడూ ఏదో ఒక తప్పు చూపిస్తాడు. ఒకవేళ ఎలాంటి తప్పు చేయకపోయినా కావాలని గొడవ పడతాడు. అమ్మాయిలతో గంటల కొద్దీ మాట్లాడతాడు. ఉదయం అయిదింటికి లేచి పనంతా చేయాలని తిడతారు. ఒకవేళ చేయకపోతే నీళ్లు మీద పోస్తారు. మా పుట్టింటికి వెళ్లి నాలుగు రోజులు ఉండాలనిపిస్తుంటుంది. కానీ పంపడు. ఒకవేళ పంపినా ఉదయం వెళ్లి సాయంత్రానికి వచ్చేయమంటారు. తను మాత్రం స్నేహితులతో ట్రిప్‌లకి వెళ్తారు. నాకు ఒక బాబు ఉన్నాడు. అందుకే ఏం చేయలన్నా ఆలోచిస్తున్నా.. దయచేసి సలహా ఇవ్వగరు. - ఓ సోదరి


మీ భర్త మనసులో మరొక వ్యక్తి ఉన్నా.. అది సాధ్యం కాకపోవడంతో మిమ్మల్ని పెళ్లి చేసుకున్నాడన్న విషయం మీకు తెలుసు. అతను తన పాత స్నేహితురాలిని మర్చిపోవడం సంగతి అటుంచితే.. తనకు మహిళల పట్ల బలహీనత ఉందనే విషయం స్పష్టంగా తెలుస్తోంది. అమ్మాయిలతో గంటల కొద్దీ మాట్లాడడం, వారిని బయటకు తీసుకెళ్లడం, ఆఫీస్ దగ్గరే ఒంటరిగా రూం తీసుకుని ఉండడం వంటి విషయాలను ప్రస్తావించారు. ఇవన్నీ మీకు అతనిపై నమ్మకం ఉన్నట్లుగా సూచించడం లేదు. ఒకవైపు ఇంటి అవసరాలకు ఎలాంటి లోటూ చేయడం లేదని చెబుతూనే మరోవైపు మిమ్మల్ని వేధిస్తున్నాడని చెబుతున్నారు. అలాగే బాబు ఉన్నాడు కాబట్టి అతని మీద ఆధారపడక తప్పదన్న ఆలోచనతో మీరు ఇబ్బంది పడుతున్నట్టుగా తెలుస్తోంది.

ఈ క్రమంలో మీకు మీరు స్వయంశక్తిని పెంపొందించుకునే ప్రయత్నం చేయండి. మీ ఉత్తరంలో మీ విద్యార్హతల గురించి ప్రస్తావించలేదు. అయితే ఈ రోజుల్లో ఇంట్లోనే ఉండి విద్యార్హతలను పెంచుకునే అవకాశాలెన్నో ఉన్నాయి. కాబట్టి, ఉద్యోగానికి తగ్గ విద్యార్హతలను పెంచుకునే ప్రయత్నం చేయండి. దీనివల్ల మీ కాళ్ల మీద మీరు నిలబడడమే కాకుండా మీ బాబుని మీరు చూసుకోగలరన్న ధైర్యం కూడా మీకు కలుగుతుంది. ఒక్కసారి ఉద్యోగం/వ్యాపారం అంటూ మొదలుపెట్టిన తర్వాత మీరు ప్రపంచాన్ని చూసే కోణంలో కూడా మార్పు వచ్చే అవకాశాలు ఉంటాయి. ఫలితంగా మీపై మీకు ఆత్మవిశ్వాసం పెరగడమే కాకుండా.. ప్రతికూల పరిస్థితులను ఎదుర్కొనే ధైర్యం కూడా వచ్చే అవకాశాలుంటాయి.

ఇక, మీరు చేసే పనుల్లో లోపాలు వెతకడం, మీద నీళ్లు పోయడం వంటి పనుల వల్ల ఇబ్బంది పడుతున్నారని చెబుతున్నారు. అయితే అతని ప్రవర్తన వల్ల మీరు ఎంతగా బాధపడుతున్నారో అతనికి మీరు స్వయంగా ఎప్పుడైనా చెప్పారో లేదో మీరు స్పష్టం చేయలేదు.. ఒకవేళ దాని గురించి అతనితో ఇప్పటివరకు డైరెక్ట్ గా మాట్లాడకపోయుంటే - అతని అనుచిత ప్రవర్తన మీకు ఎంత బాధ కలిగిస్తోందో ఓసారి వివరంగా చెప్పి చూడండి.

అప్పటికీ మార్పు లేకపోతే మీ పరిస్థితుల గురించి పెద్దవాళ్లతో చర్చించడం ద్వారా సమస్యను పరిష్కరించే అవకాశం ఉండచ్చు. ఆ దిశగా కూడా ఓసారి ప్రయత్నించి చూడండి. అదేవిధంగా సాధ్యమైనంత త్వరగా మీ కాళ్ల పైన మీరు నిలబడడానికి ప్రయత్నం చేయండి. అప్పుడు ఏ పరిస్థితి ఎలా వచ్చినా అతని పైన ఆర్ధికంగా ఆధారపడే అవసరం ఉండదు. మీ భవిష్యత్తు గురించి ధైర్యంగా నిర్ణయం తీసుకోగలుగుతారు.


Know More

హాయ్‌ మేడమ్‌.. మా తమ్ముడికి మా మేనమామ కూతుర్నిచ్చి ఐదు సంవత్సరాల క్రితం పెళ్లి చేశారు. ఇద్దరూ ఇష్టపడ్డారని పెళ్లి చేశారు. వాళ్లకి ఇద్దరు పిల్లలు. అంతా బాగానే ఉందనుకునే సమయంలో ఆరు నెలల క్రితం నాకు ఒక విషయం తెలిసింది. ఏంటంటే మా తమ్ముడికి పెళ్లికి ముందే వేరే అమ్మాయితో సంబంధం ఉంది. ఎవరికీ ఆ విషయం తెలియదు. మా తమ్ముడు ఏ వ్యాపారం చేసినా నష్టాలు వస్తున్నాయి. ఊరు మారితే ఏమైనా మార్పు వస్తుందని వేరే ఊరిలో పెట్టుబడి పెట్టారు. అయినా నష్టం వచ్చింది. చివరికి ఒక ఊరిలో కిరాణా వ్యాపారం పెట్టించారు. సెట్‌ అయిందని అనుకునే సమయానికి ఆ అమ్మాయితో ఉన్న సంబంధం బయటకు వచ్చింది. మా నాన్న, మరదలికి ఈ విషయం మూడు సంవత్సరాల క్రితమే తెలుసు. అమ్మకు తెలిసి సంవత్సరమైంది. అది కూడా ఊళ్లో వాళ్లు ఎవరో చెబితే తెలిసింది. నాకు ఈ విషయం తెలిసినప్పటి నుంచి తట్టుకోలేకపోయాను. మా తమ్ముడిని గట్టిగానే అడిగాను. మా ఆయనతో కూడా అడిగించాను. అయినా కూడా మొండిగా సమాధానం ఇస్తున్నాడు. ‘పెళ్లికి ముందు నుంచి ఉన్న సంబంధం.. వదులుకోలేనని’ అంటున్నాడు. ‘ఆ అమ్మాయి భర్త నుంచి విడాకులు తీసుకుంది.. ఒక అమ్మాయి కూడా ఉంది. నా అవసరం తనకి ఉంది’ అని అంటున్నాడు. అందరూ ఒప్పుకుంటే ఆ అమ్మాయిని పెళ్లి చేసుకుంటానని అంటున్నాడు. ఈ విషయం గురించి ఇంట్లో పెద్ద గొడవ మొదలైంది. పరువు పోతుందని ఎవరికీ చెప్పకుండా అమ్మానాన్న ఇన్నేళ్లు నరకయాతన అనుభవించారు. నాన్నకి ఊర్లో మంచి పేరు ఉంది. అందుకే ఎవరూ ఏమీ అడిగే వారు కాదు. అదే అదనుగా మా తమ్ముడు రెచ్చిపోయాడు. మా మరదలికి మారిపోయానని మాయ మాటలు చెప్తే ముందు నమ్మేసింది. నాకు కోపం వచ్చి కేసు కూడా పెట్టించాను. అయితే ఆ అమ్మాయి ఇక ముందు మా తమ్ముడితో సంబంధం పెట్టుకోనని పోలీసు స్టేషన్‌లో సంతకం చేసింది. కానీ మా తమ్ముడు ఏం చెప్పినా వినడం లేదు. నాకు ఆ అమ్మాయి కావాలి అంటున్నాడు. మాకు ఏం చేయాలో అర్థం కావడం లేదు. మా తమ్ముడి నడవడిక సరిగ్గా లేకపోవడంతో వాడి పిల్లల్ని కూడా మా పేరెంట్స్ ఎలాంటి లోటూ లేకుండా చూసుకుంటున్నారు. వ్యాపారం కూడా వాళ్లే చూసుకుంటున్నారు. మా తమ్ముడికి ఏమీ ఇవ్వకూడదని ఆస్తులు కూడా మా నాన్న మనవళ్ల పేరు మీద రాశారు. ఇల్లు, పిల్లలు, వ్యాపారం.. ఇవన్నీ చూసుకోవడానికి నా మరదలు కూడా అమ్మానాన్నలతో పాటు కష్టపడుతోంది. కానీ ఎన్ని రోజులు ఇలా అనేది అర్థం కావడం లేదు. మా తమ్ముడు ఏదో చిన్న పనులు చేసుకుంటున్నాడు. ఇంటికి వస్తాడు, తింటాడు, నిద్రపోతాడు అంతే. ఏ బాధ్యత లేకుండా ఉంటాడు. మా తమ్ముడిలో ఎలా మార్పు తీసుకురావాలి? దయచేసి సలహా ఇవ్వగలరు. - ఓ సోదరి


మీరు రాసిన ఉత్తరంలో అతని వ్యవహార శైలిలో కొన్ని విషయాలు స్పష్టంగా కనిపిస్తున్నాయి. ఏ వ్యాపారం పెట్టించినా రాణించలేకపోవడం.. మరొకరితో సంబంధం పెట్టుకొని కూడా పెళ్లి చేసుకోవడం.. భార్య, తల్లిదండ్రులకు తెలియకుండా చాలాకాలం పాటు వ్యవహారం సాగించడం.. ఆ విషయం తెలిసిన తర్వాత భార్య గురించి కానీ, తల్లిదండ్రుల గురించి కానీ ఆలోచించకుండా తనకు కావాల్సిన దాని గురించే మాట్లాడడం.. వంటివి స్పష్టంగా కనిపిస్తున్నాయి.

extramaritalaffairgh650-1.jpg
బాధ్యతారాహిత్యాన్ని దూరం చేయండి..
అతనిలో ఇలాంటి లక్షణాలున్నా.. మీ మరదలు అత్తమామలపై ఉన్న గౌరవంతో కానీ, భర్తపై ఏర్పడిన అనుబంధం వల్ల కానీ, పిల్లల కోసం కానీ.. ఆమె జీవితాన్ని అతనితోనే కొనసాగిస్తోంది. అలాగే మీ వైపు నుంచి ఒక సోదరిగా బాధ్యత తీసుకొని మరొక స్త్రీతో ఉన్న సంబంధాన్ని కొనసాగనీయకుండా చేయాల్సిన ప్రయత్నాలు చేశారు. కానీ అతను తన వివాహేతర సంబంధాన్ని ఆపకుండా ఏమాత్రం బాధ్యత లేకుండా వ్యవహరిస్తున్నాడు. మీరు ముందుగా అతనిలో ఉన్నటువంటి ఈ బాధ్యతారాహిత్యాన్ని దూరం చేయడానికి ఎలాంటి మార్పు తీసుకురావాలి అనే విషయంపై దృష్టి పెట్టాలి.

మీ తమ్ముడు పూర్తిగా పని చేయనప్పుడు ఆ వ్యాపారాన్ని నాన్న గారే చూసుకోవడం.. మనవళ్లు, కోడలి బాధ్యతను కూడా తనే తీసుకోవడంతో అతనిలో ఉన్న బాధ్యతారాహిత్యం మరింత దృఢపడుతున్నట్లు కనిపిస్తోంది. మీ మరదలికి అతని నుంచి విడిపోయే ఆలోచన లేకపోతే వాళ్లిద్దరి మధ్య బంధం బలపడడానికి కుటుంబం పట్ల బాధ్యత వహించడానికి ఏమైనా చేయగలరేమో ఆలోచించండి. ఉదాహరణకు తన భార్య, పిల్లలు, కుటుంబ బాధ్యతలను తన పైనే పెట్టడం, అలాగే ఒక కొడుగ్గా, భర్తగా, తండ్రిగా తను తప్పనిసరిగా చేసి తీరాల్సిన పనుల గురించి అతనికి స్పష్టం చేయడం వంటి విషయాలను పరిశీలించండి.

extramaritalaffairgh650-2.jpg
తననే చేయనివ్వండి..
ఉదాహరణకు పిల్లల చదువులు చూసుకోవడం, వారి ఫీజులు కట్టడం, కుటుంబాన్ని నడపడం, తల్లిదండ్రుల బాగోగులు చూసుకోవడం వంటివి అతనికి తెలియజేసే ప్రయత్నం చేయండి. తన కోసం మరొకరు తనకు కావాల్సినవి చేస్తుండడంతో.. తనకు దక్కిన వాటి గురించి సంతృప్తి పడకుండా.. ‘నాకు ఇష్టమైంది దక్కనివ్వడం లేదు’ అనే శైలిలో అతను వ్యవహరిస్తున్నాడు. కాబట్టి, తన బాధ్యతలను తనే నిర్వర్తించే విధంగా తగిన పరిస్థితులను సృష్టించే ప్రయత్నం చేయండి.

అతను ఎవరితో వ్యవహారం నడుపుతున్నాడో ఆమెని నియంత్రించే ప్రయత్నం మీరు చేశారు. అలాగే మీ తమ్ముడిని కూడా దార్లో పెట్టడానికి ఏం చేయాలో మీ తల్లితండ్రులు, ఇతర పెద్దలు, ఆత్మీయులతో కలిసి ఆలోచించండి. అలాగే ఇన్నేళ్ల అనుభవాన్ని దృష్టిలో ఉంచుకుని అతను ఏ రంగంలో రాణించగలడో మీ కుటుంబ సభ్యులంతా కలిసి లోతుగా ఆలోచించండి. అందుకు తగిన నిర్ణయం తీసుకునే ప్రయత్నం చేయండి.


Know More

నమస్తే మేడమ్‌.. నాకు పెళ్లై సంవత్సరం దాటింది. మా ఆయన సాఫ్ట్‌వేర్‌ ఇంజినీర్. కరోనా వచ్చిన దగ్గర నుంచి ఆయన వర్క్‌ ఫ్రం హోమ్‌ చేస్తున్నాడు. దాంతో మా ఆయన వాళ్ల ఇంటికి వచ్చేశాం. కొన్ని రోజులకు మా ఆయన వాళ్ల కుటుంబ సభ్యుల వల్ల ఇద్దరికీ గొడవలు వచ్చాయి. దాంతో నేను మా అమ్మ వాళ్ల దగ్గర ఉంటున్నాను. మూడు నెలల నుంచి నేను, ఆయన మాట్లాడుకోవడం లేదు. ఆయన తరఫు వాళ్లు ఈ విషయాన్ని అలుసుగా తీసుకుని మా ఇద్దరి మధ్య మనస్పర్థలు సృష్టిస్తున్నారు. ఆయన జీతాన్ని కూడా వాళ్లే వాడుకుంటున్నారు. ఆయన కూడా వాళ్లు ఏం చెబితే అదే వినడం, చేయడం చేస్తున్నాడు. వాళ్లు నా మీద లేనిపోనివి చెప్తుంటే అది విని నా మీద సీరియస్‌ అవుతున్నాడు. ఈ మధ్యన మేముంటున్న ఇంటిని ఖాళీ చేసి వచ్చేశారు. కనీసం నా అభిప్రాయాన్ని కానీ, మా తల్లిదండ్రుల అభిప్రాయాన్ని కానీ తీసుకోలేదు. నా భర్త ఎప్పుడూ వాళ్ల ఇంట్లోనే ఉండాలంటారు. మా అమ్మ వాళ్ల దగ్గరకు రావడం ఆయనకు నచ్చదు. ఒకవేళ వచ్చినా ఒకటి రెండు రోజులే ఉండాలంటారు. నేను ఎంత పని చేసినా చేయడం లేదని మా అత్తమామలు నా మీద తనకి ఏదో ఒకటి చెప్తునే ఉంటారు. నా తోటి కోడలు ఏం చేయకపోయినా ఆమెను ఏమీ అనరు. నన్ను అస్సలు పట్టించుకోరు. మాటలతో, చేతలతో వేధిస్తుంటారు. దయచేసి నా సమస్యకు పరిష్కారం తెలుపగలరు. - ఓ సోదరి


మూడునెలల నుంచి మీరిద్దరూ మాట్లాడుకోవడం లేదని, పుట్టింటికి వెళ్లిపోయానని చెబుతున్నారు. ఇలా మాట్లాడుకోకుండా ఉండడం వల్ల అతని వైపు వాళ్లు అతన్ని, మీ వైపు వాళ్లు మిమ్మల్ని ప్రభావితం చేస్తున్నారని, మీ ఇద్దరి మధ్య మానసిక దూరాన్ని పెంచుకుంటున్నారనే విషయాన్ని అర్థం చేసుకోండి.
మీ భర్తతో కలిసి వాళ్లింటికి వెళ్లిన తర్వాత అతని తరఫు వాళ్ల వల్ల మీకు మనస్పర్థలు వచ్చాయని, మీకు చెప్పకుండా ఇల్లు ఖాళీ చేశారని, మీ మధ్య సమస్యలు సృష్టిస్తున్నారని చెబుతున్నారు. మీరిద్దరూ కూర్చుని వివరంగా మాట్లాడుకోకపోవడం వల్ల కేవలం భౌతిక దూరం మాత్రమే కాకుండా మానసికంగా కూడా దూరం పెరుగుతోందని అర్థం చేసుకోండి.

