దద్దుర్లు అంటే అది చెమట పొక్కా.. ఏదైనా క్రీమ్‌ వాడడం వల్ల వచ్చిందా.. చేతులు-ముఖంపై దద్దుర్లు వచ్చాయా.. లేదంటే శరీరమంతా ఈ సమస్య ఉందా.. ఏదైనా మెడిసిన్‌ వాడడం వల్ల శరీరంపై వచ్చిన రియాక్షనా? ఇలా మీ అసలు సమస్య ఏది అనేది మీరు కరక్ట్‌గా చెప్పలేదు. ఒకవేళ ముఖంపై వచ్చిన దద్దుర్లు అయితే ఆ ప్రదేశంలో ఐస్‌క్యూబ్‌తో రుద్దుకుంటే సరిపోతుంది. రోజూ పదిహేను నుంచి ఇరవై నిమిషాల పాటు దద్దుర్లు వచ్చిన చోట ఐస్‌క్యూబ్‌తో మసాజ్‌ చేసుకుంటే కొన్ని రోజులకు ర్యాష్‌ పోతుంది.

అలాగే ముఖం, చేతులపై ర్యాష్‌ ఉన్నట్లయితే బకెట్‌ నీళ్లలో కొన్ని ఐస్‌ ముక్కలు వేసుకొని ఆ నీటితో ముఖాన్ని, చేతుల్ని తరచూ శుభ్రం చేసుకుంటుండాలి. ఆపై గంధం ప్యాక్‌ వేసుకోవచ్చు. ఇందుకోసం గంధం అరగదీసి నేరుగా మచ్చలున్న చోట అప్లై చేసుకోవాలి. లేదంటే గంధంలో రోజ్‌వాటర్‌ వేస్తూ పేస్ట్‌లా కలుపుకోవాలి. (అయితే ఇందులో పాలు ఉపయోగించకూడదు. ఎందుకంటే పాలలో జిడ్డుదనం ఎక్కువగా ఉంటుంది.) ఈ మిశ్రమాన్ని ముఖం, చేతులు.. ఇలా ర్యాష్‌ ఉన్న భాగాల్లో పూతలా వేసుకొని కాసేపటి తర్వాత చల్లటి నీటితో కడిగేసుకోవాలి. ఇలా రోజుకోసారి పదిహేను రోజుల పాటు చేస్తే చక్కటి ఫలితం కనిపిస్తుంది.