ఇద్దరూ చెరొక చోట ఉండి, ఎవరివైపు వాళ్లకి వాళ్లు ప్రాధాన్యమిస్తూ.. అవతలి వారు పట్టించుకోవడం లేదనుకుంటే మీరు దగ్గరయ్యే అవకాశాలు ఏవిధంగా మెరుగవుతాయో మిమ్మల్ని మీరు ప్రశ్నించుకోండి. మీరిద్దరూ దూరంగా ఉండడం, ఒకరితో ఒకరు మాట్లాడకపోవడం వల్ల ఇంకొక వ్యక్తి ద్వారా తెలిసే విషయాల పైన ఆధారపడుతున్నారు. ఎప్పుడైతే మీ ఇద్దరి మధ్య మూడో వ్యక్తి (ఎంత ముఖ్యమైన వారు కానీ) ప్రవేశించి, వారి మాటలు మీరు కానీ, అతను కానీ వినడం మొదలు పెట్టారో అప్పుడే మీ ఇద్దరి మధ్య మానసిక దూరానికి మొదటి అడుగు పడుతుంది. అలా కాకుండా మీరిద్దరూ ప్రశాంతమైన వాతావరణంలో మనసు విప్పి మాట్లాడుకుంటే సమస్యను పరిష్కరించగలుగుతారేమో ఆలోచించి చూడండి.


Know More

నమస్తే మేడమ్‌.. నా వయసు 35 సంవత్సరాలు.. ఎంసీయే చదివాను. నేను పుట్టి పెరిగిందంతా హైదరాబాద్‌లోనే. నాకు గతంలో వివాహం జరిగింది. అయితే వాళ్లు మోసం చేశారని విడాకులు తీసుకున్నా. మూడు నెలల క్రితం మళ్లీ పెళ్లి చేసుకున్నా. ఆయనకు ఇది మొదటి వివాహం. ఆయన ఎంకాం చదివారు. వాళ్లది తూర్పుగోదావరి జిల్లాలోని ఒక పల్లెటూరు. ఆయన హైదరాబాద్‌లోనే ఒక చిన్న కంపెనీలో అకౌంటెంట్‌గా పని చేస్తున్నారు. వాళ్ల కుటుంబంలో పెత్తనమంతా మగవారిదే. మా మామ ఏది చెబితే మా ఆయన, బావ అదే వింటారు. మా మామ, బావ ఊళ్లోనే పని చేస్తుంటారు. ఆ ఊళ్లో వారికి రాజకీయ పలుకుబడి కూడా ఉంది. మా తోటి కోడలు.. మా బావ, మావయ్యలకు పనిలో సహాయం చేస్తుంటుంది. మా ఆయన పిసినారి. నేను ఏది కావాలని అడిగినా కొనరు. ఒక సినిమాకు తీసుకెళ్లడు, ఇంట్లో సామన్లు కొనడు, సరుకులు కూడా కొద్ది కొద్దిగా తెస్తారు, పనిమనిషిని పెట్టరు... ఇలా నా అవసరాలను ఏదీ పట్టించుకోరు. ఇప్పటివరకు నాకు కావాల్సినవన్నీ మా నాన్న, తమ్ముడు కొంటున్నారు. ఇంట్లో డబ్బులు కూడా పెట్టరు. అలాగని ఉద్యోగం చేస్తానంటే వద్దంటారు. మా మామగారు కూడా ఆయనకు మద్దతు తెలుపుతున్నారు. బయటకు ఒంటరిగా పంపరు. ఎవరో ఒకరు తోడుంటేనే వెళ్లమంటారు. సిటీ బస్‌ ఎక్కద్దంటారు. ఆటో ఎక్కద్దంటారు. ఇల్లు కూడా బయట ఎవరూ కనిపించకుండా ఉండేలా ఉన్న ఇల్లుని అద్దెకి తీసుకున్నారు. పెళ్లికి ముందు మా నాన్న ‘హైదరాబాద్‌లోనే ఉంటారా?’ అని అడిగితే ‘ఉంటాను’ అన్నారు. కానీ నెలకు 15 రోజులు ఏదో ఒక వంక పెట్టి వాళ్ల ఊరు తీసుకొని పోతున్నారు. నేను రాననకుండా ఉండేలా ప్లాన్‌ చేస్తున్నారు. ఆయనకు వర్క్‌ ఫ్రం హోమ్‌ ఏమీ ఉండదు. అక్కడ వాళ్ల నాన్న, అన్నయ్యతో తిరుగుతారు. పెళ్లై కాపురానికి తీసుకెళ్లినప్పుడు నన్ను వాళ్ల అమ్మగారింట్లో వదిలేసి ఆడిట్‌ పేరు చెప్పి 20 రోజులు వెళ్లిపోయారు. నన్ను హైదరాబాద్‌ పంపమంటే ఒంటరిగా పంపమని ఎవరో ఒకరు తోడు రావాలని చాలా చిరాకు పెట్టారు. చివరకు మా తమ్ముడు వచ్చి తీసుకెళ్లే దాకా పంపలేదు. ఆయన నా అవసరాలు ఏదీ పట్టించుకోవడం లేదు. దాంతో నేను కూడా సంపాదించాలని అనుకుంటున్నాను. మెహందీ డిజైన్‌ బాగా వేస్తాను. మెహందీ ఆర్టిస్ట్‌గా చేయాలని ఉంది. కానీ ఆయన ఒప్పుకోరు. మా మామ అసలే ఒప్పుకోడు. వాళ్లకు ఎదురెళ్లి నెగ్గలేను. ఏం చేయాలి? ఆయనతో గొడవపడి సంబంధం తెంచుకోవడం నాకు ఇష్టం లేదు. ఏం చేయాలో చెప్పండి. - ఓ సోదరి


ప్రస్తుత పరిస్థితుల్లో చాలామంది సాధ్యమైనంత వరకు ఇంటి నుంచే పని చేసేట్టుగా చూసుకుంటున్నారు. మీ భర్తకి, వారి తరపు వాళ్లకు మీరు బయటకు వెళ్లి ఉద్యోగం చేయడం ఇష్టం లేదంటున్నారు. కాబట్టి మీరు కూడా అలాంటి అవకాశాలు ఏవైనా దొరుకుతాయేమో ప్రయత్నించి చూడండి. ఇకపోతే అతను కొద్దికొద్దిగానే వస్తువులు తీసుకొస్తున్నాడని అంటున్నారు. అయితే అది అతని వ్యవహార శైలి కావచ్చు. లేదా అతని సంపాదనకు, అతనున్న పరిస్థితులకు అనువుగా అలా చేస్తుండచ్చు. అలాగని ఎప్పటికీ ఒకేవిధంగా ఉండాలన్న నియమం కూడా ఉండకపోవచ్చు కదా. కాబట్టి, మీవైపు నుంచి మీరు ఎలాంటి ప్రయత్నాలు చేస్తున్నారు అనేది ఆలోచించుకోండి. అలాగే మిమ్మల్ని కొద్దిరోజుల పాటు అక్కడ, కొద్ది రోజుల పాటు ఇక్కడ ఉండేట్టుగా ఎందుకు చేస్తున్నాడనేది కూడా ఆలోచించి చూడండి. అతనికి ఇంటి నుంచి పని (వర్క్‌ ఫ్రం హోమ్‌) చేసే అవకాశం లేదని చెబుతున్నారు. అలాంటప్పుడు నెలకు పదిహేను రోజుల పాటు ఉద్యోగానికి దూరంగా ఉండడం వల్ల కలిగే సమస్యలేంటో అతను ఆలోచించే ఉండచ్చు కదా.. అయినా సరే అతను అక్కడకు తీసుకెళ్తున్నాడు అంటే అతని ఉద్దేశం ఏంటి? అనేది ఆలోచించి చూడండి.

couplequarrelghg650-2.jpg

మీ భర్త విషయంలో సంయమనం పాటిస్తూనే మీ ఉనికిని, వ్యక్తిత్వాన్ని కాపాడుకోవడానికి ప్రయత్నించండి. దీనికి మీ చదువుని ఉపయోగించుకునే మార్గాలను అన్వేషించండి. మీ భర్త చదువు, మీ చదువుకి అనుసంధానంగా ఏదైనా సొంతంగా చేయచ్చేమో కూడా ఆలోచించి చూడండి. అలాగే మీ పెళ్లై మూడు నెలలే అయింది కాబట్టి మీ వారితో మానసికంగా దృఢమైన అనుబంధం పెంచుకునే ప్రయత్నం చేయండి. ఆ తర్వాత అతని ఆలోచనలపై ఒక స్పష్టత తెచ్చుకునే ప్రయత్నం చేయండి. మీ మామగారు, బావగార్ల వ్యవహార శైలిని గమనించి మీకు ఏ రకమైన ఆర్థిక స్వావలంబనకు వెసులుబాటు ఉంటుందో ఆలోచించి చూడండి.

ఏది ఏమైనా మొదట స్వయంశక్తితో మీకు అందుబాటులో ఉన్న అవకాశాలను ప్రయత్నించండి. అటు తర్వాత మీ భర్తతో మాట్లాడి చూడండి. ఈ క్రమంలో ఇంకా అసంతృప్తి ఉంటే మీ పుట్టింటి వారితో చెప్పి.. వారు మీ అత్తమామలు, భర్తతోటి చర్చించే అవకాశం ఉంటుందేమో ప్రయత్నించండి. ఈ క్రమంలో- గతంలో మీకు ఎదురైన చేదు అనుభవాలు మీ ఆత్మ విశ్వాసాన్ని దెబ్బతీయకుండా సానుకూల ధోరణితో ప్రయత్నించండి.


Know More

నమస్తే మేడమ్‌.. నా వయసు 20 సంవత్సరాలు.. నాకు ఈ మధ్య చిన్న చిన్న విషయాలకే కోపం వస్తుంది. ముఖ్యంగా స్నేహితుల మీద. వాళ్లు చేసే పనులన్నీ చిన్న పిల్లల చేష్టల్లా అనిపిస్తున్నాయి. నేనేదో పెద్దదాన్ని అయిపోయినట్టు వాళ్లు చేసే ప్రతి పని నాకు చికాకు తెప్పిస్తోంది. వాళ్లు పాటలు పాడుతుంటే వినలేకపోతున్నాను. చిన్న చిన్న విషయాలకు జోకులు వేసుకుని నవ్వుతుంటే సహించలేకపోతున్నాను. నాకు ఎవరో తెలియని వాళ్ల మీద కూడా కోపం వచ్చేస్తుంది. చిన్నప్పటి నుంచి మా నాన్న తాగొచ్చి ఇంట్లో గొడవ చేసేవాడు. అలా చూస్తూ భరిస్తూ పెరిగా. నాది సున్నిత మనస్తత్వం. ఎవరు ఏమన్నా పెద్దగా పట్టించుకునేదాన్ని కాదు. కానీ ఇప్పుడు చిన్న విషయాన్ని కూడా భరించలేకపోతున్నా. ఏ సమయంలో ఎలా ప్రవర్తిస్తున్నానో కూడా తెలియడం లేదు. కొద్దిసేపు సంతోషంగా ఉంటాను. అంతలోనే కోపం వచ్చేస్తుంది. సమయానికి నిద్ర రావడం లేదు. రాత్రి ఎప్పుడో రెండింటికి నిద్ర పడుతుంది. ముఖ్యంగా ఎక్కువ మంది ఇష్టపడేవి నాకు నచ్చడం లేదు. ఎక్కువ మంది ఇష్టపడనవి నాకు నచ్చుతున్నాయి. వాళ్లు ఎందుకు వాటిని ఇష్టపడడం లేదు? నేను ఇష్టపడి అవి బెస్ట్‌ అని నిరూపించాలనే ఒక వింత ఆలోచన నాకు వస్తుంది. అదే కొనసాగించి సమస్యల్లో పడుతున్నా. దీనికి కారణం ఏంటో చెప్పగలరా.. దయచేసి సలహా ఇవ్వగలరు. - ఓ సోదరి


మీ ఆలోచనలు మీ వయసులో పొందాల్సిన చిన్న చిన్న సంతోషాలు, సరదాలను ఆస్వాదించకుండా చేస్తున్నాయి. అంతేకాకుండా అవి మిమ్మల్ని వ్యతిరేక దిశలో నడిపిస్తున్నాయి. అయితే ఈ విషయాలు మీకు అర్థమవుతున్నా నియంత్రించుకోలేకపోతున్నారని మీ ఉత్తరం సూచిస్తున్నది. అలాగే మీ తండ్రి కారణంగా ప్రతికూల పరిస్థితుల్లో పెరగడం, సున్నిత మనస్తత్వం, ఇతరులు ఆలోచిస్తున్న పద్ధతిని వ్యతిరేకించడం.. దానికి పూర్తి వ్యతిరేక దిశలో వెళ్లడం.. వంటి అంశాలను మీరు ప్రస్తావించారు. దీన్ని బట్టి మీరు మీలోని ప్రతికూల అంశాలపైనే ఎక్కువ దృష్టి పెడుతున్నారని అర్థమవుతోంది.

మీకు చిన్నతనం నుంచి అనేక సమస్యలు ఎదురైనా ఇటీవలి కాలంలో ప్రత్యేకంగా మిమ్మల్ని బాధపెట్టిన లేదా ప్రభావితం చేసిన సంఘటనలు ఏమైనా ఉన్నాయా?అనేది ఒకసారి ఆలోచించండి. ఉదాహరణకు మీ స్నేహితులు, కుటుంబ సభ్యులు, చుట్టుపక్కల వారి విషయాల్లో జరిగిన మార్పులు మీపై ప్రభావం చూపుతున్నాయేమో తెలుసుకోండి. అలాగే మీది సున్నిత మనస్తత్వం అంటున్నారు కాబట్టి మీ చుట్టూ జరిగిన చిన్న విషయాలను మీరు పెద్దదిగా చూస్తున్నారా? అనే కోణంలోనూ ఒక్కసారి దృష్టి సారించండి.

కొంతమంది తమ మనసులోని బాధను తగ్గించుకోవడానికి స్నేహితులతో పంచుకుంటారు. అటువంటి స్నేహితులకు వ్యతిరేకదిశలో మీ ఆలోచనలు సాగడానికి కారణమేంటో మీకు మీరు ఆత్మ విమర్శ చేసుకోండి. అయితే ఈ సూచనలు మీకు తెలుస్తున్నా.. వాటిని నియంత్రించుకోలేకపోతున్నారు కాబట్టి.. మీకు మానసిక నిపుణుల సహాయం అవసరమని తెలుస్తోంది. మీ ఆలోచనలు మీరు కోరిన విధంగా సానుకూల దిశలో సాగాలంటే దానికి ముఖ్యంగా సహాయపడేది మీ మనసేనని అర్థం చేసుకోండి. మానసిక నిపుణులను సంప్రదించినప్పుడు మీ మనో నియంత్రణకు ఏం చేయాలో చెబుతారు. వారి సలహాలను పాటించడం ద్వారా తగిన సాంత్వనను పొందగలుగుతారు.


Know More

హాయ్‌ మేడమ్‌.. నా వయసు 29 సంవత్సరాలు.. పెళ్లి కాలేదు. ఈ మధ్య ఆఫీసులో పెళ్లైన వ్యక్తితో పరిచయం అయ్యింది. కొద్దిరోజులకే నేను అతన్ని ఇష్టపడ్డాను. నేను ప్రభుత్వ ఉద్యోగినిని. అతను నా కింద పని చేస్తుంటాడు. ఇప్పుడు అతనితో మాట్లాడకుండా ఉండలేకపోతున్నా. మొదట్లో అతనే ఎక్కువగా మాట్లాడేవాడు. అప్పటికీ ‘నన్ను పెళ్లి చేసుకో.. మీ ఫ్యామిలీని ఇబ్బంది పెట్టను.. నా జీతంతో మీ కుటుంబాన్ని పోషిస్తాను’ అని చెప్పాను. అయినా అతను ఒప్పుకోవడం లేదు. అతను నన్ను చాలా చులకనగా చూస్తున్నాడు. వాస్తవానికి అతని కంటే నా జీతమే ఎక్కువ. నా జీవితంలో మొదటిసారి ఇష్టపడ్డది తననే. అతని వల్ల మంచి సంబంధాలు వచ్చినా క్యాన్సిల్‌ చేస్తున్నాను. అతన్ని బతిమాలుతున్నా.. అయినా అతను లెక్కచేయడం లేదు. అతని వల్ల సంతోషంగా ఉండలేకపోతున్నాను. ఇప్పటికీ అతనికి రెండో భార్యగా ఉండడానికి కూడా నేను సిద్ధమే! అతనికి ఆస్తులు కూడా పెద్దగా లేవు. కేవలం అతన్ని ఇష్టపడ్డాను.. అతను కావాలనుకుంటున్నాను. నా సమస్యకు పరిష్కారమేంటి? - ఓ సోదరి


మీరు సుస్థిరమైన ఉద్యోగంలో ఉన్నారు. ఇక ఇప్పుడు మీరు జీవితంలో స్థిరపడే సమయం. అయితే ఇలాంటి సమయంలో మీకొచ్చిన సంబంధాలు మీకు నచ్చకపోవడానికి, ఒక వివాహితుడు నచ్చడానికి కారణమేంటనేది విశ్లేషించుకోండి. ఎక్కువ సామీప్యం వల్ల కానీ, ఒకేచోట పనిచేస్తున్నందు వల్ల కానీ, అతను చురుగ్గా.. చొరవగా మీతో మాట్లాడుతున్నందుకు గానీ మీకు అతని పట్ల ఏర్పడినటువంటి సదభిప్రాయాన్ని మీరు ప్రేమగా నిర్వచించుకుంటున్నారేమో ఆలోచించండి. అతను అందరితో మాట్లాడినట్లే మీతోనూ మాట్లాడుతున్నాడేమో అర్థం చేసుకునే ప్రయత్నం చేయండి. జీవితంలో ఒక అనుబంధం ఏర్పడాలంటే అది పరస్పరం ఉండాలి. అతనికి వివాహమైనా మీకోసం తన జీవితాన్ని మార్చుకోవడానికి ఇష్టపడట్లేదన్న విషయం స్పష్టమవుతోంది. అలాంటప్పుడు అతనిపై మీరు ఒత్తిడి తెచ్చి అతనితో జీవితం పంచుకోవాలనుకోవడం ఎంతవరకు సహేతుకమో ఆలోచించండి. అతను తన కుటుంబంతోనే సంతోషంగా ఉన్నాడనుకున్నప్పుడు మీరు మీ స్వాభిమానాన్ని పక్కన పెట్టి.. మీరు రెండో భార్యగా ఉండడానికి, మీ జీతంతో తన కుటుంబాన్ని నడపడానికైనా సిద్ధమే అంటూ మిమ్మల్ని మీరు తక్కువ చేసుకుంటున్నారు. తద్వారా అతని దృష్టిలో మరింత పలుచనయ్యారనేది మీ ఉత్తరం సూచిస్తుంది.

కాబట్టి ఈ ఆలోచనల్లో నుంచి బయటపడాలంటే మీ మనసుని మీకు ఇష్టమైన వ్యాపకాలపై కేంద్రీకృతం చేయండి. ఈ క్రమంలో మీ వృత్తిప్రవృత్తులకు సంబంధించిన అర్హతల్ని పెంచుకోవడం, ఉద్యోగంలో పదోన్నతి సాధించడానికి కావాల్సిన చదువు లేదా రాతపరీక్షలపై దృష్టి పెట్టడం.. వంటివి చేయాలి. అలాగే అతని నుంచి ప్రయత్నపూర్వకంగా కొంత దూరాన్ని పెంచుకునే ప్రయత్నాన్ని మొదలుపెట్టండి. అతని కుటుంబం మీ వల్ల ఇబ్బంది పడుతుందన్న విషయం అతను అవగాహన చేసుకున్నట్లే.. మీరు కూడా అతని స్థానంలో ఉండి సహేతుకంగా ఆలోచించడానికి ట్రై చేయండి. అలాగే అతనే మీకు లోకం అని కాకుండా మీకంటూ ఒక లోకాన్ని సృష్టించుకునే ప్రయత్నం చేయండి.

ఇద్దరూ ఇష్టపడితేనే ప్రేమ.. కానీ బలవంతంగా తీసుకునేది ప్రేమ కాదన్న విషయం గ్రహించండి. ప్రస్తుతం మీ మనసులో అతను ఒక బలహీనత.. ఆ బలహీనతను అధిగమించడానికి ఏం చేయాలి? అనే ధోరణిలో ఆలోచించి చూడండి. ఈ క్రమంలో అనేక మార్గాలుంటాయి. మీరు రిలాక్స్‌ అవడం, కొంతకాలం దూరంగా వెళ్లి మనసుని మళ్లించుకునే ప్రయత్నం చేయడం, అలాగే మీ మనసులో అతనికిచ్చిన స్థానాన్ని మీకు నచ్చిన మరే అంశంతోనైనా భర్తీ చేసుకోవడం.. వంటివి చేయండి. అలాగే మీరు చదువుకున్న సమయంలో మీకున్న స్నేహితులు కానీ, పెళ్లి చేసుకున్న వాళ్లు గానీ.. వాళ్లతో మళ్లీ అనుబంధాలు పెంచుకునే ప్రయత్నాలు చేయండి. ఇలా మీ పరిధిని పెంచుకునే కొద్దీ మీ ఆలోచనల్లో చేసుకోగలిగిన మార్పులేంటో మీకే అర్థం అవుతాయి. అలాగే మిమ్మల్ని అర్థం చేసుకునే వ్యక్తి, మిమ్మల్ని మీరుగా గౌరవించే వ్యక్తి, మిమ్మల్ని సంపూర్ణంగా స్వీకరించే వ్యక్తి ఈ ప్రయత్నంలో మీకు తారసపడచ్చు.


Know More

నమస్తే మేడమ్‌.. నా వయసు 39 సంవత్సరాలు.. నేను ఐటీ ఉద్యోగిగా పనిచేసేదాన్ని. బాబు పుట్టడంతో ఏడేళ్ల క్రితం ఉద్యోగం మానేశాను. ఇప్పుడు బాబు స్కూల్‌కి వెళ్తున్నాడు. దీంతో నా కెరీర్‌ని తిరిగి మొదలు పెట్టాలనుకుంటున్నాను. అయితే ఈ వయసులో ఐటీ రంగంలో పని చేయడం వల్ల ఆరోగ్య సమస్యలు వచ్చే అవకాశాలు ఎక్కువ. అందుకని నా ఆలోచనలు బిజినెస్‌ వైపు మళ్లాయి. అయితే నాది అంతర్ముఖ స్వభావం. దానివల్ల మా ఆయన నువ్వు సొంతంగా బిజినెస్‌ నడపలేవని అంటున్నారు. దయచేసి సలహా ఇవ్వగలరు. - ఓ సోదరి


మీరు ఇంతకుముందు ఎంచుకున్న వృత్తి ఐటీ. అంటే కంప్యూటర్‌ని ఉపయోగిస్తూ దానికి మేధోశక్తిని జోడించి ప్రపంచంతో అనుసంధానమవ్వడం. ఈ క్రమంలో కొన్ని కొన్ని పనులను పూర్తి చేయగలిగేవారు. అదేవిధంగా అదే కంప్యూటర్‌తో మీ మేధోశక్తిని ఉపయోగించి బిజినెస్‌ చేసే ఆలోచనలను ప్రయత్నించండి. అయితే ఈ క్రమంలో మీ మనస్తత్వానికి తగ్గ వ్యాపకాన్ని బిజినెస్‌గా మార్చుకోవచ్చేమో ఆలోచించండి. మీరు ఎంచుకున్న బిజినెస్‌ని విస్తృతం చేసుకోవడానికి మీకున్న పరిచయాలను ఉపయోగించుకునే అవకాశం ఉందేమో పరిశీలించండి. అలాగే ప్రస్తుతమున్న సామాజిక మాధ్యమాల ద్వారా కూడా బిజినెస్‌ని విస్తృతంగా ప్రచారం చేసుకునే అవకాశం ఉంది. ఆ కోణంలో కూడా ఓసారి ఆలోచించండి.

అలాగే ఒకేసారి పెద్ద ప్రయత్నాలు చేసి విజయం సాధించలేనేమో అన్న భయాలు ఉంటే.. చిన్న చిన్న ప్రయత్నాలతో బిజినెస్ మొదలుపెట్టండి. అలా క్రమక్రమంగా ప్రతి విజయాన్ని ఆస్వాదిస్తూ బిజినెస్‌ని విస్తృతం చేసుకుంటూ, పెట్టుకున్న లక్ష్యాలను సాధించే దిశగా ముందడుగేయండి. బలహీనతలపై దృష్టి పెట్టి మీకున్న బలాలను మర్చిపోవక్కర్లేదు. కాబట్టి మీకున్న బలాలను గుర్తు చేసుకుంటూ.. వాటిని ఉపయోగించి ముందుకు సాగే ప్రయత్నం చేయండి. అలాగే మీకు అలవాటైన పనినే వీలైనంత వరకు మీకు అనువుగా మలుచుకునే ప్రయత్నం చేయండి.. విజయం మీ సొంతమవుతుంది.


Know More

హాయ్‌ మేడమ్‌... నాకు పెళ్లై ఆరు సంవత్సరాలవుతోంది. పాప, బాబు ఉన్నారు. నా భర్తకి చిన్న విషయానికే కోపం వచ్చేస్తుంటుంది. మొదటి నుంచి అంతే. కోపంలో బూతులు తిడతాడు. ఎక్కడున్నా సరే నన్ను, మా కుటుంబ సభ్యులను చులకన చేసి మాట్లాడతాడు. ఎన్ని విధాలుగా చెప్పినా అలాగే చేస్తాడు. ఒక్కోసారి నాకు తన నుంచి విడిపోవాలనిపిస్తుంది. కానీ నా పిల్లల భవిష్యత్తు ఏమైపోతుందో? అని ఆగిపోవాల్సి వస్తుంది. ఇప్పటివరకు ఒక్కరోజు కూడా నన్ను హేళనగా మాట్లాడని రోజు లేదు. అతన్ని ఎలా మార్చుకోవాలో దయచేసి సలహా ఇవ్వగలరు. - ఓ సోదరి


అతని కోపం, ఆవేశం, నోటి దురుసు వంటి విషయాల గురించి ఈపాటికి మీకు స్పష్టమైన అవగాహన వచ్చి ఉంటుంది. కాబట్టి అతను మాములుగా ఉన్నప్పుడు దానివల్ల కలిగే నష్టం గురించి వివరించే ప్రయత్నం చేయండి. తనకు కోపం వచ్చినప్పుడు దూకుడుగా వ్యవహరించకుండా.. సాధారణంగా ఉన్న సందర్భాలు ఏవైనా ఉన్నాయా? ఒకవేళ ఉంటే ఎందుకు అలా ప్రవర్తించాడు అనేది కూడా విశ్లేషించండి. దానికి ఇటువంటి సందర్భాలను ఉపయోగించుకునే ప్రయత్నం చేయండి. అలాగే కోపం వచ్చినా సౌమ్యంగా మాట్లాడడం వల్ల కలిగే ప్రయోజనాలను తెలియజేయండి.

మీ భర్త కోపాన్ని నియంత్రించడానికి మానసిక నిపుణుల సహాయం తీసుకొని, తనకు తాను నియంత్రించుకునే పద్ధతుల గురించి విడమరిచి చెప్పే ప్రయత్నం చేయండి. అలాగే మీకు ఇద్దరు పిల్లలున్నారని చెప్పారు. అతని కోపం, నోటి దురుసుతనం వల్ల పిల్లలకు కలిగే నష్టాలు, దుష్పరిణామాల గురించి కూడా వివరించే ప్రయత్నం చేయండి. నిరంతరం చేసే ధ్యానం, యోగా వంటివి కూడా కోపాన్ని తగ్గించడంలో ఉపయోగపడతాయి. కాబట్టి వాటిని అలవాటు చేసే ప్రయత్నం చేయండి.

ఏ విషయంలోనైనా స్వీయ అనుభవాలే సమస్యకు పరిష్కారం వెతకడంలో ఉపయోగపడతాయి. కాబట్టి తనంతట తానుగా తన మానసిక స్థితిని విశ్లేషించుకుంటే సరైన పరిష్కారం దొరకడానికి అవకాశం ఎక్కువగా ఉంటుంది. కాబట్టి అతను ఆ స్థితికి చేరుకునే విధంగా మీ వంతు ప్రయత్నం చేసే అవకాశం ఉంటుందేమో ఆలోచించండి. అయితే అతను అలా నియంత్రించుకోవడానికి ప్రయత్నిస్తే మీరు దానికి తగ్గ తోడ్పాటు ఇచ్చే ప్రయత్నం చేయండి. అలాగే ఒకవేళ తనకు తాను మానసిక నిపుణులను సంప్రదిస్తే.. వారు కొన్ని పద్ధతులు చెప్పే అవకాశం ఉంటుంది. ఈ క్రమంలో అతనికి మీ తోడ్పాటుని అందించండి.


Know More

హాయ్‌ మేడమ్‌.. నా వయసు 25. పోటీపరీక్షలకు ప్రిపేర్‌ అవుతున్నాను. నన్ను బాధ పెట్టిన విషయాలే నాకు పదే పదే గుర్తుకు వస్తున్నాయి. దానివల్ల ఎంతకీ చదువు మీద శ్రద్ధ పెట్టలేకపోతున్నా.. నా మనసును చదువు మీదే కేంద్రీకరించాలంటే ఏం చేయాలి? దయచేసి సలహా ఇవ్వగలరు? - ఓ సోదరి


మనసులో వచ్చే ఆలోచనలను బలవంతంగా నియంత్రించాలని ప్రయత్నిస్తే అవి మిమ్మల్ని మరింతగా ఇబ్బంది పెడుతున్నాయని మీ ప్రశ్న సూచిస్తుంది. ప్రతికూల ఆలోచనలను మనసులోకి రానీయకుండా సానుకూలంగా ఆలోచించే ప్రయత్నం చేయండి. వెలుగు, చీకటి లాగానే ప్రతి విషయంలోనూ మంచి, చెడు ఉంటుంది. మీకు చెడుగా కనిపించిన సంఘటనల్లో మంచి ఏంటనేది ఆలోచించే ప్రయత్నం చేయండి. అందులో నేర్చుకున్న పాఠం ఏంటి? దానివల్ల నేర్చుకున్న మంచి ఏంటి? అనేది ఆలోచించే ప్రయత్నం చేయండి. అలాగే జీవితంలో బాధాకరమైన సంఘటనలతో పాటు అంతో ఇంతో సంతోషం కలిగించిన సందర్భాలు కూడా ఉంటాయి కదా.. కాబట్టి బాధ పెట్టే విషయాలు గుర్తుకువచ్చినప్పుడల్లా సంతోషం కలిగించిన సందర్భాలను గుర్తుకు తెచ్చుకునే ప్రయత్నం చేయండి.

ఇక చదువు విషయానికొస్తే మీరు క్రమశిక్షణతో, ప్రణాళికబద్ధంగా చదివే ప్రయత్నం చేయండి. దీనివల్ల ప్రతికూల ఆలోచనలు పక్కకు పోయి మీరు సాధించాలనుకున్నా లక్ష్యం పైపు మీ ఆలోచనలు మళ్లే అవకాశం ఉంటుంది. ఈ క్రమంలో మొదట చిన్న చిన్న లక్ష్యాలను పెట్టుకుంటూ ముందుకు సాగండి. ఫలితం తప్పకుండా మీకు అనుకూలంగా వస్తుంది.


Know More

హాయ్‌ మేడమ్‌.. నా వయసు 29. ఆఫీసర్‌ స్థాయి ఉద్యోగినిని. నా తల్లిదండ్రులు కూడా ఉద్యోగులే. నాకు ఇష్టం లేకుండా కుదిర్చిన పెళ్లిని రద్దు చేశాను. నాకు మా బావ అంటే చాలా ఇష్టం. కానీ, తను నన్నే పెళ్లి చేసుకోవాలని అనుకోవట్లేదు. నేనేమో మరో వ్యక్తిని నా భర్తగా ఊహించుకోలేకపోతున్నా. ఒక్కోసారి ఇష్టం లేకుండా పెళ్లి చేసుకునే కంటే అసలు పెళ్లే వద్దు అనిపిస్తుంది. అలా చేస్తే మా తల్లిదండ్రులు బాధపడతారు. నాకు ఎలా ముందుకు వెళ్లాలో తెలియడం లేదు. దయచేసి సలహా ఇవ్వగలరు. - ఓ సోదరి


మీకు ఏది వద్దో తెలుసు కానీ.. ఏది కావాలో అనే విషయంలో స్పష్టత వచ్చినట్టు లేదు. మీకు నచ్చలేదు అన్న కారణంతో మీ తల్లిండ్రులకు నచ్చిన సంబంధాన్ని తిరస్కరించగలిగారు. కానీ, మీకు నచ్చాడు అన్న వ్యక్తికి మీరు నచ్చారా? లేదా? అన్న విషయం తెలియదు. అలాగే తను మిమ్మల్ని పెళ్లి చేసుకోవడానికి సుముఖంగా ఉన్నాడా? లేదా? అన్న దాంట్లో స్పష్టత లేదు. కాబట్టి మీకు నచ్చిన వ్యక్తిని కచ్చితంగా పెళ్లి చేసుకోవాలనుకుంటే మీ తల్లిదండ్రులు ద్వారా విచారించే ప్రయత్నం చేయచ్చేమో ఆలోచించండి. ఒకవేళ అతనికి ఇష్టం లేకపోతే మీ ఆలోచనలకు, అభిప్రాయాలకు విలువిచ్చే వ్యక్తి తారసపడతారేమో చూడండి.

అటు ప్రయత్నాలు చేయకుండా, ఇటు మనసులో ఏవో ఆలోచనలు పెట్టుకొని వచ్చిన సంబంధాలను కాదనుకోవడం మీలోని సందిగ్ధతను సూచిస్తుంది. కాబట్టి పెళ్లి విషయంలో మీలో ఒక స్పష్టత రావాలంటే మీ ఆలోచనలకు తగ్గ వ్యక్తికి ఉండాల్సిన లక్షణాలేంటో ఒక అవగాహనకు రండి.. అయితే కచ్చితంగా మీరు అనుకున్న వ్యక్తి మీకు దొరుకుతారని ఎవరూ చెప్పలేరు. కాబట్టి కనీసం మీ అంచనాలకు దరిదాపుల్లో ఉండే వ్యక్తిని మీరు పొందగలరేమో ప్రయత్నం చేసి చూడండి. అలాగే మీకు అవతలి వ్యక్తి గురించి ఆలోచనలు, అభిప్రాయాలు ఏవైతే ఉంటాయో.. ఎదుటివారికి కూడా అలాగే ఉంటాయని అర్థం చేసుకోండి. కాబట్టి మీరు వాటికి ఎంత సమీపంగా ఉంటారనేది కూడా ఆలోచించుకోండి.


Know More

నమస్తే మేడమ్‌.. నేను ఒక అబ్బాయిని ప్రేమించాను. అతనికి చదువు, సంస్కారం, మంచితనం, ఉద్యోగం అన్నీ ఉన్నాయి. అతనికి కూడా నేనంటే అంతే ఇష్టం. అన్ని విషయాల్లో మేము దగ్గరయ్యాం. మా ఇంట్లో నేను ప్రేమించిన వ్యక్తితో పెళ్లి చేయమని అడిగితే అస్సలు ఒప్పుకోలేదు. అమ్మ ఆరోగ్యం క్షీణించిందని, బంధువులందరూ నన్ను తిట్టడంతో ఇష్టం లేకున్నా నా మేనత్త కొడుక్కిచ్చి పెళ్లి చేశారు. మా పెళ్లై నెల రోజులవుతోంది. అయితే మా ప్రేమ విషయాన్ని గత రెండు సంవత్సరాలుగా మా బావకు చెబుతూనే ఉన్నాను. ఇప్పుడు నేను ఆఫీసు పని మీద నా భర్తకు దూరంగా వేరే ఊరిలో ఉంటున్నా. అతనంటే నాకు అస్సలు ఇష్టం లేదు. ఇప్పుడు అమ్మ ఆరోగ్యం బాగుంది. కేవలం నా పెళ్లి గురించే అమ్మ అలా చేసిందని తెలిసింది. మరోపక్క నేను ప్రేమించిన అబ్బాయి ఇప్పటికీ నన్ను పెళ్లి చేసుకోవడానికి సిద్ధంగా ఉన్నానని, రమ్మని అంటున్నాడు. అతని ఇంట్లో వాళ్లు కూడా నన్ను ఆహ్వానించడానికి సిద్ధంగా ఉన్నారని అంటున్నాడు. ఇప్పుడు నాకు ఏం చేయాలో తెలియడం లేదు. దయచేసి సలహా ఇవ్వగలరు. - ఓ సోదరి


ఇది ముగ్గురి జీవితాలను, మూడు కుటుంబాలను ప్రభావితం చేసే నిర్ణయం కాబట్టి చాలా జాగ్రత్తగా ఆచితూచి అడుగు వేయాలన్న విషయం మర్చిపోకండి. కేవలం అమ్మ ఆరోగ్యం మీద ఆధారపడి నిర్ణయం తీసుకోవాల్సి రావడం దురదృష్టకరం. ఇప్పటికే ఒక నిర్ణయం తీసుకున్నారు. ఏ నిర్ణయమైనా తొందరపాటుతో తీసుకునేది కాదు.. జాగ్రత్తగా ఆలోచించి తీసుకోవాల్సి ఉంటుందని అర్థం చేసుకోండి. మరొక నిర్ణయం తీసుకునే ముందు మీరు, మీరు ప్రేమించిన అబ్బాయే కాకుండా మీ అందరి కుటుంబాలు ఇందులో భాగస్వాములే అన్న విషయాన్ని గుర్తు పెట్టుకోండి. మీ మనసులో ఉన్న విషయాన్ని మీ భర్తతో ఇంతకు ముందే చెప్పారు కాబట్టి మొదట మీ ప్రస్తుత పరిస్థితిని, మీ భవిష్యత్తు ఆలోచనల గురించి అతనితో మాట్లాడండి. ఏ నిర్ణయం తీసుకున్నా.. కలిసి ఆలోచించి నిర్ణయం తీసుకోండి.

అలాగే మిమ్మల్ని ప్రేమించిన వ్యక్తి తన కుటుంబం మిమ్మల్ని ఆహ్వానిస్తుందని చెబుతున్నాడు. అది ఎంతవరకు నిజం అనేది కూడా కచ్చితంగా తెలుసుకోండి. మీరు తీసుకోబోయే నిర్ణయం అందరి జీవితాలను ప్రభావితం చేసే అవకాశం ఉంటుంది. తర్వాత ‘అనవసరంగా నిర్ణయం తీసుకున్నా’, ‘మీ ఇద్దరి వల్ల నా జీవితం దెబ్బతిన్నది’, ‘ఇతరుల మాట విని నిర్ణయం తీసుకున్నా’.. అని బాధపడాల్సి రాకుండా లోతుగా ఆలోచించి, భవిష్యత్తుని దృష్టిలో పెట్టుకొని నిర్ణయాలు తీసుకోండి.


Know More

మేడమ్‌.. నా వయసు 24. మేము ముగ్గురం అక్కచెల్లెళ్లం.. మా తల్లిదండ్రులకు నేను రెండో సంతానం. ప్రస్తుతం నేను ఉద్యోగం చేస్తున్నాను. మా తల్లిదండ్రులు నాతో తప్ప మిగతా ఇద్దరితో బాగానే ఉంటారు. ఇంటి పనులు నాతోనే ఎక్కువగా చేయిస్తుంటారు. నా పట్ల వాళ్లు అలా ప్రవర్తిస్తుంటే రెండో అమ్మాయిగా పుట్టడమే నేను చేసిన తప్పేమో అనిపిస్తుంది. ‘అవసరానికి నేను.. ప్రేమను పంచడానికి మాత్రం వాళ్లు కావాలా?’ అనిపిస్తుంది. ఒక్కోసారైతే ఇవన్నీ భరించలేక చనిపోవాలనిపిస్తుంది. ఏమైనా అంటే ‘నీకు వాళ్లిద్దరి మీద అసూయ’ అని తిడతారు. అసలు నేనంటే అంత ఇష్టం లేనప్పుడు ఇంకా నేను ఎందుకు బతికున్నానా అనిపిస్తుంది. ఈ సమస్య నుంచి ఎలా బయట పడాలో అర్థం కావట్లేదు. దయచేసి సలహా ఇవ్వగలరు - ఓ సోదరి


మీ ఆలోచనల్లో నైరాశ్యం కనిపిస్తోంది.. వాళ్లు మాట్లాడే మాటలకు కానీ, వాళ్ల చేతలకు కానీ మీరు అవసరానికి మించిన ప్రాధాన్యం  ఇస్తున్నారేమో ఒకసారి ఆలోచించండి. ముగ్గురు పిల్లల్లో రెండో అమ్మాయిగా పుట్టడం వల్ల మీకు తగిన ప్రాధాన్యం లభించకపోవడం అనే బాధ మిమ్మల్ని ప్రతికూల ఆలోచనల వైపు మళ్లిస్తోందా? అన్నది కూడా ఒకసారి విశ్లేషించుకోండి. మీ తల్లిదండ్రులు మీకున్న అభద్రతా భావాలు, ఆత్మన్యూనతా భావాలు అర్థం చేసుకోకుండా మిగతా ఇద్దరిపై మీరు అసూయ చూపుతున్నారనడం మీలోని నిరాశను మరింత పెంచుతున్నట్లుగా మీ ఉత్తరం సూచిస్తోంది. కాబట్టి ముందుగా మీ భావాలను, వారి ప్రవర్తన మూలంగా మీరు పడుతోన్న బాధను మీ తల్లిదండ్రులకు విడమరిచి చెప్పండి. తద్వారా వాళ్లు కొంతవరకు మిమ్మల్ని అర్థం చేసుకోగలుగుతారేమో చూడండి. ఈ క్రమంలో మిగతా వాళ్ల గురించి ప్రస్తావించడం, వారితో మిమ్మల్ని పోల్చుకోవడం కాకుండా.. మీ పట్ల మీ పేరెంట్స్‌ ఎలా ఉంటే మీరు సంతోషంగా ఉండగలుగుతారో వారికి వివరించండి. అలా చేస్తే వారిలో మార్పు వచ్చే అవకాశం ఉందేమో ప్రయత్నించండి.

My parents always give more importance to my siblings than me. What should I do?

నైరాశ్యాన్ని తగ్గించుకోండి!

అంతేకాదు.. ఇదే సమయంలో మీలో ఉన్న నైరాశ్యాన్ని తగ్గించుకోవడానికి ఏం చేయాలో కూడా మీరు ఆలోచించాలి. ఈ క్రమంలో మీ మీద మీకు నమ్మకం, విశ్వాసం పెంచుకోవడానికి ప్రస్తుతం ఆన్‌లైన్‌లోనూ అనేక పుస్తకాలు అందుబాటులో ఉన్నాయి.. అలాగే కొన్ని వెబ్‌సైట్స్‌ను మీరు విస్తృతంగా పరిశీలించడం ద్వారా మీ ఆలోచనాధోరణిలో ఉన్న నిరాశని మీరు ఎలా తగ్గించుకోవచ్చనేది తెలుసుకోవచ్చు. వీటితో పాటు విజయవంతమైన వ్యక్తుల జీవిత చరిత్రలు, ప్రముఖుల సూక్తులు.. వంటివి కూడా మీలో సానుకూల దృక్పథాన్ని పెంచేందుకు దోహదం చేస్తాయి. ఇలా మీ ఆత్మవిశ్వాసాన్ని పెంచుకొని, మీకంటూ ఒక ప్రత్యేకమైన ఉనికిని ఏర్పరచుకొని, జీవితంలో ముందుకెళ్లడం ద్వారా మీ మనసులో కలిగే నిరాశాపూరిత ధోరణి క్రమంగా తగ్గుతుందన్న విషయం గ్రహించండి.

ఒకవేళ ఇలా చేసినా మీ ఆలోచనల్లో మార్పు రాకపోయినా, మీ తల్లిదండ్రులు మీ పట్ల అదే ధోరణితో వ్యవహరించినా.. ఇద్దరూ కలిసి మానసిక నిపుణుల వద్ద కౌన్సెలింగ్‌కి వెళ్లడం మంచిది. తద్వారా ఇటు మీ ఆలోచనా విధానంలో, అటు వారిలో క్రమంగా మార్పులు చోటుచేసుకునే అవకాశం ఉంటుంది.


Know More

మేడం.. నా వయసు 30సం||. నాది చాలా మెతక స్వభావం. నలుగురితోనూ కలవాలంటే చాలా సిగ్గు, భయం. అమ్మానాన్న నాకు చాలా సంబంధాలు చూశారు. కానీ నా స్వభావం కారణంగా నన్ను చేసుకోవడానికి మంచి సంబంధాల వాళ్లు ఎవరూ తొందరగా ముందుకు రాలేదు. ఆ తర్వాత 2015లో నాకు ఒక సంబంధం కుదిరింది. వాళ్లు నన్ను చేసుకుంటానని వెంట పడడంతో మంచి సంబంధమని చేసుకున్నాం. కానీ పెళ్లయ్యాక కూడా నా మెతక స్వభావం కారణంగా అత్తారింట్లో చాలా ఇబ్బందులు ఎదుర్కొన్నా. మా అత్తగారు చాలా డామినేటింగ్‌గా ఉండేవారు. ఆయన, అత్తయ్య.. ఏం చెబితే అది చేసేదాన్ని. భయం కారణంగా ఎక్కువ మాట్లాడేదాన్ని కాదు. కనీసం నా భర్తకు దగ్గరయ్యేందుకు కూడా సిగ్గు, భయం ఉండేవి. ఈ పద్ధతి మా అత్తగారు వాళ్లకి నచ్చలేదు. నన్ను ఎలాగైనా వదిలించుకోవాలని అనుకున్నారు.


మీ ఆలోచనల్లో ఉన్న స్పష్టత మీరు మీ సమస్య చెప్పిన విధానంలో ప్రస్ఫుటంగా కనిపిస్తోంది. మీ సమస్య ఏంటో మీకు స్పష్టంగా తెలుసు. మీరు మెతక స్వభావం అని అనుకుంటున్న దాని వెనుక గల కారణాలను ముందుగా విశ్లేషించుకోవడానికి ప్రయత్నించండి. మీలో ఉన్న అభద్రతలు ఏంటి? మీరు అవతలివారికి లొంగిపోవడం లేదా డామినేటింగ్‌గా ఉండలేకపోవడానికి గల కారణాలేంటో తెలుసుకోవడానికి యత్నించండి. అందరితోనూ మీది మెతక స్వభావం అని పిలిపించుకోవడం లేదా చెప్పించుకోవడం మీకు ఏ రకమైన ప్రయోజనాలను ఇచ్చింది? ఎప్పుడైనా దాని వల్ల మీకు ఎలాంటి లాభాలైనా కలిగాయా? అలా లాభాలు రావడం వల్ల మీరు దానిని కొనసాగిస్తూ వచ్చారా? అలాగే ఇంట్లో కూడా మీది మెతక స్వభావం అంటూ మీ తరఫున మిగతావాళ్లు నిర్ణయాలు తీసుకోవడం, మీ కోసం మిగతావాళ్లు అన్నీ చేయడం.. వంటివి చేస్తున్నారా?? ఇలాంటివి చేయడం వల్ల అది మీకు ఒక అలవాటు కింద మారిందా?? ఒకవేళ అది అలవాటుగా మారితే దానిని మార్చుకునే ప్రయత్నం చేయచ్చు. అయితే ఈ క్రమంలో మీకు మానసిక నిపుణుల సహాయం అవసరం.

ఎందుకు మీరు అనేక విషయాల్లో మాట్లాడలేకపోతున్నారు?? చక్కని ఆలోచన, స్పష్టత.. ఇవన్నీ ఉన్నప్పటికీ ఎందుకు మీరు వాటిని వ్యక్తీకరించలేకపోతున్నారు?? వంటి విషయాల గురించి ముందుగా మీకు మీరు విశ్లేషణాత్మకంగా ఆలోచించుకోండి. ఆలోచనల్లో స్పష్టత లేకపోయినా లేదా తెలియకపోయినా.. ఆ పరిస్థితి వేరుగా ఉంటుంది. కానీ మీకు సమస్యపై చక్కని స్పష్టత ఉంది. అలాగే చక్కని ఆలోచనా తీరు కూడా ఉంది. అన్నీ తెలిసి కూడా మీరు ఏమీ చేయలేకపోతున్నారంటే దానికి తగ్గ ప్రయత్నాలు ఏ రకంగా చేయాలో ఆలోచించండి. అలాగే వాళ్ల ఇష్టానికి అనుగుణంగా విడాకుల వరకు వెళ్లిపోవడం కూడా కాస్త ఆశ్చర్యకరంగానే ఉంది. అయితే ఆ బంధం ముగిసిపోయింది కాబట్టి దాని గురించి ఇక చర్చ అనవసరం. మీకు కావాల్సిన విధంగా జీవితాన్ని నడుపుకోవాలంటే మీ కాళ్లపై మీరు నిలబడాలి. స్వయంకృషితో మిమ్మల్ని మీరు దిద్దుకునే ప్రయత్నం చేయాలి. దాని కోసం మీలో ఉన్న జీవన నైపుణ్యాలను వెలికి తీసి వాటిని మెరుగుపరుచుకోవడం మంచిది. దీనికి మీకు మానసిక నిపుణుల సహాయం అవసరం అవుతుంది. ఆత్మవిశ్వాసం, దృఢత్వం (ఎసర్టివ్‌నెస్) పెంచుకోవడం, మీ కాళ్లపై మీరు నిలబడడం ద్వారా మీ గౌరవాన్ని మీరు పెంచుకోవడం.. వంటివి చేయాలి. ఎప్పుడైతే మీకు మీరు గౌరవం ఇచ్చుకోవడం ప్రారంభిస్తారో, ఇతరులకు కూడా మీపై గౌరవం పెరిగే పరిస్థితి ఏర్పడుతుంది.


Know More

నమస్తే మేడమ్‌.. నా వయసు 23 సంవత్సరాలు. నాకు ఈ మధ్య చాలా దిగులుగా ఉంటుంది. ఒకప్పుడు ఆరోగ్యంపై శ్రద్ధ తీసుకుంటూ బాగా చదివేదాన్ని.. కానీ కొన్ని రోజుల నుంచి మనసు నిలకడగా ఉండటం లేదు. ఏ పని చేసినా సగంలోనే ఆపేస్తున్నా. నేను పోటీ పరీక్షలకు సిద్ధమవ్వాలనుకుంటున్నా.. కానీ తీరా చదివే సమయంలో ‘ఇప్పుడు ఇది కాదేమో.. వేరే సబ్జెక్ట్‌ చదివితే బాగుండు!’ అనిపిస్తుంది. ప్రతి విషయంలోనూ ఇలాగే అనిపిస్తుంది. దీంతో ఏ పనిని సంపూర్ణంగా చేయలేకపోతున్నా.. దీనివల్ల ఏదో ఆరాటం, బాధ, దిగులు నాలో కనిపిస్తుంది. రాత్రిళ్లు సరిగ్గా నిద్ర కూడా పట్టడం లేదు. రేపు ఎలాగైనా ఈ పని చేయాలని పడుకుంటాను. కానీ మరుసటి రోజు మళ్లీ అదే అసంపూర్ణత! నేనేందుకు హుషారుగా ఉండలేకపోతున్నాను?దయచేసి సలహా ఇవ్వగలరు. - ఓ సోదరి


మీ వయసులో ఉన్న వాళ్లు చాలామంది లక్ష్యసాధనే ధ్యేయంగా ముందుకు వెళుతుంటారు. అయితే లక్ష్యాన్ని చేరుకునే క్రమంలో మీరు ఎంత క్రమశిక్షణతో పనిచేస్తున్నామనేది కూడా ముఖ్యమే. దానికి తగ్గట్టుగా ప్రణాళిక, నిబద్ధత, నియమావళిని రూపొందించుకోవాల్సి ఉంటుంది. అయితే మీ విషయంలో నిబద్ధతలో సమస్య లేకపోయినప్పటికీ ‘ఏవిధంగా అడుగులు వేయాలి’ అన్న విషయంలో స్పష్టత లేనట్టుగా తెలుస్తోంది. దీనికోసం మీరు మీలాగే ఆలోచించే కొంతమంది స్నేహితులతో మాట్లాడి చూడండి. మీరందరూ సమూహంగా ఏర్పడి ఒకరికొకరు సహాయం చేసుకునేలా ప్రయత్నం చేయండి.

మీ ఆర్థిక పరిస్థితి కనుక మీకు సహకరిస్తే ఇప్పుడున్న పరిస్థితులకనుగుణంగా కోచింగ్‌ తీసుకోగలుగుతారేమో చూడండి. కొన్ని సందర్భాల్లో కోచింగ్‌ తీసుకోవడం వల్ల కేవలం విజ్ఞానం పొందడమే కాకుండా క్రమశిక్షణ కూడా అలవడే అవకాశం ఉంటుంది. అలాగని కోచింగ్‌ తీసుకోవడం వల్లే జీవితంలో పైకొస్తారనుకోవడం కూడా సరైంది కాదు. సొంతంగా ప్రణాళికలు రచించుకొని, నిబద్ధత, క్రమశిక్షణతో చదివి విజయాలు సాధించిన వారు ఎంతోమంది ఉన్నారు. మీరు అనుసరిస్తోన్న పద్ధతిలో లోపమా? లేక ఆచరణలో లోపమా అనేది స్వీయ పరిశీలన చేసుకోండి. ఆలోచన ఒక్కటి సరిపోదు.. ఆలోచనతో పాటు ఆచరణ కూడా ముఖ్యమే. దీనికోసం పైన చెప్పినట్టుగా దానికి కావాల్సిన ప్రణాళికలను మీకు మీరే రచించుకోవాలి.

ఒకవేళ కోచింగ్‌ తీసుకోవడం సాధ్యం కాకపోతే మీకు మీరే కోచ్‌గా మారండి. మీ బలహీనతలను తెలుసుకుని వాటిని అధిగమించే ప్రయత్నం చేయండి. ఈ క్రమంలో పోటీ పరీక్షల్లో టాపర్స్‌గా నిలిచిన వారి విజయగాథలను తెలుసుకోండి. అలాగే మీరు ఒక్కరే కాకుండా తోటి స్నేహితులతో చదువుకునే ఏర్పాట్లు చేసుకోండి. దీనివల్ల మీ విజ్ఞానాన్ని పెంచుకోవడంతో పాటు సబ్జెక్టులను అర్థం చేసుకోవడంలో ఎక్కడ లోపాలున్నాయనే విషయం మీకు అర్థమవుతుంది. అంతేకాకుండా మరిన్ని విషయాలు నేర్చుకోవాలన్న ఆసక్తి కూడా పెరుగుతుంది. ఏది ఏమైనా మీకంటూ ఒక ప్రణాళికను ఏర్పరచుకుని దానిని సాధించే దిశగా అడుగులు వేయండి. ఈ క్రమంలో ఎలాంటి ప్రతికూల ఆలోచనలకు తావివ్వకండి. పట్టు వదలని విక్రమార్కుడిలా ప్రయత్నిస్తే విజయం మీదే అన్న విషయాన్ని మరవకండి.


Know More

నమస్తే మేడమ్‌.. నేను ఒక అబ్బాయిని ఐదు సంవత్సరాల నుంచి ప్రేమిస్తున్నాను. ఈ విషయం తనకి, నాకు మాత్రమే తెలుసు. కానీ అనుకోకుండా ఆ అబ్బాయికి వేరే అమ్మాయితో పెళ్లైంది. ఈ విషయం తెలిశాక తట్టుకోలేకపోతున్నా. తీవ్ర ఒత్తిడికి లోనవుతున్నా. ఎప్పుడూ తన గురించే ఆలోచిస్తున్నా. నాకు కూడా ఇంట్లో సంబంధాలు చూస్తున్నారు. ఈ విషయం ఇంట్లో వాళ్లకి చెప్పలేను. ఏం చేయాలో నాకు అర్థం కావడం లేదు. ఎంత మర్చిపోదాం అనుకున్నా నా వల్ల కావడం లేదు. ఈ పరిస్థితుల నుంచి బయటపడలేకపోతున్నా.. దయచేసి సలహా ఇవ్వగలరు. - ఓ సోదరి


మీరిద్దరూ పరస్పరం ప్రేమించుకున్నా.. అతను తన పరిస్థితులకు తలవంచి తన జీవితంలో అడుగు ముందుకు వేశాడు. అలాంటప్పుడు మీరు మాత్రమే దానికి బాధ్యులైనట్టుగా ఎందుకు బాధపడుతున్నారనేది స్వీయ విశ్లేషణ చేసుకోండి. అతను తనకంటూ ఒక జీవితం ఏర్పరచుకున్న తర్వాత.. అతని గురించి ఆలోచించడం వల్ల మీకు కానీ, అతనికి కానీ ఏమాత్రం ప్రయోజనం ఉండదన్న విషయం అర్థం చేసుకోండి. సముద్రంలో అలల్లాగా జీవితంలో ఒడిదొడుకులు ఎదురైనప్పటికీ ముందుకు సాగక తప్పదు. అలాంటప్పుడు అడుగు ముందుకు వేసే క్రమంలో ఏం చేయాలి అనేది ఆలోచించండి. గతంలో జరిగింది ఏదైనా జ్ఞాపకమే కానీ వర్తమానం కాదు కదా.. కాబట్టి గతాన్ని మర్చిపోయి భవిష్యత్తు గురించి ఆలోచించండి. జీవితంలో మీరు పెట్టుకోవాలనుకున్న లక్ష్యాలు ఏంటి.. వాటిని చేరుకోవడానికి ఎలాంటి ప్రయత్నం చేయాలి? అనే విషయాల్లో స్పష్టత తెచ్చుకోండి. దానివల్ల అతని ఆలోచనల నుంచి బయటడపడే అవకాశం ఉంటుంది. జీవితంలో సానుకూల దృక్పథం ఎంతో అవసరం. మిమ్మల్ని మీరుగా గుర్తించి, మిమ్మల్ని ఇష్టపడి పెళ్లి చేసుకునే వ్యక్తి భవిష్యత్తులో దొరకడు అని అనుకోవాల్సిన అవసరం లేదు. కాబట్టి ప్రస్తుతం మీరు మీ చదువు, ఉద్యోగం, లక్ష్యాలవైపుగా దృష్టి సారించండి.


Know More

హాయ్‌ మేడమ్‌.. నేను 2019లో పీజీ పూర్తి చేశాను. ప్రస్తుతం ఇంట్లోనే ఉంటున్నాను. ఉద్యోగం చేద్దామనుకునే సమయానికి మా అక్కకి డెలివరీ టైం వచ్చింది. అమ్మకి ఆరోగ్యం బాలేకపోవడంతో అక్కకు సహాయం చేయడం కోసం ఇంట్లోనే ఉండిపోయా. ఇప్పుడు ఉద్యోగం కోసం ప్రయత్నిస్తుంటే వర్కౌట్‌ కావడం లేదు. మా ఇంట్లో వాళ్లు, అక్కలు నాకు జాబ్‌ లేదని జాలి పడుతున్నారు. నాకు కావాల్సినవి కొనిస్తున్నారు. కానీ, అది నాకు నచ్చడం లేదు. ఇలా ఖాళీగా ఉండడం వల్ల డిప్రెషన్‌కి లోనవుతున్నా.. ఏమాత్రం సంతోషంగా ఉండలేకపోతున్నాను. దీనికి తోడు మీ అక్కలిద్దరూ గవర్నమెంట్‌ జాబ్‌ చేస్తున్నారు.. నువ్వు ఏమీ చేయడం లేదని బంధువులు హేళన చేస్తున్నారు. ఆ బాధను అసలు తట్టుకోలేకపోతున్నా. ఒక్కోసారి చనిపోవాలనిపిస్తోంది. ఏం చేయాలో అర్థం కావడం లేదు. దయచేసి నా సమస్యకు పరిష్కారం చెప్పగలరు. - ఓ సోదరి


మీ అమ్మగారికి ఆరోగ్యం బాలేకపోవడంతో మీ అక్కకి చేయవలసిన సహాయం చేసి కుటుంబానికి అండగా నిలబడ్డారు. అయితే ఆ సమయంలోనే ‘జీవితంలో చాలా కోల్పాయాను’ అన్న బాధ మిమ్మల్ని ఇబ్బంది పెడుతోందని అర్థమవుతోంది. అలాగే ఉద్యోగం లేదన్న మీ బాధను చూసి మీ అక్కలు కూడా మీపై జాలిని చూపిస్తున్నారు.

అయితే కేవలం కొద్ది రోజుల సమయం కోల్పోయినంత మాత్రాన జీవితంలో అన్ని అవకాశాలు కోల్పోయే పరిస్థితి ఉండదు. ప్రస్తుతమున్న ఖాళీ సమయంలో ఓ పక్క ఉద్యోగం వెతుక్కుంటూనే ఇంకా ఏం చేయచ్చనేది ఆలోచించండి. ఏమీ చేయకుండా ఉండడం వల్ల కుంగుబాటుకి లోనయ్యే అవకాశం ఉంటుంది. కాబట్టి, మీ మనుసుని మీకిష్టమైన పనుల వైపు మళ్లించే ప్రయత్నం చేయండి. ఉదాహరణకు మీకు ఇష్టమైన సబ్జెక్టుపై మీకున్న అవగాహనను మెరుగుపరచుకునే ప్రయత్నం చేయండి. దీనికోసం ఆన్‌లైన్‌ కోర్సులు, దూరవిద్యా విధానాలను ఉపయోగించుకోవచ్చు. అలాగే అనుభవం కోసం ఇంటర్న్‌షిప్‌లు, పార్ట్‌టైమ్‌ ఉద్యోగాలు చేయచ్చా? అనేది కూడా ఆలోచించుకోండి.

ఇకపోతే మీరు ఉద్యోగ ప్రయత్నాల్లో ఉన్నానని చెప్పారు. అయితే మీరు ఎలాంటి ఉద్యోగాల కోసం వెతుకుతున్నారు? మీకు అందుబాటులో ఉన్న అన్ని అవకాశాలనూ అన్వేషిస్తున్నారా, లేకపోతే ఏవో కొన్నిటిని మాత్రమే ఎంపిక చేసుకొని అవి దొరకడం లేదని బాధపడుతున్నారా? వంటి విషయాలను పరిశీలించుకోండి. అలాగే మీ సహజమైన ఆలోచనా విధానం నుంచి కొంచెం పక్కకు మళ్లి కొత్తగా ఆలోచించే ప్రయత్నం చేయండి (Out of The Box). దీనివల్ల సానుకూల ఫలితాలు వచ్చే అవకాశం ఉంటుంది. ఏది ఏమైనా మీ నైపుణ్యాలను మెరుగుపరుచుకుంటే చక్కటి ఫలితాలు రావాల్సిన సమయంలో వస్తాయనడంలో ఎలాంటి సందేహం లేదు. కాబట్టి నిరుత్సాహపడకుండా ప్రతి విషయాన్నీ సానుకూల దృక్పథంతో ఆలోచించండి.
- డా|| పద్మజ, సైకాలజిస్ట్


Know More

హాయ్‌ మేడమ్.. నా వయసు 23 సంవత్సరాలు. నేనొక అబ్బాయిని ప్రేమిస్తున్నాను.. అయితే మా ఇద్దరి మతాలూ వేరు.. నాకోసం అతను మా మతంలోకి మారాడు. మా ఇంట్లో వాళ్లతో కూడా మాట్లాడి పెళ్లికి ఒప్పించాడు. కానీ ఈ మధ్య తనతో నా జీవితం ఎలా ఉంటుంది? భవిష్యత్తులో ఏవైనా సమస్యలు వస్తాయా? అన్న ఆలోచనలు వస్తున్నాయి. తన మీద నాకు నమ్మకం ఉంది.. బాగా చూసుకుంటాడు.. కానీ అప్పుడప్పుడు డిఫరెంట్‌గా ప్రవర్తిస్తుంటాడు. చిన్న చిన్న విషయాలకే నేను సహకరించడం లేదని కోపగించుకోవడం, గొడవ పడడం చేస్తుంటాడు. తను ఇంకా సెటిల్‌ అవ్వలేదు. జాబ్‌ గురించి వెయిట్‌ చేస్తున్నాడు. నేను బీపీవోలో వర్క్‌ చేస్తున్నాను. పెళ్లయ్యాక కూడా జాబ్‌ చేస్తాను. వాళ్లది పేద కుటుంబం. సొంత ఇల్లు కూడా లేదు. ఇలాంటి పరిస్థితుల్లో నేను అతనిని మతాంతర వివాహం చేసుకోవడం కరక్టేనా?దయచేసి సలహా ఇవ్వగలరు. - ఓ సోదరి


ఒక వ్యక్తిని ఇష్టపడడం, మీకోసం అతను మతాన్ని మార్చుకోవడం, మీ ఇంట్లో ఒప్పుకోవడం జరిగిపోయాయి. అయితే మీ సాన్నిహిత్యంలో ఇన్ని రోజులూ రాని అనుమానాలు ఇప్పుడు రావడానికి కారణం ఏమిటో మీకు మీరు విశ్లేషించుకోండి. అతను ఉద్యోగం చేయడం లేదు, ఇంకా సెటిల్‌ అవ్వలేదు కాబట్టి భవిష్యత్తులో మీకు భారం అవుతాడేమో అన్న భయం మీ మనసులో ఎక్కడైనా ఉందా? అలాంటి సందర్భంలో ఇద్దరూ సెటిల్‌ అయ్యేవరకూ ఆగాలనుకుంటున్నారా.. ఇలాంటివన్నీ ఆలోచించుకోండి.

పెళ్లంటే ఇద్దరి ఆలోచనలూ కలవడం, అభిప్రాయాలు పంచుకోవడం, అనుబంధాలు పెంచుకోవడం వంటివన్నీ ముఖ్యమైనవి. అయితే ఎంత దగ్గరివారికైనా డబ్బు విషయం దగ్గరకు వచ్చేసరికి అభిప్రాయ భేదాలు వచ్చే అవకాశం ఉంటుంది. కాబట్టి ఆర్థికపరమైన అంశాల గురించి ఇద్దరూ మాట్లాడుకొని ఒక అవగాహనకు వచ్చే ప్రయత్నం చేయండి. అలాగే భవిష్యత్తు గురించిన ఆలోచనలు, బాధ్యతల పైన కూడా ఒక స్పష్టమైన అవగాహనకు వచ్చిన తర్వాతే ముందడుగు వేసే ప్రయత్నం చేయండి.
- డా|| పద్మజ, సైకాలజిస్ట్


Know More

నమస్తే మేడమ్‌.. మా బాబు వయసు 11 సంవత్సరాలు.. వాడు యూట్యూబ్‌లోనే ఎక్కువ సమయం గడుపుతున్నాడు. రోజుకి 5 నుంచి 6 గంటలు యూట్యూబ్‌లో గేమ్స్‌కి సంబంధించిన వీడియోలు, ఫన్నీ వీడియోలు చూస్తుంటాడు. ఆన్‌లైన్ క్లాసులు, ఉపయోగపడేవి చూడమని ఎన్ని సార్లు చెప్పినా అస్సలు వినడు. ఒక్కోసారి చిరాకు వచ్చేంత వరకు ఫోన్‌ చూస్తుంటాడు. ఎంత సున్నితంగా, అర్థమయ్యేలా చెప్పినా యూట్యూబ్‌ చూడడం మాత్రం మానడం లేదు. బయటికి వెళ్లినప్పుడు స్నేహితులతో బాగానే ఆడుకుంటాడు. కానీ, ఇంటికి రాగానే ఫోన్ పని మీదనే ఉంటాడు. దీనివల్ల చదువులో వెనకపడతాడేమో.. వాడిలో సహనం తగ్గిపోతుందేమో అని భయంగా ఉంది. ఏదైనా సలహా ఇవ్వగలరు. - ఓ సోదరి


వాస్తవ ప్రపంచం నుంచి దూరంగా తీసుకెళ్లే ఈ అంతర్జాలాన్ని సాధ్యమైనంత వరకు నియంత్రించడానికే ప్రయత్నించాలి. ఎక్కువ సమయం యూట్యూబ్‌లో గడపడం అనేది నియంత్రించాల్సిన విషయమే. దీనిని ప్రారంభ దశలోనే నియంత్రించలేకపోతే ఒక అలవాటుగా మారే అవకాశం లేకపోలేదు. ఆ తర్వాత బాధపడి కూడా ప్రయోజనం ఉండదు.

మీ అబ్బాయికి ఇతర ఆసక్తికరమైన ఆంశాలు ఏవైనా ఉన్నాయేమో ఆలోచించండి. దానివల్ల అంతర్జాలం నుంచి దృష్టిని మరల్చే అవకాశం ఉంటుంది. అతను స్నేహితులతో బాగానే ఆడుకుంటాడు అని చెప్పారు. కాబట్టి స్నేహితులు, తోబుట్టువులతో ఎక్కువ సేపు ఆడుకునేలా చేయండి. అలాగే అతని ఆలోచనలు సానుకూల మార్గంలోకి మళ్లించే ప్రయత్నం చేయండి. ఈ క్రమంలో మీరు అతనితో అనునయంగా మాట్లాడాలి తప్పితే, కఠినంగా వ్యవహరించకూడదు. అలాగే అతని నుంచి బలవంతంగా ఫోన్‌ లాక్కోవడం, తిట్టడం, కొట్టడం వంటివి చేయకండి. దీనివల్ల అతనిలో మొండితనం పెరిగే అవకాశం ఉంటుంది.
ఏదైనా సరే- ఒకే పనిని ఎక్కువసేపు చేస్తే సమయం వృధా అవుతుంది.. కాబట్టి అతనికి టైమ్‌ మేనేజ్‌మెంట్‌ గురించి తెలియజేయండి. ఉదాహరణకు హోమ్‌ వర్క్‌కి ఇంత సమయం, అంతర్జాలానికి ఇంత సమయం, ఆటలకు ఇంత సమయం, కుటుంబంతో గడపడానికి ఇంత సమయం.. అంటూ కేటాయించండి. అలాగే మీరు కూడాటీవీ, ఫోన్ లతో అధిక సమయం గడపకుండా అతనికి సహకరించండి. ఇలాంటి విషయాల్లో మీరు అతనికి ఒక ఉదాహరణగా నిలబడగలిగితే కొంత మార్పు వచ్చే అవకాశం ఉంటుంది.
అయితే ఒక్క విషయం.. రాత్రికి రాత్రి ఒక్కసారిగా అతనిలో మార్పు రావాలని ఆశించకండి.. క్రమేపీ మార్పు రావడానికి దశలవారీగా ప్రయత్నం చేయండి. అలాగే విషయ పరిజ్ఞానం ఉన్న స్నేహితులతో అతనికి సాన్నిహిత్యం పెరిగే విధంగా చూసుకోండి. అలాంటప్పుడు వాస్తవం నుంచి తప్పించుకోకుండా ధైర్యంగా ఎలా ఉండాలో అతనికి అర్ధమవుతుంది.


Know More

హాయ్‌ మేడమ్‌.. నా వయసు 19 సంవత్సరాలు. చాలామంది ‘నీకు ఏమీ చేత కాదు.. ఒట్టి మొద్దువి..’ అని అంటుంటారు. మా పేరెంట్స్ కూడా నేను ఒక్కసారి కూడా ప్రయత్నించకముందే ‘నీకు ఏమీ చేత కాదు’ అని అంటుంటారు. దాంతో నా మీద నాకే నమ్మకం పోయింది. భయం, నిరాశానిస్పృహలు నన్ను ఆవరించాయి. నాకు స్నేహితులు కూడా తక్కువే. నా బాల్యం, కౌమార దశ అంతా పుస్తకాలతోనే గడిచిపోయింది. ఏదైనా సోషల్ ఈవెంట్లకు వెళ్లాలన్నా, బంధువులతో మాట్లాడాలన్నా నాకు చాలా కష్టంగా ఉంటుంది. నా తోబుట్టువులు కూడా ‘నువ్వు చాలా నెమ్మది’ అని విమర్శిస్తుంటారు. మా తల్లిదండ్రులు నన్ను ఒంటరిగా ఎక్కడికీ పంపించరు. నన్ను కేవలం ఇంటికి, స్కూల్‌కి, కాలేజ్‌కి మాత్రమే పరిమితం చేశారు. దానివల్ల ఇతర వ్యాపకాలు కూడా అలవడలేదు. నేను ‘దేనికీ పనికి రాను’ అన్న భావన కలుగుతోంది. దీన్నుంచి ఎలా బయటపడాలో సలహా ఇవ్వగలరు?


మీ వ్యక్తీకరణలోని స్పష్టత మీ ఆలోచనలకు అద్దం పడుతోంది. అయితే మీరు పనులు నిదానంగా చేస్తారన్న అభిప్రాయం నుంచి ఎవరూ బయటకు రాలేకపోతున్నారు. సాధారణంగా చిన్నతనంలో తల్లిదండ్రులు, బంధువులు పిల్లల గురించి ఫలానా విషయంలో వాళ్ళు ఇలాగే ఉంటారని ముద్ర వేసేసి, పదేపదే దాని గురించే మాట్లాడడం వల్ల అదే నిజమనే భావన అటు పిల్లల్లో, ఇటు పెద్దవాళ్లలో కలుగుతుంటుంది. మీ విషయంలో కూడా అలాగే జరిగుండచ్చు.

parentsscoldinggh650-1.jpg

19 ఏళ్ల యువతిగా ఆలోచనల్లోను, భావాల్లోనూ స్పష్టత కలిగినటువంటి మీరు.. మీపై పడ్డ ముద్ర నుంచి బయటపడడానికి ఏం చేస్తారనేది ముఖ్యం. వ్యాపకాలు అనేవి ఒకరు ఏర్పరచేవి కావు. ఎవరికి వారు సొంతంగా అలవాటు చేసుకోవాలన్న సంగతి తెలిసిందే. అలాగే ఇన్నేళ్ళుగా జరిగినదాని గురించి వదిలేసి ఇప్పటి నుంచి ‘ఎలాగైనా సరే నేను చేయగలుగుతాను’ అన్న ధోరణిలో ఆలోచించి చూడండి.
మీ ప్రతిభను నిరూపించుకోండి!
ఇంతకుముందు చెప్పినట్లు - మీ వ్యక్తీకరణలో స్పష్టత ఉన్నట్లు అనిపిస్తోంది.. అలాగే పుస్తకాలతోనే చాలా కాలం గడిచిపోయిందని చెబుతున్నారు. అంటే అటు భావ వ్యక్తీకరణలోనూ, ఇటు చదవడంలోనూ స్పష్టత ఉంది. అలాంటి సందర్భంలో ఉదాహరణకు రచనా రంగం వైపు వెళ్లి మీ ప్రతిభను నిరూపించుకునే ప్రయత్నం చేయచ్చు. ఇది కేవలం ఒక కోణం నుంచి చూసినప్పుడు మాత్రమే కనిపించే అంశం.

ఒకవేళ మీ బలహీనతలు పక్కన పెట్టి మీలో ఉన్న బలాలను విశ్లేషించుకొనే ప్రయత్నం చేస్తే మరిన్ని ఆలోచనలు వచ్చే అవకాశం ఉంటుంది. మీకు పుస్తక పఠనం ఇష్టం అంటున్నారు కాబట్టి జీవితంలో అద్భుతంగా పైకి వచ్చిన ప్రముఖుల జీవితగాథలను చదివే ప్రయత్నం చేయండి. దానివల్ల వారి జీవితంలో వారిపై పడ్డ ముద్రలను చెరిపేసుకుని, ఉన్నత స్థాయికి ఎదిగిన క్రమాలు స్ఫూర్తిదాయకంగా ఉంటాయి. అలాగే వారి విజయ గాథలు మీ బలహీనతలను అధిగమించడానికి ఉపయోగపడతాయేమో చూడండి.

- డా|| పద్మజ, సైకాలజిస్ట్


Know More

నమస్తే మేడమ్‌.. మా పాప వయసు ఆరు సంవత్సరాలు. తనకి ‘గుడ్‌ టచ్‌’, ‘బ్యాడ్‌ టచ్‌’ గురించి చెప్పాలనుకుంటున్నాను. నా నిర్ణయం సరైనదేనా? అయితే ఏ విధంగా వివరించాలో తెలుపగలరు?


వర్తమాన సమాజ పరిస్థితుల్లో అమ్మాయిలకు ఎటువైపు నుంచి ఎప్పుడు ఏ ముప్పు పొంచి ఉన్నదో తెలియదు. ఇలాంటి పరిస్థితుల్లో చిన్న పిల్లలకు గుడ్‌ టచ్‌, బ్యాడ్‌ టచ్‌ గురించి తెలియజేయడం చాలా అవసరం. అయితే ఇలాంటి సున్నితమైన విషయాలను చాలా జాగ్రత్తగా చెప్పాల్సి ఉంటుంది.
మీరు చెప్పాలనుకున్న విషయాలను చాలా జాగ్రత్తగా డిజైన్‌ చేసుకోవాలి. అంటే వాళ్ల వయసుకు తగినట్టుగా చిన్న చిన్న సంఘటనలు, కథల రూపంలో చెప్పాల్సి ఉంటుంది. అలాగే ఇలాంటి విషయాలు వారికి అర్థమయ్యేట్టుగా చెప్పాలి తప్పితే భయభ్రాంతులకు గురి చేసే విధంగా ఉండకూడదు.

goodtouchbadtouch650-1.jpg

ఏవిధంగా ప్రవర్తించినప్పుడు బ్యాడ్ టచ్‌ కింద భావించవచ్చో స్పష్టంగా చెప్పండి. ఉదాహరణకు అభ్యంతరకర ప్రదేశాల్లో తాకడం, అసహజంగా ప్రవర్తించడం, ఒంటరిగా ఎవరూ లేని చోటుకు తీసుకెళ్లడం, అభ్యంతరకరమైన పనులు చేయడం.. ఇలాంటివన్నీ చిన్న చిన్న కథల రూపంలో వారికి అర్థమయ్యే రీతిలో చెప్పే ప్రయత్నం చేయండి. మీరు చెప్పే విధానం నమ్మదగిన వాళ్లను కూడా నమ్మలేని పరిస్థితికి తీసుకొచ్చేదిగా ఉండకూడదు. మీరు ఏవిధంగా చెప్పినా వారు దానిని అర్థం చేసుకొని పాటించే విధంగా ఉండాలి కానీ భయభ్రాంతులకు గురయ్యేవిధంగా ఉండకుండా చూసుకోండి. చిన్న చిన్న మాటల్లో, పదాల్లో వాళ్లకు అర్థమయ్యే రీతిలో ఉదాహరణలు ఇస్తూ చెప్పే ప్రయత్నం చేయండి.

- డా|| పద్మజ, సైకాలజిస్ట్


Know More

నమస్తే మేడమ్‌.. నా వయసు 24 సంవత్సరాలు. నేను ఎప్పుడూ చురుగ్గా ఉంటాను. ఆటలు ఆడతాను. ఏదైనా కాంపిటీషన్ ఉందంటే చాలు.. దానిలో పాల్గొనాలనే మనస్తత్వం నాది. ఏదైనా మనకు ఉపయోగపడుతుందనేది నా నమ్మకం. కానీ నా స్నేహితులు ఇవన్నీ మనకెందుకని అంటుంటారు. అయినా నేను ఒక్కదాన్నే పోటీల్లో పాల్గొంటాను. అన్నిట్లోనూ ముందుండాలి.. అన్ని విషయాలు తెలుసుకోవాలని అనుకుంటాను. అలాగే ఫ్రెండ్స్ కి కూడా నేను చేయగలిగిన సహాయం చేస్తుంటాను. అయితే నాకు పేరుకి స్నేహితులు ఉన్నారంటే ఉన్నారు కానీ బెస్ట్ ఫ్రెండ్స్ అంటూ ఎవరూ లేరు. ఉన్న ఫ్రెండ్స్ కూడా నన్ను వాళ్ళ అవసరాలకు మాత్రమే వాడుకుంటారు. నాకు బెస్ట్ ఫ్రెండ్స్ లేకపోవడానికి నాలోనే ఏదైనా లోపం ఉందా? లేక నేనే వాళ్ళతో కలవలేకపోతున్నానా? అర్థం కావడం లేదు. వాళ్లతో ఎలా ఉండాలో దయచేసి సలహా ఇవ్వగలరు.


మీ ఆరాటం అర్థమవుతోంది. ఆత్మీయంగా ఉండే స్నేహితులు కావాలని కోరుకోవడం చాలా మంచి ఆలోచన. అయితే చురుకైన వ్యక్తిత్వం, అన్నిట్లోనూ ముందుండాలని అనుకోవడం వంటివి ఎంత బలమైనవో మీ విషయంలో అవే బలహీనతగా మారుతున్నాయేమో ఆలోచించి చూడండి. క్రీడలపై ఆసక్తి ఉన్న మీకు క్రీడాస్ఫూర్తి గురించి ప్రత్యేకంగా చెప్పాల్సిన అవసరం లేదు. క్రీడల్లో ఒక్కోసారి మరొకరికి విజయం వరించినా క్రీడాస్ఫూర్తితో దానిని ఎలా ఆస్వాదించగలుగుతామో.. అదే స్ఫూర్తిని నిజ జీవితంలో కూడా కొనసాగించగలిగితే మీ మనసుకు దగ్గరయ్యే స్నేహితులు మీకు లభిస్తారేమో ఆలోచించండి.

మీరు వాళ్లని ఇష్టపడుతున్నా కానీ మీకున్నటువంటి ముందుకు చొచ్చుకు వెళ్లే ధోరణి, మీరే విజయం సాధించాలన్న ఆరాటం, మీతో మిగతావారు పోల్చుకోవడం, మీతో ఉంటే తాము వెనకపడిపోతాం అన్న భావన, మిమ్మల్ని సంతృప్తిపరచలేమనే సంకోచం.. ఇలా వాళ్లకు పరిపరివిధాలుగా ఆలోచనలు ఉండచ్చు. ఇతరత్రా మరికొన్ని సంశయాలూ ఉండచ్చు. అలాంటప్పుడు ‘చేయి చేయి కలుపుకొని సమానంగా కలిసి వెళ్దాం’ అనే ధోరణి మిమ్మల్ని స్నేహపాత్రుల్ని చేసి మీ ఫ్రెండ్స్ ని మరింత దగ్గర చేస్తుందేమో ఆలోచించి చూడండి.

- డా|| పద్మజ, సైకాలజిస్ట్


Know More

నమస్తే మేడమ్‌.. నేను ఒక అబ్బాయిని ప్రేమిస్తున్నాను. మాది, వాళ్లది ఒకటే కులం. కానీ మా తల్లిదండ్రులు మా పెళ్లికి ఒప్పుకోవడం లేదు. కారణం కూడా చెప్పడం లేదు. అతను జాబ్‌ చేస్తున్నాడు. వాళ్లది మంచి కుటుంబం.. పెళ్లికి కూడా ఒప్పుకున్నారు. కానీ మా తల్లిదండ్రులే ఒప్పుకోవడం లేదు. పెళ్లి ప్రస్తావన తెచ్చినప్పుడల్లా చనిపోతామని బ్లాక్‌మెయిల్‌ చేస్తున్నారు. ఆ అబ్బాయి గురించి ఒక్కసారి ఆలోచించడానికి కూడా ఆసక్తి చూపించడం లేదు. దయచేసి మా తల్లిదండ్రులను ఎలా ఒప్పించాలో సలహా ఇవ్వగలరు. - ఓ సోదరి


మీ తల్లిదండ్రులతో మీరు కేవలం ప్రస్తావన పూర్వకంగానే మాట్లాడారా?లేదా మీ ప్రేమపై మీరు ఎంత దృఢంగా ఉన్నారో వారికి చెప్పి చూశారా? కులం సమస్య కాదు కాబట్టి ప్రత్యేకమైన వ్యతిరేకత ఏమైనా ఉందా? వారు ఒప్పుకోకపోవడానికి అసలు కారణం ఏంటి? ఇతర అభ్యంతరాలు ఏంటి? వంటి విషయాలను శోధించే ప్రయత్నం చేయండి.

ఒకవేళ మీ పెళ్లి విషయంలో మీ తల్లిదండ్రులు తమకున్న అభ్యంతరాలను మీతో చెప్పడానికి సంశయిస్తుంటే మరొకరి సహాయం తీసుకోండి. మీరు, మీ తల్లిదండ్రులు విలువిచ్చే వ్యక్తి లేదా కుటుంబానికి ముఖ్యమైన శ్రేయోభిలాషి ఎవరైనా ఉంటే వాళ్ల ద్వారా కనుగొనవచ్చేమో చూడండి. సాధ్యమైనంత వరకు మీరే ప్రత్యక్షంగా సానుకూల ధోరణితో తెలుసుకునే ప్రయత్నం చేయండి.

మీ తల్లిదండ్రుల అభ్యంతరాలు ఏంటనేవి ప్రత్యక్షంగానో పరోక్షంగానో తెలిసినప్పుడు మీరు, మీరు ప్రేమించిన వ్యక్తి ఇద్దరూ కలిసి వాటికి సమాధానం చెప్పగలుగుతారో లేదో ఆలోచించండి. ఆ తర్వాత వారికున్న సందేహాలను నివృత్తి చేసి, మీ భవిష్యత్తుకు సంబంధించి భరోసాను ఇవ్వగలిగితే వారి మనసు మారుతుందేమో ఆలోచించి చూడండి. కేవలం వాళ్లు వ్యతిరేకిస్తున్నారన్న ఒక్క ఆలోచనతోనే దూరాన్ని పెంచుకోకుండా వాళ్ళు వద్దనడానికి అసలు కారణాలు ఏమై ఉండచ్చు అనేది ముందుగా తెలుసుకునే ప్రయత్నం చేయండి.


Know More

నమస్తే మేడమ్‌.. నాకు సరిత, తనీష్ అనే ఇద్దరు స్నేహితులున్నారు. మేం ముగ్గురం అన్ని విషయాలు పంచుకునేవాళ్లం. నేను, తనీష్‌ ప్రేమించుకున్నాం. కానీ, కొన్ని కారణాల వల్ల పెళ్లి చేసుకోలేదు. ఆ తర్వాత నాకు వేరే అబ్బాయితో పెళ్లి జరిగింది. తనీష్‌కి కూడా కొన్ని రోజులకు పెళ్లైంది. మా పెళ్లిళ్ల తర్వాత కూడా మేము మంచి స్నేహితుల్లాగానే ఉన్నాం. మొదట్లో మా ఇరు కుటుంబాల వాళ్లం తరచూ కలుసుకునేవాళ్లం. ఒకరి ఇంటికి ఒకళ్లు వెళ్లేవాళ్లం.. ఫోన్లో మాట్లాడుకునేవాళ్లం. కొన్ని రోజులు గడిచాక తనీష్‌ భార్యకు మేము గతంలో ప్రేమించుకున్న విషయం తెలిసింది. అప్పటి నుంచి తనీష్‌ని నాతో మాట్లాడొద్దని చెప్పింది. తనీష్‌ ఏం చెప్పినా తను వినడం లేదు. ఒకరోజు తనే ఫోన్‌ చేసి ‘మీ ప్రేమ విషయం నాకు తెలుసు.. నువ్వు, సరిత ఇంకెప్పుడూ నా భర్తకు ఫోన్‌ చేయకండి’ అని తిట్టి పెట్టేసింది. ‘అది గతంలో జరిగిన విషయం. నాకు పెళ్లి కూడా అయింది. ఇంకా సమస్యేంటి?’ అని చెప్పినా ఆమె వినలేదు. తనీష్‌ నాతో మాట్లాడడం మానేశాడు. మంచి స్నేహితుడు దూరమయ్యాడనే బాధ ఉంది. కానీ, అతను సంతోషంగా ఉంటే చాలనుకున్నాను. అయినా ఆమె తనీష్‌ని అనుమానిస్తూనే ఉంది. తనీష్‌ కూడా చాలా బాధపడుతున్నాడు. ఎందుకంటే ఏ విషయమైనా మాతోనే పంచుకునేవాడు. ఇప్పుడు ఒక్కడే అయ్యాడు. నాకు చాలా బాధగా ఉంది. నా వల్ల నా స్నేహితుడు ఇలా బాధపడుతున్నందుకు గిల్టీగా అనిపిస్తోంది. ఏం చేయాలో అర్థం కావడం లేదు. ఎప్పుడూ అదే ఆలోచిస్తున్నాను. నేనే వాళ్ల ఇంటికి వెళ్లి ఆమెతో మాట్లాడవచ్చా? ఎందుకంటే వాళ్ల గొడవలకి నేనే కారణమని అనుకుంటున్నాను. ఫోన్లో మాట్లాడలేను. అలాగని డైరెక్టుగా వెళ్లి మాట్లాడడం వల్ల ఏవైనా సమస్యలు వస్తాయేమో అని భయంగా ఉంది. నేను వెళ్లి మాట్లాడడం వల్ల గొడవలు ఇంకా పెరగొచ్చు. లేదా సమస్య తొలగిపోవచ్చు. దయచేసి ఏం చేయాలో సలహా ఇవ్వగలరు.


ఎవరి జీవితాలంటూ వాళ్లకు ఏర్పడిన తర్వాత ప్రతి ఒక్కరికీ వ్యక్తిగతమైన పరిధి ఉంటుందని మీరు, సరిత అర్థం చేసుకోవాలి. మీ ముగ్గురి మధ్య ఉన్న అనుబంధాన్ని అతని భార్య ఏవిధంగా అర్థం చేసుకుంటుందో ముందు మీకు తెలియదు. అందులోనూ ప్రేమించుకున్నారన్న విషయం తెలిసిన తర్వాత.. తన భర్త మనసులో తనకి కాకుండా మరొకరికి స్థానం ఉందన్న విషయాన్ని ఆమె భరించలేకపోతుండచ్చు. ఇప్పుడున్న పరిస్థితుల్లో మీరు అతనికి సహాయం చేయాలని వారి జీవితంలో కల్పించుకోవడం వల్ల అతనికి మరింత నష్టం చేసినవారవుతారేమో ఆలోచించుకోండి.

doubledatedisputes650-1.jpgదూరంగా ఉండి చూడండి..
ఒక స్నేహితురాలిగా అతను బాధపడుతున్నాడన్న ఆలోచన మీకు ఉండడం సహజం. దానికి కారణం కేవలం స్నేహం కాదు.. గతంలో మీ మధ్య ఉన్నటువంటి ప్రేమ అన్న సంగతి మీకూ తెలుసు. కాబట్టి ఆమె అంత తీవ్రంగా స్పందిస్తున్నప్పుడు కొంతకాలం పాటు వారిద్దరికీ దూరంగా ఉండి చూడండి. దానివల్ల వారి సమస్యను వారే పరిష్కరించుకునేందుకు స్నేహితురాలిగా వారికి సహాయం చేసినవారవుతారేమో ఆలోచించండి.

మొదట్లో మీ ఇరు కుటుంబాల వారు కలిసిమెలిసి ఉన్నారని చెప్పారు. అప్పుడు మీ భర్త మీతో ఉన్నంత చనువుగా, తన భర్త తనతో ఉండట్లేదన్న భావన ఆమెకు ఉండే అవకాశం లేకపోలేదు. అలాగే మీ ఫ్రెండ్ అన్ని విషయాలు మీతో పంచుకుంటాడని రాశారు. బహుశా సమస్య అక్కడే వచ్చిందేమో ఆలోచించండి. పెళ్లైన తర్వాత తన భర్త అన్ని విషయాలను తనతోనే పంచుకోవాలని ఆమె కోరుకునే అవకాశం ఉంటుంది. కాబట్టి మీరు ఆందోళన చెంది అతని జీవితంలోకి ఏవిధంగా చొరబడినా మీరు భయపడుతున్నట్లుగానే మరిన్ని సమస్యలను సృష్టించినవారవుతారేమో ఆలోచించండి.
మీ జీవితంపై దృష్టి పెట్టండి..
ఆ దంపతుల మధ్య మనస్పర్థలు తొలగాలంటే.. వారిద్దరి మధ్య ప్రేమానురాగాలు, సాన్నిహిత్యం పెరగడం అవసరం. అతను తన భార్యనే స్నేహితురాలిగా, ప్రేమికురాలిగా చూసుకోగలిగినప్పుడు.. వాళ్లిద్దరి మధ్య సాన్నిహిత్యం పెరిగినప్పుడు.. ఒకరిపై ఒకరికి నమ్మకం, విశ్వాసం కలిగినప్పుడు గతంలో జరిగిన విషయాన్ని తేలికగా తీసిపారేసే అవకాశం లేకపోలేదు. కాబట్టి మీ మీ వ్యక్తిగత జీవితాలపై దృష్టి పెట్టండి. దానివల్ల అతను కూడా తన భార్య మీద, కుటుంబం మీద దృష్టి పెట్టగలుగుతాడు. ఫలితంగా అనుమానంతో కూడిన ఆలోచనలు తగ్గే అవకాశం లేకపోలేదు. వాళ్లిద్దరి సమస్యల్లో మూడో మనిషిగా మీ చొరవ గానీ, మీ స్నేహితురాలి చొరవ గానీ ఏమైనా ఉంటే అది పరిస్థితిని మరింత ఇబ్బందికరంగా మారుస్తుందేమో సహేతుకంగా ఆలోచించండి.


Know More

హలో మేడమ్‌.. నా వయసు 27 సంవత్సరాలు.. పెళ్లై ఏడాది దాటింది. మాది ప్రేమ వివాహం. ఇంట్లో ఒప్పించి పెళ్లి చేసుకున్నాం. మా అత్తమామలు నన్ను అస్సలు పట్టించుకోరు. మా ఆయనేమో వేరే ఆడవాళ్లతో చాట్‌ చాస్తుంటాడు. అదేంటని అడిగితే చేయి చేసుకున్నాడు. సరేనని సర్దుకుపోయినా తన ధోరణి మార్చుకోవట్లేదు. వాళ్ల ఇంట్లో వాళ్లు ఏం చెబితే అదే చేస్తున్నాడు. నేనన్నా, నా మాటన్నా అస్సలు విలువ చేయడు. దాంతో నేను మా పుట్టింటికి వచ్చేశాను. వచ్చి మూడు నెలలవుతున్నా ఒక్క ఫోన్‌ కూడా చేయలేదు. నేనే తనకు ఫోన్‌ చేస్తే ‘నీ ఇష్టం.. వస్తే రా.. లేకపోతే లేదు’ అంటున్నాడు. ఇప్పుడు ఏం చేయాలో అర్థం కావడం లేదు. సలహా ఇవ్వగలరు. - ఓ సోదరి


మీ పరిస్థితులను మీరే స్వీయ విశ్లేషణ చేసుకోవడానికి ప్రయత్నించండి. అతను నిజంగా తల్లిదండ్రుల మాటకే గౌరవం ఇచ్చే వ్యక్తి అయితే.. తల్లిదండ్రులను ఎదిరించి మిమ్మల్ని పెళ్లి చేసుకొని ఉండేవారు కాదు. అలాగే ‘ప్రేమించి పెళ్లి చేసుకున్నాడు కాబట్టి భార్య మాటకే విలువిస్తాడు.. మమ్మల్ని పట్టించుకోడు’ అనే భావన మీ అత్తమామలకూ ఉండే అవకాశం లేకపోలేదు. కాబట్టి అతని దృష్టిలో వాళ్లకు విలువ తగ్గలేదు అని చూపించే ప్రయత్నం అతిగా చేస్తున్నాడా? అనే విషయం గురించి ఆలోచించండి.

మీ అత్తమామలకు మీపట్ల వ్యతిరేకత పెళ్లికి ముందు నుంచే ఉన్న సంగతి తెలిసిందే. కాబట్టి మిమ్మల్ని వారికి అనువుగా ఉండే కోడలిగా చూపించుకోవడానికి అతిగా వ్యవహరించాడేమో? దానితో విసిగిపోయిన మీరు పుట్టింటికి వెళ్లిపోవడంతో ‘చూశావా మేము చెప్పిందే జరిగింది’ అనే అవకాశం వాళ్లకు దొరికిందేమో? అన్న విషయాలను పరిశీలించుకోండి. ఎవరు ఏం చెప్పినా అది ఊహాగానమే అవుతుంది. కాబట్టి ముఖ్యంగా మీరిద్దరూ మాట్లాడుకోవడం మొదలుపెట్టండి. మూడో వ్యక్తి ప్రమేయం లేకుండా మీ మనసుల్లో ఏముంది? మీ ఆలోచనలు ఏంటి? అనేవి స్పష్టం చేసుకోండి. దీనివల్ల సమస్య ఎక్కడుందో మీకు అర్థమవుతుంది. చిన్న చిన్న కారణాలను పెద్దవి చేసుకోవడం వల్ల మీ ప్రేమను మీరే పలుచన చేసుకున్న వారవుతారేమో అన్న విషయాన్ని కూడా ఆలోచించండి.

మీ భర్త ఇతర స్త్రీలతో చాటింగ్‌ చేస్తున్నాడని అంటున్నారు. అయితే అతను పరిధులకు లోబడే చేస్తున్నాడా? లేదంటే పరిధి దాటుతున్నాడా? అనేది ముందుగా నిర్ధారించుకోండి. ఒకవేళ అతను తన పరిధి దాటినట్లయితే ఆలస్యం చేయకుండా మానసిక నిపుణులను సంప్రదించడం అవసరం. అలాకాకుండా అబ్బాయిలతో ఎలా మాట్లాడుతున్నాడో అమ్మాయిలతో కూడా అలానే మాట్లాడుతున్నట్లయితే.. ఆ విషయాన్ని మీరు భూతద్దంలో చూస్తున్నారా? అన్నది పరిశీలించుకోండి. ఏదేమైనా ఇద్దరూ కలిసి సానుకూల ధోరణితో మాట్లాడుకొని సమస్యను పరిష్కరించుకునే ప్రయత్నం చేయండి.


Know More

హాయ్‌ మేడమ్‌.. నా వయసు 26. మా బంధువులబ్బాయి నన్ను ప్రేమిస్తున్నానని విసిగించేవాడు. అతని ప్రేమను నేను చాలాసార్లు తిరస్కరించాను. దాంతో అతను సూసైడ్‌ చేసుకున్నాడు. ‘నా చావుకి కారణం ప్రేమ విఫలమవడమే’ అని సూసైడ్‌ నోట్‌ కూడా రాశాడు. ఇప్పుడు మా బంధువులందరూ నా గురించి చెడుగా ప్రచారం చేస్తున్నారు. నేను పెళ్లి చేసుకోవాలనుకున్న సమయంలోనే ఇలా జరిగింది. నాకు ఏం చేయాలో అర్థం కావడం లేదు. ప్రస్తుతం నేను ఉద్యోగం చేస్తున్నాను. నాన్న చిన్నప్పుడే చనిపోయారు. అమ్మ, నేను ఇద్దరమే ఉంటున్నాం.. దయచేసి సలహా ఇవ్వగలరు. - ఓ సోదరి


మీకు అతని పట్ల ఏ విధమైన ఆసక్తి లేనప్పుడు.. కేవలం మీరంటే అతనికి ఇష్టమున్నంత మాత్రాన మీరు ఒప్పుకోవాల్సిన అవసరం లేదన్న వాస్తవం అందరికీ తెలిసిందే.. ప్రేమ అనేది రెండు వైపుల నుంచి ఉండాలి.. కానీ బెదిరింపులతోనో, ఆత్మహత్యలతోనో సాధించగలిగేది కాదు. ఒక వ్యక్తి మరొక వ్యక్తిని ప్రేమించినప్పుడు ఆ వ్యక్తి ఆమోద తిరస్కారాలకు కూడా విలువ ఉంటుంది. అలా కాకుండా కేవలం ఒక వ్యక్తి కోరుకున్నంత మాత్రాన అవతలి వ్యక్తికి ఏమాత్రం ఆసక్తి లేనప్పుడు అది జరిగే విషయం కాదు.

మిమ్మల్ని ఇంకొకరు వేలెత్తి చూపుతారని, మీకిష్టం లేని పని మీరు చేయలేరు కదా! పరిస్థితి ఇంత దూరం వస్తుందని మీరు కూడా అనుకోకపోవచ్చు. మీరు తీసుకునే నిర్ణయం మీ వ్యక్తిగతమైనది. దానికి అతను ప్రభావితమవడం అనేది అతని ఆలోచనా ధోరణిని బట్టి ఉంటుంది. అతని మీద, అతని కుటుంబం మీద మీకు సానుకూల ధోరణి ఉండచ్చు. కానీ అదే సమయంలో నిందను మీపై వేసుకుంటే.. మీ మనసు నిరాశాపూరిత ధోరణిపైపు వెళుతుందనేది గుర్తు పెట్టుకోండి. కాబట్టి మిమ్మల్ని మీరు దృఢపరచుకునే ప్రయత్నం చేయండి. మీ భవిష్యత్తుని తీర్చిదిద్దుకునే మార్గాలను అన్వేషించుకోండి. అలాగే మీ మీద ఆధారపడ్డ మీ అమ్మగారిని కూడా మీరు జాగ్రత్తగా చూసుకోవడం ముఖ్యం. అందుకోసం ముందుగా మీరు మానసికంగా దృఢంగా తయారుకావాలి. మీ మనసు కుదుటపడ్డ తర్వాత పెళ్లి గురించి ఆలోచించండి. అవసరమైతే మానసిక నిపుణుల సహాయం తీసుకోండి.
- డా|| పద్మజ, సైకాలజిస్ట్


Know More

హాయ్‌ మేడమ్‌.. నేను ఒక అబ్బాయిని 5 సంవత్సరాల నుంచి ప్రేమిస్తున్నాను. ఒకరంటే ఒకరికి చాలా ఇష్టం. కానీ వాళ్లది నిరుపేద కుటుంబం. వాళ్ల అమ్మ నన్ను చాలా ప్రేమగా, కూతురులాగా చూసుకుంటారు. కానీ మా ఇంట్లో వాళ్లు వేరే వాళ్లతో పెళ్లి చేయాలని చూస్తున్నారు. నాకు అతన్ని వదులుకోవాలని లేదు. అతను లేకుండా నేనుండలేను. మా ఇంట్లో వాళ్లు మా ప్రేమను వ్యతిరేకిస్తున్నారు. దానివల్ల ప్రతిరోజూ నేను బాధపడుతున్నాను. ఒక్కోసారి ఆత్మహత్య చేసుకోవాలని అనిపిస్తుంటుంది. మా అమ్మ అంటే నాకు చాలా ఇష్టం. నాన్న డ్రింకర్‌. మా ప్రేమ విషయాన్ని అమ్మకి చెబితే ఒప్పుకోలేదు. వాళ్లకు ఆస్తులు లేవని, కులం వేరని వద్దంటోంది. అతను కూడా నన్ను వదిలి ఉండలేడు మేడమ్‌.. ఈ టెన్షన్‌ వల్ల నేను పిచ్చిదాన్నవుతున్నా.. దయచేసి సలహా ఇవ్వగలరు. - ఓ సోదరి


మీ ఇద్దరి మధ్య కులం సంగతి అటుంచితే.. ఆస్తి, అంతస్తుల్లో వ్యత్యాసాలు ఉన్నాయని స్పష్టంగా అర్థమవుతోంది. తన భర్తతో కష్టపడుతూ కూడా మీ పెళ్లి విషయంలో మీ అమ్మ ఇంత దృఢంగా వద్దు అని చెప్పడానికి కారణాలేంటో ఆమె వైపు నుంచి కూడా ఓసారి ఆలోచించి చూడండి. అలా ఆలోచించడం వల్ల ఆమె వైపు ఉన్న భయాలు కానీ, అనుమానాలు కానీ మీకు స్పష్టమవుతాయి. అలాంటి సందర్భంలో మీరు జీవితాంతం ఒకరికొకరు అండగా ఉంటారన్న భరోసా.. అతను కలకాలం మిమ్మల్ని బాగా చూసుకుంటాడన్న నమ్మకాన్ని మీ అమ్మగారికి ఇవ్వగలరా? అన్న విషయాన్ని ఆలోచించండి. ఒకవేళ అలాంటి నమ్మకాన్ని మీ అమ్మగారికి ఇవ్వగలిగితే ఆమె ఆలోచనల్లో మార్పు వస్తుందేమో చూడండి.

teenagegirlwithmother650-1.jpg

ఇక అబ్బాయి వైపు వారి నుంచి సంపూర్ణ మద్దతు ఉండడం అనేది సంతోషకరమైన విషయమే. అయితే మీరు మీకంటే ఆర్థికంగా తక్కువ స్థాయి ఉన్న ఇంటికి వెళ్లి ప్రస్తుత జీవితాన్ని, గత జీవితాన్ని, రాబోయే జీవితాన్ని ఎప్పటికప్పుడు పోల్చుకోకుండా ఉండగలరా? అలాగే వాళ్లు ఎంత ప్రేమ చూపించినా మీరు అలవాటు పడ్డ వసతులు లేవని, మీరు కోరుకునే జీవితం ఇది కాదని మీకు అనిపించకుండా ఉంటుందా? అన్న విషయాన్ని కూడా ఆలోచించండి.

అలాగే ఆత్మహత్య ఆలోచనలు వచ్చాయని చెబుతున్నారు. అలాంటి ఆలోచనలు పునరావృతం అవుతుంటే వెంటనే మానసిక నిపుణులను కలవడం మంచిది. మీరు ఇటు అమ్మ పైన, అటు అతని పైన ప్రేమ ఉందంటున్నారు. ఇద్దరినీ అంత ప్రేమించే మీరు వాళ్ల మనసులను బాధ పెట్టే ఆలోచనలు చేయడం ఎంతవరకు సహేతుకమో ఆలోచించండి. ప్రేమ ఉన్న చోట నిరాశాపూరిత ఆలోచనా ధోరణి కన్నా, సానుకూలమైన ఆలోచనా ధోరణి ఎంతో అవసరం. మీరిద్దరూ కలిసి సానుకూల దృక్పథంతో మీ అమ్మకు నచ్చజెప్పి మీ పరిస్థితిని మీకు అనువుగా మార్చుకోవడానికి ప్రయత్నించండి.
- డా|| పద్మజ, సైకాలజిస్ట్


Know More

నమస్తే మేడమ్‌.. నాకు 2014లో పెళ్లైయింది. పెళ్లైన దగ్గర్నుంచి మేము శారీరకంగా కలవలేదు. మా ఆయనకు ఆరోగ్య సమస్యలున్నాయి. ప్రతి సంవత్సరం ఏదో ఒక సమస్యతో హాస్పిటల్‌కి వెళ్తుంటారు. కిడ్నీల్లో రాళ్లు ఉండడం వల్ల ఇప్పటి వరకు మూడు సార్లు సర్జరీ అయ్యింది. మా అత్తగారికి మా విషయం గురించి అంతా తెలుసు. కానీ మా తల్లిదండ్రులకు తెలియదు. ఈ విషయాన్ని నేను వారికి చెప్పలేకపోతున్నాను. ఎందుకంటే.. మా తల్లిదండ్రులకు మేము మగ్గురం అమ్మాయిలమే. అందరికీ పెళ్లిళ్లు అయ్యాయి. పెళ్లైన తర్వాత మా పెద్దక్క రోడ్డు ప్రమాదంలో చనిపోయింది. రెండో అక్క భర్త డ్రింకర్‌, స్మోకర్‌.. దాంతో ఆమె విడాకులకు అప్లై చేసింది. ఈ రెండు సంఘటనలతో మా తల్లిదండ్రులు ఎంతో కుంగిపోయారు. అంతేకాదు.. పెద్దక్క పాపని, రెండో అక్కని మా తల్లిదండ్రులే చూసుకుంటున్నారు.. దాంతో వారిని సంతోషంగా ఉంచడం కోసం నా విషయాన్ని వారికి చెప్పలేదు. అయితే ప్రతీ నిమిషం మా తల్లిదండ్రులకు చెప్పలేకపోతున్నాననే బాధ నన్ను వేధిస్తోంది. నా భర్త నాతో కాపురం చేస్తాడన్న నమ్మకం కూడా నాకు లేదు. ఈ సమస్యలన్నింటినీ నేను తట్టుకోలేకపోతున్నాను.. నాకు ఏం చేయాలో అర్థం కావడం లేదు. దయచేసి నా సమస్యను అర్థం చేసుకొని సలహా ఇవ్వగలరు. - ఓ సోదరి


మీ వారి అనారోగ్యం కారణంగా మీ ఇద్దరి మధ్య శారీరక సంబంధం ఏర్పడలేదని చెబుతున్నారు. దీనికోసం సర్జరీలు కూడా జరిగాయని అంటున్నారు. ప్రస్తుతం ఆయన ఆరోగ్య పరిస్థితి ఎలా ఉంది? అలాగే మీ ఇద్దరి మధ్య శారీరక అనుబంధం ఏర్పడడానికి అతని ఆరోగ్యం సహకరిస్తుందా? లేదా? అన్న విషయం గురించి డాక్టర్లను సంప్రదించారా? మీ తల్లిదండ్రులకు మీరు చెప్పకపోవడానికి కొన్ని కారణాలు ఉన్నాయన్నారు. ఇలాంటి పరిస్థితుల్లో మీ అత్తగారితో మీ అనుబంధం ఎలా ఉంది?ఆవిడ, మీరూ కలిసి డాక్టరుని సంప్రదించారా? మీకూ, మీ వారికీ మధ్య శారీరక బంధంలో సమస్యలున్నా.. మానసికంగా మీ ఇద్దరి మధ్య అనుబంధం ఎలా ఉంది? వంటి విషయాలను పరిశీలించండి.

husbanddieddepression650.jpg

ఇక ఉత్తరం చివర్లో మీ వారు మీతో కాపురం చేస్తారా, లేదా అన్న అనుమానం వ్యక్తం చేశారు. దానికి కేవలం మీ ఇద్దరి మధ్య శారీరక బంధం పరంగా ఉన్న సమస్యలే కారణమా లేక మానసికంగా కూడా సమస్యలు ఉన్నాయా? ఇన్నేళ్ల మీ సహచర్యంలో ఒకరిపట్ల ఒకరికి అంతో ఇంతో చనువు ఏర్పడి ఉండాలి. ఒకవేళ అలా ఏర్పడి ఉండకపోతే స్నేహపూర్వక ధోరణితో మాట్లాడండి. అతనితో కొంచెం అనుబంధం గట్టిపడిన తర్వాత ఇద్దరూ కలిసి మాట్లాడుకొని డాక్టర్‌ని సంప్రదించడం అవసరం.
చూచాయగా చెప్పండి..
ఇక మీరు మీ విషయాన్ని మీ తల్లిదండ్రులకి చెప్పకపోవడానికి సహేతుకమైన కారణాలు ఉండచ్చు. కానీ వాళ్లకు అసలు చెప్పకపోవడం వల్ల ఈ విషయం వారికి బాధ కలిగిస్తుందేమో ఆలోచించండి. అందులోనూ మీ బంధం ఎంతవరకూ కొనసాగుతుందో తెలియదు అన్నట్టు రాశారు. దానివల్ల మీ సంసారంలో ఏవైనా సమస్యలు వస్తే అది మీ తల్లిదండ్రులకి మరింత ఆందోళన కలిగించే అవకాశం ఉంటుంది. కాబట్టి మొదట చూచాయగా, సున్నితంగా చెప్పే ప్రయత్నం చేయండి. వాళ్లు అర్థం చేసుకుంటారన్న నమ్మకం వచ్చిన తర్వాత విషయాన్ని స్పష్టం చేయండి.
మీ కాళ్ల మీద మీరు నిలబడే ప్రయత్నం చేయండి..
మీ తల్లిదండ్రులు ఒక అక్కని, ఒక అక్క పాపని చూసుకుంటున్నారు కాబట్టి.. వాళ్లకు మీరు మరో భారం అవుతారన్న భయం మీకుంటే స్వయం సమృద్ధి దిశగా అడుగులు వేయండి. మీరు ఒకవేళ చదువుకుని ఉంటే ఉన్నత విద్యని అభ్యసించడం.. అలాగే మీ కాళ్ల మీద మీరు నిలబడే ప్రయత్నం చేయండి. అది మీ ఆత్మవిశ్వాసాన్ని పెంచడమే కాకుండా.. ప్రపంచంతో కొత్త పరిచయాన్ని పెంచుతుంది. దానివల్ల అనుభవంతో కూడిన నిర్ణయాలు తీసుకోగలుగుతారు. ఎలాంటి పరిస్థితిలో ఉన్నా మీరు ఒకరికి భారం కాననే ధైర్యాన్ని కూడదీసుకునే ప్రయత్నం చేయండి. అలాగే మీ ఇద్దరి మధ్య మానసికమైన, శారీరకమైన అనుబంధం దృఢపడడానికి కౌన్సెలింగ్‌ అవసరమేమో ఆలోచించి చూడండి.

- డా|| పద్మజ, సైకాలజిస్ట్


Know More

హాయ్‌ మేడమ్‌.. నాకు ఏడు నెలల బాబు ఉన్నాడు. డెలివరీ ముందు వరకు నేను ఒక MNC లో జాబ్‌ చేసేదాన్ని. డెలివరీ అయ్యాక నేను వాడిని ఎలా పెంచుతానోనని భయాలు నాలో మొదలయ్యాయి. దానికి తోడు ఆఫీసులో పని ఒత్తిడిని తట్టుకోలేక, బాబు పుట్టాక మానేశాను. ఇదిలా ఉంటే- ఇంట్లో వాళ్లు, అయిన వాళ్లు, బంధువులు అని తేడా లేకుండా అందరూ ఇచ్చే ఉచిత సలహాలు నన్ను ఇబ్బంది పెడుతున్నాయి. బాబుని ఏమైనా అన్నా, కామెంట్లు చేసినా తట్టుకోలేకపోతున్నా. చాలా కోపం వస్తుంది. ఒక్కదాన్నే ఉన్నప్పుడు గతంలో జరిగిన చెడు సంఘటనల గురించి ఆలోచిస్తున్నా. వీటికి తోడు ‘మా అప్పుడు మేము ఒక్కరమే చూసుకున్నాం’, ‘చాలామంది వర్క్‌, పర్సనల్‌ లైఫ్‌ రెండూ బ్యాలన్స్‌ చేసుకుంటారు.. నువ్వు జాబ్‌ మానేశావేంటి’ అంటూ కొంతమంది చేసే చెత్త కామెంట్లు భరించలేకపోతున్నా. వీటి నుంచి తేరుకునే మార్గం చెప్పండి.. కృతజ్ఞతలు - ఓ సోదరి


మీ సమస్యని పరిష్కరించుకోవడానికి మీరు రెండు కోణాల్లో నుంచి ఆలోచించాలి. ఒకటి మీకెదురవుతున్నటువంటి సలహాలు, సూచనలు, వ్యాఖ్యానాలను వడపోయడం.. రెండోది- డెలివరీ తర్వాత మీకు కలుగుతున్న భయాలు, చెడు సంఘటనల తాలూకు ఆలోచనల గురించి మానసిక నిపుణుల సహాయం తీసుకోవడం.. ఇలా రెండు కోణాల నుంచి ఆలోచించండి.

కొంతమందికి డెలివరీ తర్వాత వచ్చేటువంటి శారీరక మార్పులు, కొన్ని చర్యలు వాళ్ల ప్రవర్తన మీద ప్రభావం చూపిస్తాయి. దీనికి సంబంధించి గైనకాలజిస్టుని సంప్రదించండి. వారి సలహా ప్రకారం మానసిక నిపుణుల సహాయం తీసుకోవాల్సిన అవసరం ఉందేమో పరిశీలించండి.

fearbyannying650-2.jpg

డాక్టర్‌ సలహాలు మాత్రమే తీసుకోండి...
ఇక ఇతరులు మీ పట్ల చేసే వ్యాఖ్యానాలు, సలహాలు మీ మనసుకి గుచ్చుకుంటున్నాయి. అలాగే మిమ్మల్ని వ్యక్తిగతంగా ఇబ్బంది పెడుతున్నాయి. అవి మీ ఆత్మవిశ్వాసాన్ని, మీ బిడ్డ విషయంలో మీరు తీసుకోవాలనుకుంటున్న జాగ్రత్తలను ప్రశ్నించే స్థితికి తీసుకెళ్తున్నాయి.

బాబుకి ఫీడింగ్‌ ఏవిధంగా చేయాలి? ఎలాంటి ఆహారం పెట్టాలి? ఎలాంటి జాగ్రత్తలు తీసుకోవాలి? వ్యాక్సిన్లు ఏమేమి వేయించాలి? ఇలాంటివన్నీ అందరికంటే మీ డాక్టర్ మాత్రమే సరైన సలహా ఇవ్వగలరు. కాబట్టి బిడ్డ ఆరోగ్యం విషయంలో డాక్టర్‌ సలహా ప్రకారమే ఏమేమి చేయాలనేది నిర్ణయించుకోండి. అలాగే బాబు పెంపకం విషయంలో ఏం చేయాలనేది మీరు, మీ భర్త మాత్రమే నిర్ణయించుకోవాలి.

fearbyannying650-1.jpg

స్పష్టమైన అవగాహనకు రండి..
అలాగే మీరు తాత్కాలికంగా ఉద్యోగం మానేసినంత మాత్రాన మీకసలు ఉద్యోగం రాకుండా ఉంటుందా? అనే విషయంలో మీ భార్యాభర్తలిద్దరూ ఒక స్పష్టమైన అవగాహనకు రండి. దీనివల్ల ఎవరు ఏం మాట్లాడినా అది మీ ఆలోచనాధోరణికి భిన్నమైంది కాబట్టి దానికి ఎంత ప్రాధాన్యం ఇవ్వాలనేది మీరే నిర్ణయించుకోగలుగుతారు. మీరు ఉద్యోగం మానేసినంత మాత్రాన మీ విలువ తగ్గిపోతుందా? మీ సమర్థతలో మార్పు వస్తుందా?అనేది మీకు మీరుగా విశ్లేషించుకోండి. దానివల్ల అవతలి వాళ్లంటున్న మాటల్లో ఎంతవరకు నిజముందనేది మీకే తెలుస్తుంది. కాబట్టి ఎవరో అన్న మాటల వల్ల మన ఆత్మవిశ్వాసాన్ని దెబ్బతీసుకోవడం ఎంతవరకు సహేతుకమో ఆలోచించి చూడండి. మీ పూర్తి సమయాన్ని బాబుకి కేటాయించదలుచుకున్నారు. అలాంటప్పుడు మీ నిర్ణయాన్ని పదే పదే వెనక్కి తిరిగి చూసుకోవాల్సిన అవసరం లేదనేది అర్థం చేసుకోండి.
మీ ఆత్మవిశ్వాసం దృఢంగా ఉండి, మీ నిర్ణయాల పట్ల స్పష్టత ఉన్నప్పుడు.. మీ బాబుకి సమయం కేటాయించడమనేదే మీ నిర్ణయమైనప్పుడు.. ఆ నిర్ణయం విషయంలో ఎవరూ ఏం మాట్లాడినా అది మిమ్మల్ని ఎంతమాత్రం ప్రభావితం చేయదనే విషయాన్ని కూడా అర్ధం చేసుకోండి. మీ దంపతులిద్దరూ స్పష్టమైన అవగాహనతో బాబు పెంపకం పైన దృష్టి నిలపండి.

- డా|| పద్మజ, సైకాలజిస్ట్


Know More

మేడం.. ప్రస్తుతం నేను 11నెలల వయసున్న బిడ్డకు తల్లిని. మా పాప చాలా హైపర్ యాక్టివ్‌గా ఉంటుంది. ఎప్పుడూ నాతో ఆడుతూనే ఉంటుంది. ఉదాహరణకు పాప ఒక 40ని|| నిద్రపోతే 4గం||పాటు నాతో ఆడుకునేందుకే మొగ్గుచూపుతుంది. రాత్రిళ్లు కూడా అర్ధరాత్రి 2 లేదా 3గం|| వరకు మాత్రమే పడుకుంటుంది. పాప పడుకున్న సమయంలో ఏ చిన్న శబ్దం వచ్చినా వెంటనే నిద్ర లేస్తుంది. మళ్లీ నిద్రపోకుండా ఆడుతూనే ఉంటుంది. పాప కారణంగా నా భర్త లైంగికంగా నాతో సంతోషం ఉండట్లేదని ఆవేదన వ్యక్తం చేస్తున్నారు. కానీ నా కూతురు నన్ను ఒక్క క్షణం కూడా విడిచిపెట్టడం లేదు. ఈ పరిస్థితుల్లో నా భర్తను సంతోషపెట్టడం ఎలాగో నాకు తెలియడం లేదు. ఏమైనా సలహా ఇవ్వగలరు. - ఓ సోదరి


పాప ఆరోగ్యంగా, ఆనందంగా ఆడుకుంటూ ఉండడం అనేది ఆరోగ్యకరమైన లక్షణమే. అయితే తను సరిగ్గా నిద్రపోకపోవడానికి గల కారణాలేంటో విశ్లేషించడానికి ప్రయత్నించండి. అంత చిన్న వయసులో అంత తక్కువ నిద్ర ఎలా సరిపోతోంది? ఇందుకు గల కారణాలేంటి? తన చుట్టూ ఉన్న వాతావరణం ఎలా ఉంటుంది? ఎక్కువగా వెలుతురు ఉండడం, తరచూ శబ్దాలు రావడం, కడుపు నొప్పి, ఉబ్బరంగా అనిపించడం.. పాప నిద్రపోయేందుకు అనుకూలమైన వాతావరణం లేకపోవడం.. ఇలాంటి కారణాలేమైనా ఉన్నాయేమో ఓసారి పరిశీలించండి. అలాగే కారణాలు ఏవైనా.. పాపకు తగిన నిద్ర ఉండట్లేదు కాబట్టి ముందుగా చిన్న పిల్లల వైద్య నిపుణులను సంప్రదించడం మంచిది.

మీరు చెప్పిన దాని ప్రకారం మీ చిన్నారి ఎక్కువగా మీతో ఆడుకునేందుకే మొగ్గుచూపుతోందంటున్నారు. పాప అలా నిరంతరం మీ శ్రద్ధ కోరుకోవడానికి మీ ప్రవర్తనపరంగా కూడా కారణాలు ఏమైనా ఉన్నాయేమో ఒకసారి విశ్లేషించుకోండి. అంటే పాప ఏడవగానే ఎత్తుకోవడం, మీ ప్రేమ కొద్దీ అతిగా ముద్దుచేస్తుండడం, తనంతట తాను ఆడుకుంటున్నా సరే.. ఆ చుట్టుపక్కలే మీరూ ఉండడం.. ఇలాంటివన్నీ తనని ప్రభావితం చేస్తున్నాయేమో ఆలోచించండి. అలాగే మీ పాప బాధ్యతలను భర్తతో కలిసి పంచుకోవడం, సాయంత్రం వేళల్లో వీలైనంత త్వరగా పాప కడుపు నింపి నిద్రపుచ్చడం, మిగతా సమయాల్లో నిద్ర వేళలు కాస్త తగ్గించి రాత్రి వేళల్లో ఎక్కువ సమయం నిద్రపోయేలా చూడడం.. ఇలాంటి ప్రయత్నాలు చేసి చూడండి. చిన్న పిల్లల వైద్యనిపుణులను సంప్రదిస్తే ఇలాంటి చిట్కాలు చాలా సూచిస్తారు. వాటిని అనుసరించడం ద్వారా మీ పరిస్థితుల్లో కాస్త మార్పు రావచ్చు.

ఇక మీ ఆలుమగల విషయానికొస్తే ఇద్దరి మధ్యా చక్కని అవగాహన ఉండేందుకు ఇద్దరూ కలిసి పాప బాధ్యతలు పంచుకోవడానికి ప్రయత్నించండి. ఇలా ఇద్దరూ కలిసి పాపతో సమయం గడపడం ద్వారా ఒత్తిడి తగ్గించుకోవడమే కాకుండా పాప నిద్రపోయిన తర్వాత ఒకరికొకరు సమయం కేటాయించుకునే వీలు ఉంటుంది. కాబట్టి మీరిద్దరూ అవకాశం ఉన్నంతలో పాప బాధ్యత పంచుకుంటూ, చక్కటి అవగాహనతో మీ బంధాన్ని మరింత బలపరుచుకోవచ్చు. ఇలా చేయడం వల్ల పాప దృష్టి కేవలం మీపైనే కాకుండా మీ భర్తపై కూడా ఉంటుంది. ఫలితంగా మీకు లభించే ఆ కాస్త విరామ సమయంలో పనులు చేసుకోవడం, విశ్రాంతి తీసుకోవడం.. వంటివి చేయచ్చు. నిపుణుల సహాయంతో పాప ఆహారం, ఆరోగ్యం, నిద్ర.. వంటి విషయాల్లో తగిన జాగ్రత్తలు పాటిస్తే మీ సమస్యకు సులభంగా పరిష్కారం లభిస్తుంది.
- డా|| పద్మజ, సైకాలజిస్ట్


Know More

మేడమ్‌.. నేను ఇంజినీరింగ్‌ పూర్తి చేశాను. జాబ్ కోసం ట్రై చేస్తున్నా... నేను ఒక అబ్బాయిని ఇష్టపడ్డాను. నా స్నేహితులు వద్దన్నా వినకుండా అతన్ని నమ్మాను. అతనితో ట్రావెల్ చేసిన తర్వాత నాకు అతను మంచివాడు కాదని తెలిసింది. దాంతో నేను అతనిని వదిలేద్దాం అనుకున్నా.. కానీ అతను మా ఇంట్లో చెప్తాను అని బెదిరిస్తున్నాడు. ఈ విషయం మా ఇంట్లో తెలిస్తే నన్ను బతకనివ్వరు. మా తల్లిదండ్రులకు నేను ఒక్కదాన్నే సంతానం. నన్ను కష్టపడి చదివించారు. ఈ విషయం తెలిస్తే తట్టుకోలేరు. చనిపోదామని కూడా ప్రయత్నించా. ఈ విషయాలన్నీ అతనికి తెలుసు. మా ఇంట్లో వాళ్లకు తెలియకుండా ఈ సమస్యను ఎలా పరిష్కరించుకోవాలి. సలహా ఇవ్వగలరు. - ఓ సోదరి


మీ జీవితంలో మీకు ఒక ప్రేమ వ్యవహారం ఉందని తెలిస్తే తల్లిదండ్రులు తట్టుకోలేరన్న బాధ, అవగాహన ఉన్నవారు.. మీరు చనిపోతే వాళ్లు ఎలా తట్టుకోగలరని అనుకుంటున్నారో తర్కంగా ఆలోచించి చూడండి. మీరు ఒక్కరే బిడ్డ.. వాళ్లు కష్టపడి మిమ్మల్ని చదివించారు. అతను మంచివాడు అనుకొని అతనిని నమ్మి మీరు కొంతకాలం ప్రేమించారు. ఎప్పుడైతే మీ ఆలోచనలకు అతను అనుగుణంగా లేడని, అతని ప్రవర్తన గురించి వేరే విధమైన అవగాహన వచ్చిందో మీరు వద్దనుకుంటున్నారు. అలాగే ఈ విషయం ఇంట్లో తెలిస్తే తల్లిదండ్రులు తట్టుకోలేరని అంటున్నారు. అయితే ఇంట్లో తెలిసినంత మాత్రాన మొట్టమొదట వారు బాధపడ్డా, ఎప్పటికీ మిమ్మల్ని రక్షించేది, మిమ్మల్ని అక్కున చేర్చుకొని తోడుగా నిలబడేది మీ తల్లిదండ్రులే అనే విషయాన్ని అర్ధం చేసుకోండి.

boyblackmailinggirlgh650.jpg
విపులంగా చెప్పండి...
ఈ విషయాన్ని నిదానంగా, విపులంగా అర్థం చేసుకునే రీతిలో మీ తల్లిదండ్రులకు చెప్పండి. ‘మీ ఇంట్లో చెప్తాను’ అన్న అతని బెదిరింపుల గురించి కూడా చెప్పండి. అవసరమైతే మీకు అండగా నిలబడగలిగిన వ్యక్తులు లేదా రక్షణ వ్యవస్థల సహాయం తీసుకోండి. అలాగే అతని బెదిరింపులకు లొంగిపోయి చిరకాలం మీ జీవితాన్ని మీకిష్టంలేని పంథాలో నడుపుకోవడం సాధ్యమేనా అన్న విషయాన్ని కూడా ఆలోచించండి. అతని బెదిరింపులకు భయపడి మీ ఇంట్లో వాళ్లకు చెప్పకుండా సమస్యను పరిష్కరించుకోవడం, చనిపోదామనుకున్న నిర్ణయానికి రావడం... రెండూ ఏమాత్రం తర్కబద్ధంగా ఉన్నాయనేది ఓసారి మీకు మీరే నిదానంగా ఆలోచించండి.
ఇలా బలహీనుడిని చేయండి...
ముఖ్యంగా ఈ విషయాన్ని తల్లిదండ్రులకు చెప్పడం ద్వారా వస్తాయనుకునే నష్టాల కంటే వాళ్లకు తెలియకపోవడం వల్ల కలిగే నష్టాలు, కష్టాలు ఎక్కువ అనే విషయాన్ని అర్థం చేసుకోండి. అలాగే అతను ఈ విషయం మీ తల్లిదండ్రులకు చెప్తానని మిమ్మల్ని బెదిరిస్తున్నాడని చెప్తున్నారు. కాబట్టి ఆ విషయాన్ని మీ అంతట మీరే మీ తల్లిదండ్రులకు చెప్పడం ద్వారా అతను బలహీనుడవుతాడు. అలాగే అతనంటే మీకు ఇష్టం లేదన్న విషయాన్ని, మీ వాళ్ల సహకారం మీకుందనేది అతనికి స్పష్టం చేయండి.
- డా|| పద్మజ, సైకాలజిస్ట్


Know More